Read Zotung Chin FILIPI 2 Bible Online

FILIPI 2 - Zotung Chin bible

FILIPI 2

¹Tukeiccuze Khri kya thawzung pyakunaw ccangkhakheit, sungsakunaw kya-e ngaengannaw ccangkhakheit te Muisaw kya-e vaeccawkunaw ccangkhakheit, thawccikunaw te ngaethyaumsakunaw ccangkhakheit a um ze,

²lunglokute alokuhpaw sungsakunaw hoi biate, nawccawkheihnaw te tuanaw ccangkheit hoi biate nanning nynh ka lungtuanaw kha yn ccingsah oh.

³Karankunaw, pooku minthaan rynaw te pawsang mah cyih nan oh, ming hae kha naemaw laeze ahoy huapaw lante zakawsangsakunaw thinlung te tua oh.

⁴Nanning lu raveih nynh mawmaw thanenaw kyalya kha do leite ming hae thanenaw kha mah dobia oh.

⁵Khri Jesu kya a umpaw hynh-e tuanaw hynh nanning kya mah la um sah,

⁶Khri tuh Pachia muinsan phang a ke pite, Pachia ryte nginkunaw kha luade lante tuakuh khyh,

⁷tuhlaeze amaw a thuanaw balyn kha vua zah, see muinsan kha lawkute ccungccaw alo lante yn pui.

⁸Ccungccaw muinsan lante yn langkuh zah zakawsangsakute chinaw kyacia— vaelantung kya chi ciate heize kaw a ngae.

⁹Tukeiccuze Pachia nynh mah amaw kha kou hangthung zah min balyn laeze alesae huapaw min kha a pya,

¹⁰tukeiccuze vaawlang um hae paw, laephi vaw um hae paw te lae kaw um hae paw miakaw nynh Jesu min kya ccukharu a tung cih hae zah,

¹¹Paaw Pachia phu-enaw hanlan munglae miakaw nynh Jesu Khri tuh Bawi nynh thua, a ci cih hae.

¹²Tukeiccuze ka sungsah hae paw, ka kaw zungzae na ngae oh zah, kamaw ka um lya kyalya thua leite, atu kamaw ka um khyh lya mah kaw houh na ngae oh hawte, rawri thyngku biate naemaw khumnaw elang ryalah oh;

¹³pawccecize amaw kya-e ahoypaw eenaw kha ry khylan te cyi khylan nae lungkhu kya ryalahpaw tuh Pachia nynh thua.

¹⁴Ccohku leite, eiku leite pawpaw balyn kha cyih oh,

¹⁵tuhteze nynh a thyaruhpaw te a ccouseikuhpaw she kya ccaenaw um leipaw, seinaw a hoi leipaw, a minthu leipaw, Pachia ccaaw hae lang na tang cih oh zah, laephi kya awsi hawte tuh-e hae laku na aw cih oh.

¹⁶Hiinnaw bya kha varyng kyngkuh oh; tuhteze nynh kae tuh alakaw lan ka ccuehan khyh zah rya ka lahhan khyh cite Khri nin kya ka pookuh kho cih.

¹⁷Nae zynnaw te asekuhpaw pyapaw te silawnaw vawlan khe kamaw hynh niapaw silawnaw lante bu a la thua heize, ka lungtua zah nanning balyn ryte ka lungtua.

¹⁸Tuhawte nanning mah nae lungtua sah lah, kamaw ryte nae lungtua sah.

¹⁹Nae konglang kha he ka thae te ka ngaengan nawlan aro mawze Timote kha nae kalan saw lan Bawipaw Jesu kya ngaehoinaw ka hoi.

²⁰Aning hawte nanning thanenaw hanlan hoyte peki cih paw lu kheit san ka hoi khyh.

²¹Ming hae balyn nynh Jesu Khri hanlan tua leite mimaw hanlan nynh a tuaku hae.

²²Thuasalama ccapaw nynh paaw ryte rya a law hawte, Timote tuh kae te thehoypaw rya kae lawkheih keiccuze a ryalawnaw kha na ny oh.

²³Tukeiccuze ka konglang pawte nynh acyiku cipaw ccahe ka nyh te, amaw kha nae kalan palou saw lan ka ngaehoi,

²⁴kamaw mah aro mawze nae kalan kae thua cih cite Bawipaw kha ka doliaku.

²⁵Te Epafroditas hynh nae kalan saw aho cite ka tua, aning tuh ka neitaw, rya kae lahkheihpaw, rhaw kae doukheihpaw, ka hobounaw kya rya yn lawpahpaw, nae zeccuetu nynh thua,

²⁶pawccecize aning tuh accih cipaw na thae oh keiccuze nae balynte kou ae ngae oh zah a lungriathae.

²⁷Aning tuh vya chih lan a ccih ccaccing. Thuasalama Pachia nynh ngaethya a umsah, amaw kyalya thua leite, kae zemah ngaethyanaw ka tungchih khyh nawlan ngaethya yn umsah.

²⁸Tukeiccuze amaw kha bua na muih oh te nae lungtua nawlan te kae mah ka lungriathaenaw azyahua nawlan amaw kha thawmuinte kae saw.

²⁹Tukeiccuze Bawipaw kya amaw kha myarya lungtuate la ccou oh; te khahcihawpaw ccungccaw hae kha sawtuanaw la pya oh.

³⁰Pawccecize nanning nynh nae pya kho lei oh paw bawmnaw kha pya khylan a hiinnaw kha duaaku leite, Khri ryalaw hanlan vya a chibia.