Read Zotung Chin JOHAN 6 Bible Online

JOHAN 6 - Zotung Chin bible

JOHAN 6

¹Tukoute Jesu tuh Tiberias Rili a ci hae paw Galilee Rili khuraw lang a zua.

²Jesu nynh ngeccih hae tungvaw a raepaw muihsahnaw kha a muih hae keiccuze ccungccaw zapi nynh a zui hae.

³Jesu tuh mua vawlan kae zah a zuitu hae ryte a haung hae.

⁴Judah hae poi athuapaw Kawtaw Poi tuh anae vae.

⁵Jesu nynh ngawdo zah amaw kalan oun cceih hae paw ccungccaw zapi kha he a muih tuh Filip kha, “E ccungccaw hae nynh a ae lan hae paw sanlou kha teilangmou ah re cih oh?” a cipya.

⁶E bya hynh Filip kha syntawtua khylan nynh a ho, pawccecize a cyi lanpaw kha amaw nynh phe a nypaw nynh thua.

⁷Filip nynh, “Hynh-e hae milu raveih nynh sanlou beihtaraw ccite a mue nawlan hae denari phuapia za ning mee re lan zemah zaw lan khyh,” a cipya.

⁸A zuitu lu kheit athuapaw Simon Peter a neitawpaw Andru nynh,

⁹“Barli sanlou phe pangaw te ngasaw taraw zaw ning a hoipaw imuapaw hein kya mang um; thuasalama hynhzeih ccungccaw hanlan azaw cih zawtou?” a cipya.

¹⁰Jesu nynh, “Ccungccaw hae kha haungsah oh,” a ci. Tuin kya lonua patae asae, tukeiccuze mih balynte thong pangaw loukaw acih hae paw ccungccaw hae tuh a haung hae.

¹¹Jesu nynh sanlou kha lah zah lungtuabya a ho koute tuin kya a haung hae paw kha a nee hae. Tuhawte ngasaw kha mah ccungccaw hae nynh a ry hae zeih a nee hae.

¹²Ccungccaw hae phe a byn hae te Jesu nynh a zuitu hae kha, “Alaepaw a eihpaw kha azo khyh nawlan ccakhung oh,” a cipya hae.

¹³Tukeiccuze a aepaw ccungccaw hae kyate alaepaw kha ccakhung hae zah barli sanlou phe pangaw kya-e a eihpaw alaepaw tuh kee haw lae ning phe abeih.

¹⁴Jesu nynh a raepaw muihsahnaw kha tuh-e ccungccaw hae nynh he a muih hae tuh, “E paw tuh lae vawlan yn thua cih a ci hae paw profeh ccaccing nynh thua,” a ci hae.

¹⁵Ccungccaw hae tuh oun thua cih hae zah amaw kha siapharan lang yn nangse vae cih hae cipaw kha Jesu nynh a ny keiccuze a makhaete mua lang zya bua a cceih.

¹⁶Zete yn thua tuh a zuitu hae tuh rili kalan a cceihbung hae.

¹⁷Kohlung lungkhu lang tee hae zah Kapernaum khua lang rili kha a zua hae. Phe moh vae zah Jesu tuh mih kalan thua loh khyh.

¹⁸Khise yn tho keiccuze tuileih a tho.

¹⁹Minmin nynh kohlung kha me thum me pali loukaw cia he a zaw hae te, Jesu tuh rili vawlan yn cceih zah kohlung kalan yn naekupaw kha a muih hae tuh a rih hae.

²⁰Thuasalama Jesu nynh minmin kha, “Kamaw nynh ka thua, rih nan oh,” a cipya hae.

²¹Te Jesu tuh kohlung lungkhu lang lungtuate teesah hae zah, kohlung tuh a ccia rynaw hae varang langkhe sosoh mawte phe a thua.

²²Awkhualan khe rili khuraw lang um hae paw ccungccaw hae nynh tuin kya kohlung ccangkheit kyalya nynh a um cipaw kha a ny hae; te Jesu tuh a zuitu hae ryte kohlung kalan teebua khyh cipaw te zuitu hae lalouh nynh a cceih hae cipaw kha mah a ny hae.

²³Tuhzemah Tiberias khua langte oun cceihpaw ccangpaw kohlung hae tuh Bawipaw nynh lungtuabya a ho koute sanlou a la aenaw hae hmin pe oun thua hae.

²⁴Ccungccaw hae nynh Jesu te a zuitu hae tuh tuin kya um khyh hae cipaw kha a muih hae keiccuze minmin mah kohlung lungkhu lang tee hae zah Jesu kha ccung khylan Kapernaum khua lang a cceih hae.

