Read Zotung Chin JOHAN 20 Bible Online

JOHAN 20 - Zotung Chin bible

JOHAN 20

¹Lonaw naw kheit kyaze masaty nin awkhua takaw, khua adae mawkhe Mary Magdalin tuh shaw kalan cceih zah shaw kyate athuhhu lung anuekupaw kha a muih.

²Tukeiccuze Mary tuh Simon Peter te Jesu nynh a sungsahpaw ccangpaw zuitupaw kalan ccue zah minmin kyakhe, “Ccungccaw hae nynh Bawipaw rhua kha shaw kyate phe a law vae hae, paw kya nynh a nung hae cipaw kae nyh khyh,” a cipya hae.

³Tetuh Peter te ccangpaw zuitupaw tuh thokuh hae zah shaw kalan a cceih hae.

⁴Mih lu ning te ccue hae zah ccangpaw zuitupaw nynh Peter kha po thoih zah shaw kalan a thuaty.

⁵Shaw lungkhu lang bakhung zah he a do tuh, nebaleihpaw boei rawpaw kha a muih, thuasalama a lungkhu lang tee khyh.

⁶Simon Peter tuh yn dekuh bua zah yn thua, te shaw lungkhu lang po tee zah boei rawpaw phang a umpaw kha a muih.

⁷Jesu lu a heenaw hae paw pavua tuh nebaleihpaw boei rawpaw ryte umkheih leite ccangte phang bikuhpaw kha a muih.

⁸Shaw kalan a thua typaw ccangpaw zuitupaw mah teebua zah a muih keiccuze a zyn.

⁹Pawccecize Ccathyaa nynh Jesu tuh chinaw kyate a thoothui hahe cih a cipaw kha minmin nynh la thaethya loh khyh hae.

¹⁰Tukoute zuitu hae tuh mih inn lang a ki hae.

¹¹Mary tuh shaw atolang khe rah zah a thadyn, a rah lalia lante bakhung zah shaw lungkhu lang a do.

¹²Arawpaw boeining a lawkuh hae paw vaaw hae lu ning nynh Jesu rhua a ccynaw hae kyakhe a lu lang lu kheit, a ccu lang lu kheit a haung hae paw kha a muih.

¹³Vaaw hae nynh Mary kha, “Nopinung, pawccemou na raw?” a cipya hae. Mary nynh, “Ccungccaw hae nynh ka Bawipaw kha phe a law vae hae, paw kya nynh a nung hae cipaw ka ny khyh,” cite a khung hae.

¹⁴Tuhte a ho koute nulang maekuh zah Jesu a thadynpaw kha a muih, thuasalama Jesu nynh thua cipaw nyh khyh.

¹⁵Jesu nynh, “Nopinung, pawccemou na raw? Hummou na ccung?” a cipya. Mary nynh khokhu ngawtupaw vosi cite tua zah, “Sazae, nang nynh a rhua kha na law lan athua ze na nungnaw kha beih yn hopah, ka cceih cih zah ka lawkuh cih,” a cipya.

¹⁶Jesu nynh, “Mary!” cite a ko. Mary nynh nulang maekuh zah Hebru bya te, “Rabboni!” a ci (asuilan tuh Sazae cipaw nynh thua).

¹⁷Jesu nynh, “Yn kyng nan, pawccecize ka Paaw kalan ka kaethung loh khyh; thuasalama ka uno hae kalan la cceih lah, kae tuh ka Paaw athuapaw nae Paaw, ka Pachia athuapaw nae Pachia kalan ka kaethung cih cipaw la hopah hae,” a cipya.

¹⁸Mary Magdalin nynh cceih zah Bawipaw a muihnawpaw te a kya a hopyapaw bya balyn kha zuitu hae kya a hopya hae.

¹⁹Lonaw kyaze masaty nin athuapaw tuh-e nin kya zete yn thua tuh, Judah hae raw a ri hae keiccuze zuitu hae tuh pynkheihlan a tungkunaw hae kyakhe thuakaw hae kha pong a khaw hae, tuh ccyh lyakhe Jesu tuh yn thua zah angaelaku khe thadyn zah, “Nae kya daenaw um sah,” a cipya hae.

²⁰Tuhte a ho koute a kuih te a naw kha a dosah hae. Zuitu hae nynh Bawipaw kha a muih hae tuh mih lungtua.

²¹Jesu nynh minmin kha, “Nae kya daenaw um sah; ka Paaw nynh yn saw hawte, nanning kha kae saw oh,” bua a cipya hae.

²²Tuh-e bya a ho koute, Jesu nynh mih tungvaw kya a hy sawnua hae zah, “Thyaa Muisaw hynh mue oh.

²³Nanning nynh lukhakheit seinaw kha na ngaethya oh ze, mih seinaw tuh ngaethya athua; nanning nynh lukhakheit seinaw kha na tynsah oh ze, a seinaw tuh phang atyn,” a cipya hae.

²⁴Zuitu lu haw lae ning kyaze lu kheit athuapaw Thomas (Ccaawphei ci hae paw) tuh Jesu a thua lya minmin kya umbua khyh.

²⁵Tukeiccuze ccangpaw zuitu hae nynh, “Bawipaw kha kae muih vae,” cite a hopya hae. Thuasalama Thomas nynh, “A kuih kya thingkhia te a khianaw hae adaelaepaw kha ka muih leite, tuh-e adaelaepaw kha ka kuihdung te ka putua leite, a naw kya-e adaelaepaw kha ka kuih te ka haetua leite tuh ka zyn lan khyh,” a cipya hae.

²⁶Naw kheit koute zuitu hae tuh inn lungkhu kya bua um hae zah Thomas mah a umbua. Thuakaw hae kha marya mang a khaw hae pite, Jesu tuh yn thua zah angaelung khe thadyn zah, “Nae kya daenaw um sah,” a ci.

²⁷Jesu nynh Thomas kha, “Na kuihdung kha hein kya yn putua lah, ka kuih hae hynh dotua. Na kuih kha yn dyng lah ka naw hynh yn haetua. Zyn leite um nan vae, zyn ccavae,” a cipya.

²⁸Thomas nynh, “Ka Bawipaw te ka Pachia!” a ci.

²⁹Jesu nynh, “Thomas, nang tuh nae muih keiccuze na zyn. Kae hynh yn muih leite yn zyn hae paw tuh lungtuapaw nynh thua hae,” a cipya.

³⁰E ccauh kya azeikuh leipaw ccangpaw muihsahnaw patae kha mah Jesu nynh a zuitu hae muihnaw kya a langsaku.

³¹Thuasalama Jesu tuh Messiah, Pachia Ccapaw nynh thua cipaw na zyn nawlan oh te tuhte na zynnaw oh liate amaw min te hiinnaw na hoi nawlan oh nynh hynh-e hae hynh zei athua.