Read Zotung Chin JOHAN 8 Bible Online

JOHAN 8 - Zotung Chin bible

JOHAN 8

²Awkhua takaw te beikinn lang bua a cceih. Ccungccaw hae balyn tuh Jesu kalan oun cceih hae, te aning nynh haung zah minmin kha a ccangpya hae.

³Kawbya sazae hae te Farasi hae nynh a vawpaw thua leipaw pise te a sei cciamangpaw nopinung kha oun cciakhae hae zah mih balyn malang khe a nung hae,

⁴minmin nynh Jesu kha, “Sazae, hynh-e nopinung hynh a vawpaw thua leipaw pise te a sei cciamang lya a kyng hae paw nynh thua.

⁵Kawbya kyaze Moses nynh tuhcihawpaw nopi hae kha lung te deih lan kaw oun pya. Nang nynh pawtemou na ho cih?” a cipya hae.

⁶Minmin nynh hynh-e bya a ho hae paw tuh Jesu kha seibe khylan a syntawnaw hae paw nynh thua. Thuasalama Jesu nynh bakhung zah a kuihdung te laephi kya ccaw a zei.

⁷Minmin nynh tuhcite palei a khia hae tuh, Jesu nynh lawbabin lan haung zah minmin kha, “Nanning lakuze seinaw a hoi leipaw nynh nopinung kha lung te deih ty sah,” a cipya hae.

⁸Tukoute bua bakhung zah laephi kya ccaw bua a zei.

⁹Tuh-e bya he a thae hae tuh, piccan huapaw kyate tho zah lu kheit koute lu kheit a cceih vae hae; Jesu kyalya kha cciataw hae zah a malang khe nopinung tuh a thadyn.

¹⁰Jesu nynh lawbabin lan haung zah nopinung kha, “Nopinung, teimou a um hae? Hum nynh san sei ae be khyh tou?” a cipya.

¹¹Nopinung nynh, “Hum nynh san sei yn be khyh, Bawipaw,” a cipya. Jesu nynh, “Kae nynh mah sei kae be khyh; la cceih lah la sei nan vae,” a cipya.

¹²Jesu nynh, “Kae tuh laephi awnaw nynh ka thua. Kae yn zuipaw tuh mohnaw kya cceih lan khyh, hiinnaw awnaw kha a hoi cih,” cite bua a hopya hae.

¹³Tukeiccuze Farasi hae nynh, “Nang tuh namaw konglang kha namaw nynh ccaekia na khan; na ccaekia tuh kyh khyh,” a cipya hae.

¹⁴Jesu nynh, “Kae tuh kamaw konglang ccaekia ka khan zemah ka ccaekia tuh akyh; pawccecize kae tuh paw kyate nynh kae thua cipaw te teilang nynh ka cceih cih cipaw ka ny; thuasalama nanning nynh kae tuh paw kyate nynh kae thua cipaw te teilang nynh ka cceih cih cipaw kha na nyh khyh oh.

¹⁵Nanning tuh ccungccaw phung thyhte bya na pia oh; kae tuh hum sanmah bya ka pia khyh.

¹⁶Tuhzemah kae tuh bya ka pia ze, ka byapianaw tuh ahme, pawccecize ka makhaete bya ka pia khyh, kae yn sawtupaw Paaw ryte nynh kae um.

¹⁷Nae kawbya kya mah ccungccaw lu ning ccaekia tuh akyh cite azeikuh.

¹⁸Kae tuh kamaw kong kha ccaekia ka khan, te kae yn sawtupaw Paaw nynh mah kamaw kong kha ccaekia a khan,” a ci.

¹⁹Minmin nynh, “Na Paaw tuh teimou a um?” cite a khia hae. Jesu nynh, “Nanning nynh kae thuasah, ka Paaw thuasah na nyh khyh oh; kae hynh nae la ny oh ze, ka Paaw mah na nyh cih oh,” cite a khung hae.

²⁰Jesu nynh e bya hynh beikinn lungkhu sisuakhaan kya a ccangpya lya hae nynh a ho; amaw ccyh azaw loh khyh keiccuze hum nynh sanmah kyng khyh hae.