²⁵Minmin nynh Jesu kha rili khuraw langkhe muih hae zah, “Sazae, hohtuhmou hein kya na thua?” cite a khia hae.

²⁶Jesu nynh, “Byaccaccing kae hopya oh, nanning nynh muihsahnaw hae na muih oh keiccuze kae hynh nae ccung khyh oh, sanlou na ae oh zah nae vueso keiccu nynh nae ccung oh.

²⁷Arohthyapaw looh hanlan ryalah nan oh, Ccungccaw Ccapaw nynh nanning ae pya cih oh paw zungzae hiinnaw hanlan atynpaw looh elang ryalah oh; pawccecize Paaw Pachia nynh amaw kha tazeih phe khia vae paw nynh thua,” a ci.

²⁸Minmin nynh, “Pachia nynh a rypaw ryalaw kae law nawlan, pawmou kae cyih cih?” cite a khia hae.

²⁹Jesu nynh, “Pachia nynh a rypaw ryalaw tuh, amaw nynh a sawpaw kha na zyn lan oh paw kha nynh athua,” cite a khung hae.

³⁰Tukeiccuze minmin nynh, “Kaening nynh kae muih zah nang kha kae zyn nawlan, paw muihsahnaw mou nae raepah cih? Paw rya mou na lah cih?

³¹‘A ae lan hae paw sanlou kha vaawlang te Pachia nynh a pya hae,’ cite azeiku hawte, kae minpaaw hae nynh manna kha ramkaw kya a ae hae,” a ci hae.

³²Jesu nynh, “Byaccaccing kae hopya oh, Moses nynh vaawlang e sanlou kha ae pya khyh oh; ka Paaw nynh vaawlang e sanlou ccaccing kha ae pya oh.

³³Pawccecize Pachia kya-e sanlou tuh vaawlang te yn rungbung zah laephi ccungccaw hae kalan hiinnaw a pyatupaw nynh thua,” a cipya hae.

³⁴Minmin nynh, “Bawipaw, tuh-e sanlou tuh zungzae oun pya,” a ci hae.

³⁵Jesu nynh, “Kae tuh hiinnaw sanlou nynh ka thua. Ka kalan yn cceihpaw ccungccaw tuh a vuelaw boi vae lan khyh, kae yn zynpaw tuh a tuihaw boi vae lan khyh.

³⁶Thuasalama nanning nynh phang nae muih oh zemah nae zyn khyh oh cite kae hopya vae oh.

³⁷Paaw nynh yn pyapaw ccungccaw hae balyn nynh ka kalan oun cceih cih hae; ka kalan yn cceihpaw ccungccaw tuh kharouh ka dee boi lan khyh.

³⁸Pawccecize kae tuh kamaw rynaw kha cyi khylan vaawlang te kae rungbung khyh, kae yn sawtupaw rynaw cyi khylan nynh kae rungbung.

³⁹Kae yn sawtupaw nynh a rynaw tuh, kae yn pyapaw ccungccaw hae balyn kha lu kheit san zosah leite, nyathya nin kya thoosah lan hae paw nynh thua.

⁴⁰Ka Paaw nynh a rypaw tuh, Ccapaw kha muih zah a zynpaw miakaw nynh zungzae hiinnaw a hoi nawlan hae nynh thua; nyathya nin kya minmin kha ka thoosah cih hae,” a ci.

⁴¹“Kae tuh vaawlang te yn rungbungpaw sanlou nynh ka thua,” cite a ho keiccuze Judah hae tuh a ccohkuh hae.

⁴²Minmin nynh, “E paw tuh Josef ccapaw Jesu thua khyh tou? A paaw te a nung tuh ah ny oh paw khaw? Pawtemou, ‘Kae tuh vaawlang te kae rungbungpaw,’ a ciku?” a ci hae.

⁴³Jesu nynh, “Naemaw te naemaw laku ccohkuh nan oh.

⁴⁴Kae yn sawtupaw Paaw nynh a soih khyh lanze hum ccungccaw sanmah ka kalan thua kho lan khyh, ka kalan yn cceihpaw ccungccaw kha nyathya nin kya ka thoosah cih.

⁴⁵‘Minmin balyn tuh Pachia nynh a ccangpya hae paw athua cih hae,’ cite profeh hae ccauh kya azeikuh. Paaw kya-e kha thae zah a ccangkuhpaw miakaw tuh ka kalan oun cceih hae.

⁴⁶Pachia kyate yn thuapaw aning nynh Paaw kha a muih, aning laelan hum ccungccaw nynh san Paaw kha muih khyh.

