Read Zotung Chin FILIPI 1 Bible Online

FILIPI 1 - Zotung Chin bible

FILIPI 1

¹Jesu Khri see hae Paul te Timote nynh Filipi khua um hae paw, Jesu Khri kya-e mithyaa hae balyn, pastor hae te Khriccaaw piccan hae kalan ccaw kae ky oh.

²Ah Paaw Pachia te Bawipaw Jesu Khri kyate thawccinaw te daenaw tuh nae tungvaw kya la um sah.

³Nanning kae liathui oh takyhte ka Pachia kalan lungtuabya ka ho,

⁴saw ka sang takyhte nae balyn hanlan lungtuate tyty saw ka sang,

⁵pawccecize nanning tuh atakaw te atu cia thehoypaw ryalaw kya nae bawm oh.

⁶Nanning kya ahoypaw ryalaw a thotu Pachia nynh Jesu Khri Nin a thua cia tuh-e rya tuh a ccingsah cih cite zynkunaw ka hoi.

⁷Nanning balyn konglang hynhte ka tuapaw tuh ka hanlan accanpaw nynh thua, pawccecize thehoypaw kong thong ka ccawnaw kya thuasah, thehoypaw ka thadynkhaenaw kya thuasah, thehoypaw ka tynsahnaw kya thuasah nanning balyn tuh kamaw ryte Pachia thawccinaw a neethungkuh bua hae paw na thua oh keiccu nanning tuh ka thinlung kya na um oh.

⁸Pawccecize Jesu Khri thawccinaw te nanning balyn kha pawcih baban nynh kae ngae oh cipaw Pachia tuh ka ccaekia nynh thua.

⁹Saw ka sangpaw tuh, nae kya-e sungsakunaw tuh nynaw te byakhupaw phiathyanaw balyn kya houhouh alungthung nawlan,

¹⁰ahoy huaccepaw uccaw hae kha phiathyate na nythya nawlan oh, te Khri nin kyacia athyaapaw te ccaenaw um leipaw lang na tang nawlan oh,

¹¹Pachia phu-e nawlan te thehoysah nawlan, Jesu Khri liate oun thuapaw dingnaw kya-e athae hae khate phe na bia nawlan oh saw ka sang.

¹²Uteno hae, ka tungvaw acyihkuhpaw uccaw hae tuh thehoypaw houh a pazaeku nawlan nynh acyiku cipaw kha nyh oh ci ka ry.

¹³Ou tuhte Khri keiccu thong ka ccawpaw tuh siapharan inn a rintu hae balyn te tuhlaepaw miakaw nynh a ny hae.

¹⁴Uteno hae alunghua tuh, thong ka ccaw keiccuze Bawipaw kya zynkunaw hoi hae zah, Pachia byaho lan ri leite rawthungnaw houh a hoi hae.

¹⁵Abang nynh eiungnaw te pekunaw lante Khri kong kha a ho hae, thuasalama abang nynh thinlung hoypaw te a ho hae.

¹⁶Tuhte a ho hae paw nynh kae tuh thehoypaw kha thadynkhae khylan khang ka thuapaw kha nyh hae zah sungsakunaw te a ho hae.

¹⁷Mingccang hae nynh thinlung ccaccing te thua leite, mimaw hanlan karankute, thong ka ccawnaw kya houh ka teing nawlan Khri kong kha a ho hae.

¹⁸Tuhteze pawte? Pawpawte a ho hae zemah, vawnin bya te athua zemah, thanccingte athua zemah, Khri kong tuh ho athua mamin; tuin kya kae tuh ka lungtua. Athua, ka lungtua ung cih.

¹⁹Pawccecize nanning sawsangnaw liate thuasah, Jesu Khri Muisaw bawmnaw liate thuasah tuh-e tuh ka lue nawlan yn tang cih cipaw ka ny.

²⁰Kae nynh pawpawte mah maethya leite, ka cyimae hawte myarya rawhoyte ka hiin zemah, ka chi zemah Khri tuh atu mah ka pyn kya hangthung athua zungzae cih cite kou ka ngaehoi.

²¹Pawccecize kae ka hanlan tuh, hiinnaw hynh Khri thua zah chinaw hynh amia.

²²Thuasalama pynsaw kya ka hiin ze, tuh-e tuh ka ryalaw kya-e athae nynh thua, tuhzemah pawmou ka poku cih cipaw ka nyh khyh.

²³Kae tuh tuh-e ccangning laku areihkunaw kya nynh ka um. E hiinnaw hynh cciatawte Khri ryte umkheih lan ka ry, tuh-e tuh myarya ahoy huapaw nynh thua.

²⁴Thuasalama pynsaw kya ka hiin ung lanpaw tuh nae hanlan aho huapaw nynh thua.

²⁵Tuh-e tuh ccaerarih lan ka ny keiccuze, zynnaw kya na lethung nawlan oh te nae lungtua nawlan kae tuh nanning balyn ryte ka um ung cih cipaw ka ny.

²⁶Tetuh nae kalan bua kae thua te, kae ka liate nanning tuh Khri Jesu kya houh na pookuh cih oh.

²⁷Pawpawte athua zemah, Khri thehoypaw te angaekuhpaw ziazae khate hiin oh, tuhteze nynh kamaw kae thua zah kae muih oh ze thuasah, kamaw ka um khyh zemah thuasah nanning tuh thehoypaw te asekuhpaw zynnaw hanlan tuanaw ccangkheit te na zuakuh oh zah, thinlung ccangkheit te tynkaring lan na thadyn oh cipaw ka thae cih.

²⁸Nae rhaw hae kha rih nan oh. Tuh-e tuh minmin ronaw hanlan a langsakuhpaw muihsahnaw nynh thua, thuasalama nanning hanlan tuh khumnaw nynh thua, tuh-e tuh Pachia nynh a cyipaw nynh thua.

²⁹Pawccecize Khri zyn lanpaw kyalya thua leite, Khri hanlan teingbia lanpaw kha mah aning nynh ae pyabia oh,

³⁰ka la teingpaw kha na muih vae oh zah atu na thae oh hawte ka teingpaw rhawdounaw te alokuhpaw kha na teingbua oh.