²¹Jesu nynh minmin kha, “Kae tuh ka cceih cih zah nanning nynh nae ccung cih oh, thuasalama nae seinaw kyakhe na chih cih oh, ka ccianaw lang na thua kho lan khyh oh,” bua a cipya hae.

²²Tetuh Judah hae nynh, “ ‘Ka ccianaw lang na thua kho lan khyh oh,’ a cipaw tuh amaw te amaw tou a theihkuh cih?” a ci hae.

²³Jesu nynh minmin kha, “Nanning tuh akaw lang e nynh na thua oh, kae tuh luki lang e nynh ka thua; nanning tuh hynh-e laephi kya-e nynh na thua oh; kae tuh hynh-e laephi kya-e ka thua khyh.

²⁴Tukeiccuze nanning kha, ‘Nae seinaw kya na chih cih oh,’ cite kae hopya oh; pawccecize kae tuh aning nynh ka thua cipaw hynh na zyn khyh oh ze, nae seinaw kya na chih cih oh,” a cipya hae.

²⁵Minmin nynh, “Nang tuh hummou?” a ci hae. Jesu nynh minmin kha, “Kae tuh hum nynh ka thua cipaw kha atakaw lya mawte phe kae hopya vae oh.

²⁶Nanning konglang ka ho lanpaw te byapia lanpaw patae a um; thuasalama kae yn sawtupaw tuh ahme, amaw kyate ka thaepaw miakaw kha laephi kya ka phy,” a cipya hae.

²⁷Jesu nynh minmin kya Paaw kong a hopaw kha thaethya khyh hae.

²⁸Tukeiccuze Jesu nynh minmin kyakhe, “Ccungccaw Ccapaw kha he nae saethung oh te, kae tuh aning nynh ka thua cipaw kha thuasah, kamaw kaw te pawsang cyi leite, ka Paaw nynh yn ccangpya hawte ka hopaw kha thuasah nae nyh cih oh.

²⁹Kae yn sawtupaw tuh ka kya um zah ka makhaete yn cciataw boi khyh, pawccecize a lungrypaw kyalya kha kae nynh ka cyi,” a cipya hae.

³⁰E bya hynh Jesu nynh he a ho tuh ccungccaw patae nynh a zyn hae.

³¹Jesu nynh amaw zyn hae paw Judah hae kha, “Nanning nynh ka bya kya na tyn oh ze, ka zuitu hae ccaccing na thua cih oh.

³²Nanning nynh byaccing kha na nyh cih oh zah byaccing nynh nanning kha ae luesah cih oh,” a cipya hae.

³³Minmin nynh amaw kha, “Kaening tuh Abraham ciihan kae thua zah humhung see lang mah kae tang boi khyh. ‘Nanning tuh luesah na thua cih oh,’ na cipaw tuh pawmou na ho ry?” cite a ci hae.

³⁴Jesu nynh, “Byaccaccing kae hopya oh, humhung zemah seinaw rya a lahpaw tuh seinaw see nynh thua.

³⁵See tuh innbyn kya zungzae um boi khyh; ccapaw tuh zungzae a um.

³⁶Tukeiccuze Ccapaw nynh ae luesah oh ze, na lue ccaccing cih oh.

³⁷Abraham ciihan nynh na thua oh cipaw tuh ka ny; thuasalama ka bya tuh nae kya umnaw a hoi khyh keiccuze kae kha chia lan nae paccynnuaku oh.

³⁸Kae tuh ka Paaw kya ka muihpaw kha ka ho; nanning tuh nae paaw nynh ae hopya oh paw kha na cyi oh,” a ci.

³⁹Minmin nynh, “Abraham tuh kae paaw nynh thua,” a cipya hae. Jesu nynh, “Nanning tuh Abraham ccaaw hae na thua oh ze, Abraham nynh a cyipaw khaw na cyihbua cih oh.

⁴⁰Atu tuh Pachia kya-e ka thaepaw byaccing kha nanning kae hopah oh paw kamaw hynh chia lan na zuaku oh; Abraham tuh hynhte cyih khyh.

