Read Zotung Chin JOHAN 19 Bible Online

JOHAN 19 - Zotung Chin bible

JOHAN 19

¹Pilat nynh Jesu kha cciakhae zah liarue te a buasah hae.

²Rhawkaw hae nynh hinpaw lukhung kha khepah hae zah a lu vawlan a khungsah hae, te boei sepaw kha a zingsah hae.

³Ccianua hae zah, “Judah hae Siapharan tuh a she sae vae sah!” ci hae zah a mae kha a bia hae.

⁴Tukeiccuze Pilat nynh bua toikuh zah, “Dotua oh, a seinaw pawpaw mah ka muih khyh cipaw na ny nawlan oh amaw hynh nae kalan kae cciakhae,” a cipya hae.

⁵Jesu tuh hinpaw lukhung khungkuh zah boei sepaw zingkute yn pou. Pilat nynh minmin kha, “E ccungccapaw hynh dotua oh!” a cipya hae.

⁶Ranpibawi lepaw hae te palih hae nynh Jesu kha he muih hae tuh, “Vaelantung kya khiade oh! Khiade oh!” cite a sia hae. Pilat nynh minmin kha, “Nanning nynh amaw hynh cciakhae oh lah vaelantung kya khiade oh, kae tuh a seinaw pawpaw mah ka muih khyh,” a cipya hae.

⁷Judah hae nynh, “Phung ccangkheit kae hoi zah tuh-e phung thyhte aning tuh chi lan accan, pawccecize Pachia Ccapaw nynh ka thua a ciku,” cite a khung hae.

⁸Pilat nynh tuh-e bya he a thae tuh, houh a rih vae.

⁹A inn lungkhu lang bua tee zah Jesu kha, “Nang hynh paw kyate mou nae thua?” cite a khia. Thuasalama Jesu nynh kaw kheit san khung khyh.

¹⁰Pilat nynh, “Bya nae khung lan khyh tou? Kae tuh nang hynh vaelantung kya khiadenaw kaw te luesahnaw kaw ka hoipaw kha na nyh khyh tou?” a cipya.

¹¹Jesu nynh, “Vaawlang te nang hynh kawpya athua khyh ze nang nynh ka tungvaw kya paw kaw sanmah na hoi kho khyh; tukeiccuze nang na kalan kae yn appaw ccungccaw tuh ale huapaw seinaw a hoi,” cite a khung.

¹²Tuin ccyh kyate tho zah Pilat nynh Jesu kha luesah lan a zuaku; thuasalama Judah hae nynh, “E ccungccapaw hynh na luesah lan athua ze, nang tuh Sizar banpaw na thua khyh; humhung zemah amaw te amaw siapharan lang a tansakuhpaw tuh siapharan a rawsepaw nynh thua,” cite a sia hae.

¹³Pilat nynh tuh-e bya he a thae tuh, Jesu kha atolang poukhae zah Hebru bya te Gabbatha ci hae zah ‘Lungphae’ a ci hae paw byapianaw tungkhung kya a haung.

¹⁴Tuin nin tuh Kawtaw Poi hanlan Paccynku nin thua zah ninthu loukaw nynh thua. Pilat nynh Judah hae kha, “Nae Siapharan hynh dotua oh!” a cipya hae.

¹⁵Thuasalama minmin nynh, “Amaw kha poukhae oh! Poukhae oh! Vaelantung kya khiade oh!” cite a sia hae. Pilat nynh, “Nae Siapharan tuh vaelantung kya ka khiade cih tou?” cite a khia hae. Ranpibawi lepaw hae nynh, “Sizar laelan siapharan kae hoi khyh,” cite a khung hae.

¹⁶Tetuh Pilat nynh Jesu kha vaelantung kya khiade lan mih kalan a pya hae. Tukeiccuze minmin nynh Jesu kha a cciakhae hae.

¹⁷Jesu tuh a vaelantung puihkute ‘Luru hmin’ a ci hae paw hmin kalan a cceih, tuh-e hmin tuh Hebru bya te ‘Golgotha’ a ci hae.

¹⁸Tuin kyakhe Jesu kha ccangpaw ccungccaw lu ning ryte vaelantung kya a khiade hae, a voilang lu kheit a ranglang lu kheit, Jesu tuh angaelaku nynh a um.

¹⁹Pilat nynh ccawkhia kha zei zah vaelantung kya a taw. Ccawkhia kyakhe, “Judah hae Siapharan, Nazareth khuapaw Jesu,” cite a zei.

²⁰E ccawkhia hynh Judah hae patae nynh a ria hae, pawccecize Jesu a khiadenaw hae hmin tuh khua kyate anaekuh; tuh-e ccawkhia tuh Hebru bya, Latin bya, Grik bya te a zei hae.

²¹Judah hae kyaze ranpibawi lepaw hae nynh Pilat kha, “ ‘Judah hae Siapharan’ cite zei leite, ‘Kae tuh Judah hae Siapharan nynh ka thua a ciku,’ cite zei,” a cipya hae.

