Read Zotung Chin JOHAN 12 Bible Online

JOHAN 12 - Zotung Chin bible

JOHAN 12

¹Kawtaw Poi azaw maw nin taruh ary lyakhe, chinaw kyate a thoosahpaw Lazaruh a umnaw Bethani khua kya Jesu yn thua.

²Tuin kya amaw elang zerya paccynpah hae zah Martha tuh a thohae; Lazaruh tuh Jesu ryte ccaboi kya a haung hae paw kya a umbua.

³Mary nynh myarya amee rupaw zimuin, nard[1] ccite a rae hae paw pound kheit kha lawkuh zah Jesu ccu kha a thuh koute a sang te a hupya; inn tuh zimuin myn te phe abeih.

⁴A zuitu hae kyaze lu kheit, Jesu a phee cih paw Judas Iskariot nynh,

⁵“Pawccemou hynh-e zimuin hynh denari phua za thum lang a zua koute ryachi hae a pya khyh hae?” a ci.

⁶Hynhte a hopaw hynh ryachi hae hanlan a tua keiccu thua leite miruhpaw athua keiccu nynh thua; aning tuh phuabu a kyngtu thua zah, tuin kya a nung hae paw kha leih a ru.

⁷Jesu nynh, “Khah-e nung kha amaw um lan um sah; ka rhua ccy nin hanlan a cyipaw nynh thua.

⁸Pawccecize ryachi hae tuh nae kya zungzae a um hae, thuasalama kae tuh nae kya zungzae ka um lan khyh,” a ci.

⁹Judah hae patae nynh Jesu tuh tuin kya a um cipaw he a nyh hae tuh, Jesu a um keiccu kyalya thua leite, chinaw kyate a thoosahpaw Lazaruh kha mah muih khylan oun cceih hae.

¹⁰Tukeiccuze ranpibawi lepaw hae nynh Lazaruh kha mah chia lan cite a paccyn hae.

¹¹Pawccecize Lazaruh keiccuze Judah hae patae nynh minmin kha cciataw hae zah Jesu kha a zyn hae.

¹²Awkhualan kya poi kalan oun thua hae paw ccungccaw patae nynh Jerusalem lang Jesu yn thua cipaw he a thae hae tuh,

¹³sarutah ku ange hae kha ccyngkute Jesu kha cciadue lan cceih hae zah, “Hosanna! Bawipaw min te yn thuapaw Israel Siapharan tuh hythuaccou sah!” cite a sia hae.

¹⁴Jesu nynh lann taraw kha muih zah a cciku; Ccathyaa kyaze,

¹⁵“Zion ccanung, rih nan. Dotua, na siapharan tuh lann taraw kha ccikute yn thua cciamang,” cite azeikuh.

¹⁶A zuitu hae nynh atakaw lya tuh hynh-e kong hynh thaethya khyh hae; thuasalama Jesu a phu-enaw he yn langkuh vae tetuh, Ccathyaa nynh amaw konglang nynh hynhte a la zei cipaw te amaw hanlan nynh hynhte a cyipya hae cipaw kha a liathui hae.

¹⁷Tukeiccuze Jesu nynh shaw lungkhu e Lazaruh kha ko zah chinaw kyate a thoosah lyaze amaw ryte a um hae paw nynh tuh-e kong tuh ccaekia a khan hae.

¹⁸Tuh-e muihsahnaw tuh a langsaku cipaw a thae hae keiccuze ccungccaw hae nynh amaw kha a cciadue hae.

¹⁹Tukeiccuze Farasi hae nynh, “Na tae vae lan khyh oh cipaw hynh nykuh oh. Dotua oh, laephi pynpi nynh amaw kha a zui vae hae!” cite lu kheit te lu kheit a hoku hae.

²⁰Poi kya Pachia beik lan cite oun thua hae paw laku kya Grik hae abang a umbua hae.

²¹Tuh-e hae nynh Galilee pee, Bethsaida khuapaw Filip kalan cceih hae zah, “Sazae, Jesu kha kae muih ry,” a cipya hae.

²²Filip nynh cceih zah Andru kha a hopya; Andru te Filip nynh Jesu kha a hopya hae.

²³Jesu nynh minmin kyakhe, “Ccungccaw Ccapaw nynh phu-enaw a mue ccyh athua vae.

²⁴Byaccaccing kae hopya oh, chanvuih ccacii nynh laephi lungkhu lang ccah zah a chi khyh ze, amaw thathyhte nynh a um; thuasalama a chi ze, athae patae a pousah.

²⁵A hiinnaw a sungsahpaw ccungccaw tuh a hiinnaw a shung cih; hynh-e laephi vawlan a hiinnaw a huapaw tuh zungzae hiinnaw hanlan a hiinnaw a ccykuh cih.

²⁶Humhung zemah ka rya a lahpaw tuh kae kha yn zui cih; ka umnaw kyakhe rya yn lawpahpaw mah a umbua cih; humhung zemah ka rya a lahpaw tuh ka Paaw nynh sawtuanaw a pya cih.