⁴¹Nanning tuh nae paaw nynh a cyipaw kha na cyi oh,” a cipya hae. Minmin nynh, “Kaening tuh ohhuakunaw kyate a puipaw kae thua khyh, kaening nynh Paaw lu kheit kyalya kae hoi zah tuh-e tuh Pachia nynh thua,” a cipya hae.

⁴²Jesu nynh, “Pachia tuh nae Paaw a la thua ze, kae hynh nae sungsah cih oh; pawccecize kae tuh Pachia kyate kae thua zah atu hein kya ka um, kamaw kaw te kae thua khyh, Pachia nynh kae hynh yn saw.

⁴³Pawccemou ka bya hynh na thaethya khyh oh? Ka bya hynh na thae kho khyh oh keiccu nynh thua.

⁴⁴Nanning tuh nae paaw Satan kya-e na thua oh zah, nae paaw rynaw kha na cyi ry oh. Aning tuh atakaw lya mawte ccungccaw theihtupaw thua zah byaccing kya tyn khyh. Pawccecize amaw kya byaccing um khyh. Hynbya a ho vae ze amaw thuanaw kha nynh a ho; pawccecize aning tuh a hynpaw thua zah hynbya a paaw nynh thua.

⁴⁵Byaccing kae hopya keiccu oh nae zyn khyh oh.

⁴⁶Nanning lakuze hum nynh mou seinaw ka hoinaw kong a langsakuh kho cih? Kae nynh byaccing ka ho lanze pawccemou nae zyn khyh oh?

⁴⁷Pachia kya-e ccungccaw nynh tuh Pachia bya kha a ngae, nanning tuh Pachia kya-e na thua khyh oh keiccuze a bya kha na ngae khyh oh,” a cipya hae.

⁴⁸Judah hae nynh Jesu kha, “Nang tuh Samariapaw na thua zah raerangsaro bahkuhpaw nynh na thua cipaw hmerarih lan kae hopah khyh tou?” a cipya hae.

⁴⁹Jesu nynh, “Kae tuh raerangsaro bahkuhpaw ka thua khyh, thuasalama ka Paaw kha saw ka tua, te nanning nynh kae hynh saw nae tua khyh oh.

⁵⁰Kae tuh kamaw phu-enaw kha ka ccungkuh khyh; phu-enaw a ccungpaw lu kheit um zah aning tuh byapiatu nynh thua.

⁵¹Byaccaccing kae hopya oh, humhung zemah ka bya a zuipaw tuh chinaw tung boi vae lan khyh,” a ci.

⁵²Judah hae nynh Jesu kha, “Nang tuh raerangsaro bahkuhpaw cipaw atu kae ny. Abraham tuh a chih, profeh hae mah a chih hae; nang nynh, ‘Humhung zemah ka bya a zuipaw tuh chinaw tung boi vae lan khyh,’ na ci.

⁵³Nang tuh a chih vae paw kae paaw Abraham laeze na lesaehua tou? Profeh hae mah a chih hae; nang tuh humlangmou na riakuh?” a ci hae.

⁵⁴Jesu nynh, “Kamaw te kamaw phu-enaw ka pyaku ze, ka phu-enaw tuh accakaepaw nynh thua, phu-enaw yn pyapaw tuh ka Paaw nynh thua; nanning nynh amaw kha, ‘Aning tuh kae Pachia nynh thua,’ na ci oh.

⁵⁵Tuhzemah amaw kha na nyh khyh oh, kae tuh amaw kha ka ny; amaw kha ka nyh khyh ka ci ze, naemaw hawte mihynpaw nynh ka thua cih, thuasalama amaw kha ka nyh zah a hopaw kha ka zui.

⁵⁶Nae paaw Abraham tuh ka thua lanpaw ccyh kha myarya a ngaehoi; tuh-e tuh muih zah myarya a lungtua,” a cipya hae.

⁵⁷Judah hae nynh, “Kum sung pangaw san na cih loh leite Abraham tuh na muih vae tou?” a ci hae.

⁵⁸Jesu nynh, “Byaccaccing kae hopya oh, Abraham a um mawze kae tuh ka um vae,” a cipya hae.

⁵⁹Tetuh Jesu deihnaw lanpaw lung kha a khuingku hae; thuasalama Jesu tuh zya rekuh zah beikinn kyate po a pou.