Read Zotung Chin KOLOSE 3 Bible Online

KOLOSE 3 - Zotung Chin bible

KOLOSE 3

¹Nanning tuh Khri ryte phe na thoothui bua vae oh athua ze, Pachia ranglang Khri haungnaw kya umpaw vaawlang e uccaw hae kha ccung oh.

²Nae tuanaw kha vaawlang e uccaw hae kya nung oh, laephi uccaw hae kya nung nan oh.

³Pawccecize nanning tuh na chih oh zah nae hiinnaw tuh Khri ryte Pachia kya thuruh athua.

⁴Aening hiinnaw athuapaw Khri he yn langkuh te, nanning mah phu-enaw kya amaw ryte nae langkuh bua cih oh.

⁵Tukeiccuze ohhuakunaw, nungsikunaw, sungku kho leipaw rynaw, ahoy leipaw duaanaw, zohtuh beiknaw athuapaw karankunaw cikuh hae paw, nae lungkhu umpaw laephi te asekuhpaw miakaw kha chisah oh.

⁶Tuhcihawpaw uccaw hae keiccu nynh Pachia thinrianaw tuh kawngae lei hae paw tungvaw kya a thua.

⁷Tuh-e hiinnaw kya na la hiin lya oh tuh nanning mah langmawlya tuh-e laanpi hae tuh na la zui oh.

⁸Thuasalama atu hynh-e hae balyn—thinrianaw, bungpawnaw, thinlung hoy leipaw, thethya honaw, nae khalang kyate anungsikuhpaw bya hopaw kha la vua oh.

⁹Lu kheit te lu kheit hynpakuh nan oh, pawccecize ccungccaw rynpaw te a cyisahnaw kha phe na vua vae oh.

¹⁰Amaw a raetupaw muinsan thyhte, nynaw kya thawsah thui athuapaw ccungccaw thawpaw khate phe na ccaankuh vae oh.

¹¹Tuh-e thawsahthuinaw kya Grik ci um khyh, Judah ci um khyh, vingdungawkuhpaw ci um khyh, vingdungawkuh leipaw ci um khyh, angaeepaw ci um khyh, Sithian ccungccaw ci um khyh, see ci um khyh, a luepaw ci um khyh; Khri tuh pawpaw tynre thua zah pawpaw tynre kya balyn a um.

¹²Nanning tuh Pachia nynh a popaw, athyaapaw te sungsahpaw na thua oh hawte, ngaethyaumsahnaw, thawccikunaw, zakawsangsakunaw, lungnenaw, lungsaenaw khate ccaankuh oh.

¹³Lukhakheit nynh mingccangpaw tungvaw lungccing leinaw a hoi ze, lu kheit te lu kheit ngaesangpyakute ngaethyakuh oh; Bawipaw nynh ae ngaethya vae oh hawte, lu kheit te lu kheit ngaethyakuh oh.

¹⁴Hynh-e hae balyn laelan, accingpaw lunglokunaw liate pawpaw balyn a sueluapaw sungsakunaw khate ccaankuh oh.

¹⁵Khri kya-e daenaw nynh nae thinlung kha ae la uk oh sah; tuh-e daenaw elang nynh nanning kha pyn pynkheit kya um lan ko na thua oh; te lungtuabya hothya oh.

¹⁶Khri bya tuh nae kya phe beih lan la um sah; lu kheit te lu kheit hawnaw tynre te ccangpyakute raeringnaw pyakuh oh; nae thinlung kyakhe lungtuanaw thinlung te sam hlaw hae, thehoynaw hlaw hae te muisaw hlaw hae kha Pachia kalan sah oh.

¹⁷Na cyi oh paw miakaw kha bya na ho oh zemah, ryalaw na law oh zemah Bawipaw Jesu min liate pawpaw balyn kha cyih oh lah, amaw liate Paaw Pachia kalan lungtuabya ho oh.

¹⁸Zu hae, Bawipaw kya angaekuhpaw athua hawte nae vawpaw hae kaw kha ngae oh.

¹⁹Vawpaw hae, nae zu hae kha sungsah oh lah, minmin kya reisakuh nan oh.

²⁰Ccaaw hae, pawpaw kya balyn nae nung nae paaw hae kaw la ngae oh, pawccecize tuh-e tuh Bawipaw lungrypaw nynh thua.

²¹Paaw hae, nae ccaaw hae kha thinriasah nan oh, mih lung oun rohsei cih.

²²See hae, pawpaw kya balyn laephi vaw e nae bawi hae kaw kha la ngae oh, mih lungrythuasah khylan te mit te muihbianaw kyalya thua leite Pachia rawrite, thinlung balynte mih kaw la ngae oh.

²³Ccungccaw hae rya a lahpaw hawte thua leite, Bawipaw rya a lahpaw hawte pawpaw na cyi oh zemah thinlung ccaccingte cyih oh.

²⁴Nae ryalaw mee rho uccaw kha Bawipaw kyate na mue cih oh cipaw kha nyh oh; pawccecize Khri Bawipaw rya nynh na law oh.

²⁵Ahoy leipaw rya a lahpaw tuh a lawpaw hoyleinaw hanlan pyaru athua cih; maedo ci um khyh.