²²Pilat nynh, “Ka zei vae paw tuh ka zei thyhte um sah,” cite a khung hae.

²³Rhawkaw hae nynh Jesu kha vaelantung kya a khiade kou hae te, a boeining hae kha lawkuh hae zah zung pali lang seii hae zah lu kheit ze zung kheit ccite a neeku hae, akaw-angki kha mah a khah hae; tuh-e akaw-angki tuh ahuikunaw a um lei lante alu te alia cia a kua hae paw nynh thua.

²⁴Tukeiccuze minmin nynh, “E tuh seii nan oh sih, hummou a ccou cih cipaw ny nawlan ccungthydung oh sih,” cite lu kheit te lu kheit a hoku hae. Tuh-e tuh Ccathyaa kyaze, “Minmin nynh ka boeining hae kha a neeku hae, ka angki hanlan ccungthy a dung hae,” cite a hopaw kha accing nawlan nynh thua. Tuhcite rhawkaw hae nynh a cyi hae.

²⁵Tuh ccyh lyakhe Jesu a vaelantung pe khe Jesu a nung te a nung neitawnung athuapaw Klopas zu Mary te Mary Magdalin tuh a thadyn hae.

²⁶Tukeiccuze Jesu nynh a nung te a sungsahpaw a zuitupaw a thadyn hae paw kha he a muih tuh, a nung kha, “Nopinung, khah-e kha na ccapaw,” a cipya.

²⁷Tukoute a zuitupaw kha, “Khah-e kha na nung,” a cipya. Tuin ccyh kyate tuh-e zuitupaw nynh Jesu nung kha a inn lang a cciakhae.

²⁸Tukoute Jesu nynh atu tuh pawpaw balyn marya accing vae cipaw nyh zah, Ccathyaa kya a umpaw kha accing nawlan, “Tui ka haw,” a ci.

²⁹Tuin kya misutui ariapaw phe beihpaw lungre zung kheit a um, minmin nynh boeipuepaw kha misutui ariapaw lungkhu lang dung hae zah hyssop ku aran kya heede hae zah Jesu mung kya a nungde hae.

³⁰Jesu nynh misutui ariapaw kha a neih koute, “Athang vae,” a ci; tukoute a lu ting zah a hy athang.

³¹Tuin nin tuh Paccynku nin thua zah awkhualan sabbath nin tuh alesaepaw nin athua keiccuze, Judah hae nynh michi rhua hae kha sabbath nin kya vaelantung kyakhe phang a um vae khyh ccaw cite, mih ccu hae kha khya khylan te mih rhua hae kha law khylan Pilat kha a ngia hae.

³²Rhawkaw hae nynh oun thua hae zah Jesu ryte vaelantung kya a khiadekheih hae paw lukheitpaw ccu te ccangpaw lukheitpaw ccu kha a khya hae.

³³Thuasalama minmin nynh Jesu kya a thua hae tuh, a chih vae cipaw nyh hae zah a ccu kha khya vae khyh hae.

³⁴Thuasalama rhawkawpaw lu kheit nynh a naw kha ccoi te thuing zah chii te tui palou apou.

³⁵(Tuh-e konglang tuh na zyn nawlan oh a muihtupaw nynh ccaekia a khan. A ccaekia tuh hme zah byaccing nynh ka ho cipaw a nyku).

³⁶Hynhte acyikupaw hynh Ccathyaa nynh, “A ru ccangkheit sanmah khya thua lan khyh,” a cipaw kha accing nawlan nynh thua.

³⁷Ccangpaw Ccathyaa nynh, “Mimaw nynh a thuing hae paw ccungccapaw kha minmin nynh a do cih hae,” bua a ci.

³⁸Tukoute Judah hae raw a ri keiccuze aruh lante Jesu zuitu athuapaw, Arimathea khuapaw Josef nynh Jesu rhua kha lawku lan Pilat kalan ngiakuh zah Pilat nynh a ua. Tukeiccuze aning nynh cceih zah Jesu rhua kha a lawku.

³⁹Khuazi kya Jesu kalan a cceih boi paw Nikodemu mah pound za kheit loukaw aripaw mura te aloe apydekuhpaw mynkhuhpaw kha yn ccyng zah tuhlang yn thuabua.

⁴⁰Minmin nynh Jesu rhua kha lah hae zah Judah hae michi ccynaw phung thyhte, mynkhuhpaw ryte nebaleihpaw boei rawpaw te a rhua kha a lung hae.

⁴¹Vaelantung kya a khiadenaw hae hmin kya khokhu ccangkheit um zah, tuin kyakhe ccungccaw lu kheit san a ccynaw boi lei hae paw shaw thawpaw a um.

⁴²Judah hae Paccynku nin athua keiccuze anaenaw umpaw tuh-e shaw kyakhe Jesu rhua kha a ccy hae.