²⁷“Kae tuh atu ka lungriathae, pawtemou ka ho cih? ‘Apang, hynh-e ccyh kyate yn khum,’ ka ci cih tou? Thuasalama hynh-e khylan nynh e ccyh kalan kae thua.

²⁸Apang, na min hynh phu-esah tua,” a ci. Tetuh vaawlang te roi yn ccae zah, “A phu ka esah vae, a phu bua ka esah ung cih,” a ci.

²⁹Tuin kya a thadyn hae paw ccungccaw zapi nynh tuh-e roi tuh thae hae zah, “Kholungthyh,” a ci hae; abang nynh, “Vaawpaw nynh amaw kalan bya a ho,” a ci hae.

³⁰Jesu nynh, “E roi tuh kae ka hanlan yn thua khyh, nanning hanlan nynh yn thua.

³¹Atu tuh hynh-e laephi hynh byapia ccyh nynh thua, atu hynh-e laephi a uktu tuh ccaring dee athua cih.

³²Kae tuh laephi kyate saethung ka thua te, ccungccaw hae balyn kha ka kalan ka suebua cih hae,” a ci.

³³E bya a hopaw tuh pawcihawpaw chinaw te nynh ka chih cih cipaw kha a langsahpya hae paw nynh thua.

³⁴Ccungccaw hae nynh, “Messiah tuh zungzae a hiin cih cite Kawbya kyate kae thae; tuhte athua ze pawccemou nang nynh, ‘Ccungccaw Ccapaw tuh saethung athua cih,’ na ci? Tuh-e Ccungccaw Ccapaw tuh hummou?” a ci hae.

³⁵Jesu nynh, “Awnaw tuh nae kya sosoh a um, mohnaw nynh ae phya khyh nawlan oh, awnaw na hoi lya oh hin cceih oh, pawccecize mohnaw kya a cceihpaw tuh teilang nynh ka ccia cipaw nyh khyh.

³⁶Awnaw na hoi lya oh hin awnaw ccaaw lang na tang nawlan oh, awnaw kha zyn oh,” a cipya hae. Jesu nynh hynh-e bya a ho koute mih kyate pou zah zya a rekuh.

³⁷Jesu nynh mih malang khe muihsahnaw patae a langsaku zemah amaw kha zyn khyh hae.

³⁸Profeh Isaiah nynh, “Bawipaw, kae hopaw bya kha hum nynh mou a zyn? Bawipaw kuih tuh hum kalan mou a langku?” cite a hopaw bya accing nawlan nynh thua.

³⁹Tukeiccuze minmin nynh zyn kho khyh hae; pawccecize Isaiah nynh bua a hopaw tuh,

⁴⁰“Mih mit te a muih khyh nawlan hae, mih thinlung te a thaethya khyh nawlan hae, Pachia nynh mih mit kha mohsah hae zah mih thinlung kha a khungsah hae, tuhkhyhze tuh ka kalan oun kisei cih hae zah ka dansah sei cih hae,” a ci.

⁴¹Isaiah nynh e bya a hopaw tuh, Jesu a phu-enaw kha a la muih keiccuze a konglang a la hopaw nynh thua.

⁴²Tuhzemah uktu hae patae nynh heize amaw kha a zyn hae; thuasalama Farasi hae nynh sinakok kyate oun deesei cih hae cipaw a ri hae keiccuze minmin nynh kae zyn cite ho ngan khyh hae.

⁴³Pawccecize minmin tuh Pachia kyate yn thuapaw phu-enaw laeze ccungccaw phu-enaw kha a ryhua hae.

⁴⁴Jesu nynh thawte sia zah, “Humhung zemah kae yn zynpaw tuh kae kyalya yn zyn khyh, kae yn sawtupaw kha mah a zyn.

⁴⁵Humhung zemah kae yn muihpaw tuh kae yn sawtupaw kha mah a muih.

⁴⁶Kae yn zynpaw miakaw nynh mohnaw kya a um khyh nawlan hae, kae tuh awnaw lante laephi vawlan kae thua.

⁴⁷Humhung zemah ka bya thae zah a zui leipaw tuh kae nynh bya ka pia khyh; pawccecize kae tuh laephi kha byapia khylan kae thua khyh, laephi kha khum khylan nynh kae thua.

⁴⁸Kae kha yn vua zah ka bya a lawkuh leipaw tuh bya a pia cih paw a um; ka hopaw ka bya nynh amaw kha nyathya nin kya bya a pia cih.

⁴⁹Pawccecize kamaw kaw te bya ka ho khyh, kae yn sawtupaw ka Paaw nynh ka ho lanpaw te ka ccae lanpaw kha kaw yn pya vae.

⁵⁰A kawbya tuh zungzae hiinnaw nynh thua cipaw ka ny, tukeiccuze ka hopaw miakaw tuh ka Paaw nynh yn hopya thyhte nynh ka ho,” a ci.