⁴⁷Byaccaccing kae hopya oh, a zynpaw ccungccaw tuh zungzae hiinnaw a hoi.

⁴⁸Kae tuh hiinnaw sanlou nynh ka thua.

⁴⁹Nae minpaaw hae nynh ramkaw kya manna kha a ae hae, thuasalama a chih hae.

⁵⁰Vaawlang te yn rungbungpaw sanlou a aepaw miakaw tuh chih lan khyh hae.

⁵¹Kae tuh vaawlang te yn rungbungpaw ahiinpaw sanlou nynh ka thua. Humhung zemah e sanlou a aepaw tuh zungzae a hiin cih; kae nynh laephi hiinnaw hanlan ka pya lanpaw sanlou tuh ka saw nynh thua,” cite a hopya hae.

⁵²Tukeiccuze Judah hae nynh, “Pawtemou e ccungccapaw nynh a saw kha aening ae lan oun pya kho cih?” cite mimaw te mimaw laku thawte a eikuh hae.

⁵³Jesu nynh, “Byaccaccing kae hopya oh, Ccungccaw Ccapaw a saw kha na ae khyh oh zah a chii kha na nia khyh oh ze, nae kya hiinnaw na hoi khyh oh.

⁵⁴Humhung zemah ka saw kha ae zah ka chii a neihpaw tuh zungzae hiinnaw a hoi, tuh-e paw tuh nyathya nin kya ka thoosah cih;

⁵⁵pawccecize ka saw tuh looh ccaccing thua zah ka chii tuh niapaw ccaccing nynh thua.

⁵⁶Ka saw kha ae zah ka chii a neihpaw tuh ka kya um zah kae mah a kya ka um.

⁵⁷A hiinpaw Paaw nynh kae hynh yn saw zah Paaw liate kae ka hiin hawte, kae yn aepaw ccungccaw tuh kamaw liate a hiin cih.

⁵⁸E tuh vaawlang te yn rungbungpaw sanlou nynh thua, nae minpaaw hae nynh manna sanlou kha mang a ae hae pite a chi hae hawte thua khyh; e sanlou a aepaw tuh zungzae a hiin cih,” a cipya hae.

⁵⁹E hynh Jesu nynh Kapernaum khua sinakok kya a ccangpya lya hae nynh a ho.

⁶⁰A zuitu hae patae nynh tuh-e bya he a thae hae tuh, “E ccangpyanaw tuh myarya aru, hum nynh mou a thaethya kho cih?” a ci hae.

⁶¹A zuitu hae nynh tuh-e kong a ccohku hae paw kha Jesu nynh he a nyh tuh minmin kha, “E bya nynh nae lung ae thangsah oh tou?

⁶²Ccungccaw Ccapaw nynh langmaw a umtynaw lang a kaethungpaw kha na muih oh ze pawte athua cih?

⁶³Hiinnaw a pyatu tuh Muisaw nynh thua, pynsaw tuh ccungkia khyh; nae kya ka hopaw bya hynh muisaw thua zah hiinnaw mah athua.

⁶⁴Thuasalama nanning laku a zyn leipaw abang a um,” a cipya hae. Pawccecize Jesu nynh atakaw lya mawte a zyn lei hae paw tuh hum hae nynh athua hae cipaw te hum nynh amaw kha a phee cih cipaw kha phe a ny vae.

⁶⁵Jesu nynh, “Hynh-e keiccuze ka Paaw nynh a ua khyh lanze hum sanmah ka kalan thua kho lan khyh cite phe kae hopya vae oh,” a ci.

⁶⁶Tuin ccyh kyate a zuitu hae patae tuh nulang ki hae zah amaw ryte cceihkheih vae khyh hae.

⁶⁷Tukeiccuze Jesu nynh zuitu hae lu haw lae ning kha, “Nanning so na cceihbua ry oh tou?” a cipya hae.

⁶⁸Simon Peter nynh, “Bawipaw, hum kalan mou kae cceih cih? Nang nynh zungzae hiinnaw bya na hoi.

⁶⁹Nang tuh Pachia kyate yn thuapaw Mi Thyaa nynh na thua cipaw kaening nynh kae zyn zah kae ny,” a cipya.

⁷⁰Jesu nynh, “Nanning lu haw lae ning hynh kamaw nynh kae po khyh oh tou? Tuhzemah nanning lakuze lu kheit tuh satan nynh thua,” a ci.

⁷¹A honuathepaw tuh Simon Iskariot ccapaw Judas nynh thua; pawccecize aning tuh lu haw lae ning kyaze lu kheit mang athua pite Jesu kha a phee cih paw nynh thua.