Read Zotung Chin KOLOSE 2 Bible Online

KOLOSE 2 - Zotung Chin bible

KOLOSE 2

¹Nanning hanlan thuasah, Laodisia khua kya um hae paw hanlan thuasah, ka mae yn muih boi leipaw balyn hanlan thuasah pawcih zuakute mou rya ka law cipaw kha nysah kae ry oh.

²Minmin nynh Pachia kya-e byakhupaw athuapaw Khri amaw ccaccei kha ccaerarih lan thaethya hae zah hoyte a ny nawlan hae, sungsakunaw kya sueluakuh hae zah mih thinlung tuh thawzung pya athua nawlan ka ry,

³hawnaw sisua hae te nynaw sisua hae balyn tuh Khri kya thuruh athua.

⁴Hum ccungccaw nynh san soihpaw bya hae te nanning kha ae ling khyh nawlan oh e hynh kae hopya oh.

⁵Pawccecize kae tuh pynsaw lante nae kya ka umbua khyh zemah muisaw lante nae kya ka um. Nanning nynh angaekuh lante na cyi oh paw te Khri kya nae zynnaw a tynpaw kha ka muih zah ka lungtua.

⁶Tukeiccuze nanning nynh Khri Jesu Bawipaw kha phe na lawku vae oh hawte, amaw kya hiin ccavae oh.

⁷Amaw kya tharui saw oh lah tynsakuh thung oh, ccangpya na thua vae oh hawte, zynnaw kya tyn oh lah lungtuabya patae ho oh.

⁸Khri ccangpyanaw thyhte thua leite, ccungccaw phung thyhte zui zah vaawlui te laephi uktu muisaw hae thyhte a zuipaw laephi thyahawnaw te accakaepaw lingkunaw khate hum nynh sanmah ae ro khyh nawlan oh la raeringkuh oh.

⁹Pawccecize Pachia thuanaw accingpaw balyn tuh Khri kya pynsaw lante a um.

¹⁰Kawhoinaw te uktu balyn kyaze lu athuapaw amaw liate nanning tuh na ccing oh.

¹¹Khri kya-e vingdungawkunaw liate chiisaw te asekuhpaw pyn kha khahkute, kuih te rae leipaw vingdungawkunaw khate nanning mah amaw kya vingdungaw na thua oh.

¹²Baptisma innaw kya Khri ryte uubua na thua oh. Khri kha chinaw kyate a thoosahpaw Pachia thungnaw kha zynnaw liate amaw ryte na thoothui bua oh.

¹³Seinaw te nae pynsaw vingdungawku leinaw kya na chih oh paw nanning kha Pachia nynh Khri ryte pynkheihlan ae hiinsah oh, ah seinaw balyn kha oun ngaethya.

¹⁴Aening oun rawsepaw laebah ccazing te a lungkhu umpaw phunglang hae kha vaelantung kya khiadete marya a the vae.

¹⁵Uktu hae te kawhoitu hae kha vua hae zah tuh-e hae tuh zapi malang langsahte vaelantung liate a tae hae.

¹⁶Tukeiccuze aenaw te nianaw, athyaapaw nin hae sungnaw, sawpaw adiapaw hae sungnaw, sabbath nin hae sungnaw te asekuh lante hum nynh san bya ae la pia nan oh sah.

¹⁷Tuh-e hae tuh yn thua cih paw uccaw hae kya-e mynlyh nynh thua hae; thuasalama accaccingpaw tuh Khri nynh thua.

¹⁸Ahme leipaw zakawsangsakunaw kya te vaaw hae beikpaw kya a lungrythuapaw hum nynh san thethya ae la ho nan oh sah; tuh-e paw tuh amaw a tuanaw khate accakaepaw kya a tansakuhpaw, a muihpaw vizin hae kha phang kyngkuh zah,

¹⁹lu athuapaw Khri kha varyng a kyngkuh leipaw nynh thua. Lu kyate pyn balyn tuh kua thua zah rukhua atungkunaw hae kyate pynkheihlan a khelekuh hae, Pachia kya-e lethungnaw te a lethung hae.

²⁰Nanning tuh Khri ryte vaawlui te laephi uktu atakaw e muisaw hae kyate na chi vae oh athua lanze, pawccemou laephi te asekuh hae paw hawte na hiin oh?

²¹Pawccemou, “Hae nan, taangtua nan, ty nan,” a ci hae paw phung hae kha na zui oh?

²²Tuh-e phung hae balyn tuh ccungccaw kawbya hae te ccangpyanaw hae kyalya thua zah, mang lalia te a zo cih hae paw nynh thua.

²³E hae tuh mawtemaw raekupaw beiknaw, ahme leipaw zakawsangsakunaw te pyn kha pawlangria leinaw kya hawnaw langkunaw a hoi ccaccing; thuasalama pynsaw duaanaw sungkunaw kya ccungkianaw um khyh.