Read Zotung Chin JOHAN 3 Bible Online

JOHAN 3 - Zotung Chin bible

JOHAN 3

¹Judah hae uktu, Nikodemu ci hae paw Farasipaw lu kheit a um.

²Tuh-e paw nynh khuazi khe Jesu kalan yn thua zah, “Sazae, nang tuh Pachia kyate yn thuapaw sazae nynh na thua cipaw kae ny, pawccecize Pachia nynh ae umkhae khyh lanze hynh-e na raepaw muihsahnaw hae hynh hum nynh sanmah rae kho lan khyh,” cite a hopya.

³Jesu nynh, “Byaccaccing kae hopya, humhung zemah a puithui khyh lanze Pachia peenaw kha muih kho lan khyh,” cite a khung.

⁴Nikodemu nynh, “A piccan vae paw ccungccaw nynh pawtemou bua a pui kho ung cih? A nung vue lungkhu lang vaeningnaw bua teete a pui kho ung cih zawtou?” cite a khung.

⁵Jesu nynh, “Byaccaccing kae hopya, humhung zemah tui te Muisaw te a pui khyh lanze Pachia peenaw lungkhu lang tee kho lan khyh.

⁶Pynsaw kyate a puipaw tuh pynsaw thua zah Muisaw kyate a puipaw tuh muisaw nynh thua.

⁷‘Nanning na puithui hahe cih oh,’ cite kae hopyapaw hynh na ngaeangthua nan sah.

⁸Khisan nynh a rynaw lang azaw, nang nynh khisan hu kha na thae, thuasalama paw kyate yn zaw zah paw kalan nynh po azaw cipaw na nyh khyh, Muisaw kyate a puipaw miakaw tuh tuhawte nynh athua hae,” a cipya.

⁹Nikodemu nynh, “Pawtemou tuh-e tuh athua kho cih?” cite a khung.

¹⁰Jesu nynh, “Nang tuh Israel hae ccangpahtu lu kheit mang na thua pite hynh-e hynh na thaethya khyh tou?

¹¹“Byaccaccing kae hopya, kaening tuh kae nypaw kha kae ho zah kae muihpaw kha ccaekia kae khan, thuasalama kae ccaekia kha leh na khan khyh oh.

¹²Laephi uccaw hae kong hynh kae hopah oh zah na zyn khyh oh ze, vaawlang e uccaw hae kong kha kae hopya oh zeso pawtemou na zyn kho cih oh?

¹³Vaawlang te yn rungbungpaw Ccungccaw Ccapaw holeite hum sanmah vaawlang a kaepaw um boi khyh.

¹⁴Moses nynh hupaw kha ramkaw kya a sae hawte Ccungccaw Ccapaw mah sae athua cih,

¹⁵tukeiccuze amaw a zynpaw miakaw tuh zungzae hiinnaw a hoi cih.

¹⁶“Pawccecize Pachia nynh laephi hynh eih a sungsah keiccuze a Ccapaw lu kheit kyalyapaw kha oun pya; tukeiccuze amaw a zynpaw miakaw tuh chih vae lan khyh zah zungzae hiinnaw a hoi cih.

¹⁷“Pawccecize Pachia nynh laephi hynh byapia khylan a Ccapaw kha laephi vawlan yn saw khyh, amaw liate laephi ccungccaw hae hynh khum athua hae ccaw cite nynh yn saw.

¹⁸“Amaw a zynpaw ccungccaw tuh byapia thua vae khyh, thuasalama a zyn leipaw tuh byapia phe athua vae, pawccecize Pachia nynh a hoi thypaw Ccapaw min kha zyn khyh.

¹⁹Byapianaw tuh hynhte nynh thua; awnaw tuh laephi vawlan hin yn thua, thuasalama ccungccaw hae tuh mih cyisahnaw ahoy khyh keiccuze awnaw laeze mohnaw kha a ryhua hae.

²⁰Pawccecize ahoy leipaw a cyihpaw miakaw nynh awnaw kha a hua, a cyisahnaw alangku khyh nawlan awnaw kalan yn cceih khyh.

²¹Thuasalama ahmepaw a cyihpaw nynh tuh a cyisahnaw kha Pachia rynaw hawte nynh thua cipaw ccaerarih lan muih athua nawlan awnaw kalan yn thua,” a cipya.

²²Tukoute Jesu te a zuitu hae tuh Judea ram lang cceih hae zah, tuin kyakhe minmin ryte sosoh um hae zah ccungccaw hae kha baptisma a pya hae.

²³Johan mah Salim khua te anaekunaw Aenon kyakhe baptisma a pya hae. Pawccecize tuin kya tuh tui alung; ccungccaw hae tuh oun thua hae zah aning nynh baptisma a pya hae.

²⁴Pawccecize Johan tuh thonginn kya saw thua loh khyh.

²⁵Johan a zuitu hae te Judah paw tuh ccikankunaw konglang bya a eikuh hae.

²⁶Johan zuitu hae nynh Johan kalan cceih hae zah, “Sazae, Jordan vaw khuraw lang nang te na umkheih oh zah amaw kong ccaekia na khanpaw ccungccapaw nynh baptisma pya hae zah ccungccaw hae balyn tuh amaw kalan a cceih hae,” cite a hopya hae.

²⁷Johan nynh, “Vaawlang te pya athua khyh lanze, ccungccaw nynh pawpaw mah mue kho lan khyh.

²⁸‘Kae tuh Messiah ka thua khyh, amaw malang sawtypaw nynh ka thua,’ cite ka hopaw a thaetu ka ccaekia hae tuh naemaw maw nynh na thua oh.

²⁹Akaenung liaccanung a hoitu tuh zudy ccangvaepaw nynh thua; zudy ccangvaepaw pe thadyn zah zudy ccangvaepaw roi a thaepaw a banpaw tuh a roi a thae keiccuze myarya a lungtua; tuhawte e ka lungtuanaw tuh accing.

³⁰Aning tuh a kaethung cih zah kae tuh ka nyaabung cih,” a ci.

³¹Vaawlang te yn thuapaw tuh pawpaw balyn laeze a lehua; laephi kya-e ccungccaw tuh laephi ccungccaw thua zah laephi uccaw kong nynh a hothya. Vaawlang te yn thuapaw tuh pawpaw balyn laeze a lehua.

³²Aning nynh a muihpaw te a thaepaw kha ccaekia a khan zemah hum nynh sanmah tuh-e ccaekia a khanpaw tuh lehkhan khyh hae.

³³A ccaekia kha lehkhan vae paw ccungccaw nynh tuh Pachia tuh ahme cite a tynsah.

³⁴Pachia nynh yn sawpaw ccungccaw nynh tuh Pachia bya kha a ho; pawccecize Pachia nynh tuh-e paw tuh Muisaw kha phe beih lan a pya.

³⁵Paaw nynh Ccapaw kha sungsah zah pawpaw balyn kha a kuih kya marya a pya vae.

³⁶Ccapaw a zynpaw miakaw tuh zungzae hiinnaw a hoi; Ccapaw kaw a eipaw tuh hiinnaw kha muih lan khyh zah, Pachia thinrianaw kha a tungvaw atyn cih.