Read Zotung Chin FILIPI 4 Bible Online

FILIPI 4 - Zotung Chin bible

FILIPI 4

¹Tukeiccuze ka lungtuanaw te ka bawilukhung na thua oh paw, ka sungsah hae zah kou ka ngae hae paw, ka uno hae, Bawipaw kya tynkaring lan thadyn oh, kou ka sungsah hae paw.

²Euodia te Syntykhe nynh Bawipaw kya tuanaw a loku nawlan hae thawte ka ngia hae.

³Alungzipaw ryalahkheihtu nang kha mah, hynh-e nopi hae hynh na bawm nawlan hae kae ngia; pawccecize minmin tuh kamaw ry, Klement ry, hiinnaw ccauh kya mih min um hae paw tuhlaepaw kae te rya kae lahkheih hae paw ryte thehoypaw rya kya ryalahtu hae nynh thua hae.

⁴Bawipaw kya nae lungtua zungzae sah. Bua kae ho hin, nae lungtua sah.

⁵Ccungccaw miakaw nynh nae lungnenaw kha nyh hae sah. Bawipaw tuh nae pe a um.

⁶Pawpaw konglang mah nae thinphang nan sah; pawpaw balyn kya lungtuabya hote, sawsangnaw te ngianaw liate na ngia ry oh paw kha Pachia nysah oh.

⁷Ccungccaw tuanaw balyn nynh a phya kho leipaw Pachia kya-e daenaw nynh Jesu Khri liate nae thinlung te nae tuanaw kha ae khynsah cih oh.

⁸Nyathyakou lang uteno hae, ahmepaw, sawtua lan umpaw, adingpaw, athyaapaw, ry lan umpaw, thehoysah lan umpaw; ccangkhakheit tuh aphute lanze, thehoysah lan angaeku lanze tuh-e hae tuh nae thinlung kya la tua oh.

⁹Kamaw kyate na ccangku oh paw, na lawku oh paw, na thae oh paw te na muih oh paw kha la cyih oh, te daenaw Pachia tuh nae kya a um cih.

¹⁰Kamaw nae do-oihnaw oh kha atu nyathya kya bua na langsakuh oh zah Bawipaw kya myarya ka lungtua; thanccingte, kamaw do-oih rynaw na la hoi oh salamah, ccyhhoypaw na la mue khyh oh.

¹¹Ka hobou keiccuze ka hopaw thua khyh, pawccecize kae tuh pawcihawpaw kya ka um zemah lungccingkhaeku lan phe ka ccangku vae.

¹²Ryachinaw kya hiinzia ka thya zah hoirumnaw kya hiinzia ka thya; vueso zemah, vuelaw zemah, hoirum zemah, ryachi zemah teitei balyn kya te atyn-are kya umzia byaphi kha ka ccangkuh vae.

¹³Thawzung yn pyatupaw Khri liate pawpaw balyn ka cyih kho.

¹⁴Thuasalama ka vawsawnaw kha neethungkubua te kou hoy lan na cyi vae oh.

¹⁵Thehoypaw honaw ka thotakaw lyaze, Mesidonia ram kyate he ka pou lya kha, ahlu pyanaw te muenaw kya nanning holeite pawpaw khriccaawbuu mah yn bawmpaw um khyh cipaw kha nanning Filipi hae nynh hoyte na ny oh.

¹⁶Pawccecize Thesalonika khua ka um lya heize, ka hanlan ahoboupaw bawmnaw kha vaekheit lae alung lan nae ky oh.

¹⁷Lasung kha ka ccungkupaw thua khyh, na ccykunaw oh ccazing kya amia kha nynh kae ccungpya oh.

¹⁸Kae tuh phe beih lan nae pya oh zah azaw laelan ka hoi; amynkhuhpaw, Pachia lungrytungsahpaw, douccahpaw silawkunaw athuapaw, nae ky oh paw lasung hae kha Epafroditas kyate ka mue zah phe beih lan ka hoi.

¹⁹Te ka Pachia nynh a phu-enaw kya a hoirum thyhte nae hanlan ahoboupaw miakaw kha Khri Jesu liate ae ccingsahpah cih oh.

²⁰Ah Paaw Pachia tuh zungzae te zungzae cia a phu-e sah. Amen.

²¹Khri Jesu kya umpaw mithyaa hae balyn kha la beihlang oh. Kamaw te kae umkheihpaw uno hae nynh nanning kha ae beihlang oh.

²²Mithyaa hae balyn nynh ae beihlang oh, abyapi lante Sizar siapharan inn kya um hae paw nynh ae beihlang oh.

²³Bawipaw Jesu Khri kya-e thawccinaw tuh nae balyn kya la um sah. Amen.