Read Zotung Chin JOSHUA 10 Bible Online

JOSHUA 10 - Zotung Chin bible

JOSHUA 10

¹Joshua nynh Jeriko khua te a siapharan tungvaw a cyi hawte, pawtemou Ai khua kha lah zah, Ai khua te a siapharan kha marya a ro cipaw kha thuasah, pawtemou Gibeon khuaccaaw hae nynh Israel hae ryte ccawkunaw rae hae zah minmin kya a umbua hae cipaw kha thuasah, Jerusalem[4] siapharan Adonizedek nynh he a thae tuh,

²myarya a rih, pawccecize Gibeon tuh siapharan khua khuakheit hawte khua lepaw thua zah Ai khua laeze mah alehua, khua kya-e pise hae balyn tuh arawthungpaw ccungccaw hae nynh thua hae.

³Tukeiccuze Jerusalem siapharan Adonizedek nynh Hebron siapharan Hoham, Jarmuth siapharan Piram, Lakhish siapharan Jafia te Eglon siapharan Debir kha byataw hae zah,

⁴“Ka kalan oun cceih oh lah, yn bawm oh, Gibeon kha tuk oh sih; pawccecize aning nynh Joshua te Israel hae ryte ccawkunaw a rae vae hae,” a cipya hae.

⁵Tetuh Amor hae siapharan lu pangaw—Jerusalem siapharan, Hebron siapharan, Jarmuth siapharan, Lakhish siapharan te Eglon siapharan hae nynh—mih rhawkaw hae kha pum hae zah mih rhawkaw hae balyn ryte Gibeon khua kha ryahmin tahnuakute a tuk hae.

⁶Te Gibeon hae nynh Gilgal ryahmin kya umpaw Joshua kalan ccungccaw saw hae zah, “Na ryalahtu kaening hynh oun vua nan; arangte beih yn cceihthung, oun bawmtua lah oun khumtua; pawccecize mua vaw kya khuasah hae paw Amor hae siapharan balyn nynh oun pumnuaku vae hae,” a cipya hae.

⁷Tukeiccuze Joshua tuh rhawkaw hae balyn, athungpaw mih rawhoy hae paw balyn ryte Gilgal kyate a cceihthung hae.

⁸BAWIPAW nynh Joshua kyakhe, “Minmin kha rih nan hae, pawccecize minmin kha na kuih kya kae pya vae; na malang lu kheit san thadyn kho lan khyh hae,” a cipya.

⁹Tukeiccuze Joshua tuh Gilgal kyate zidae cceihthung zah, vaekheitmawte a tuk hae.

¹⁰Te BAWIPAW nynh minmin kha Israel hae malang siisakute ccuesah hae zah, Gibeon kyakhe patae a chia hae, Beth-horon khua te cciathungnaw laanpi kalan khe dee hae zah Azekah te Makkedah khua kyacia po a chia hae.

¹¹Te Israel hae malang ccue hae zah, Beth-horon khua hary apannaw kya a cciabung lya hae khe, BAWIPAW nynh Azekah khua cia vaawlang te lungtungpi sawphu hae zah a chih hae; Israel hae nynh thaloi te a chia hae paw laeze hya keiccuze a chih hae paw tuh alunghua.

¹²BAWIPAW nynh Amor hae kha Israel hae kya a pya nin hae khe, Joshua nynh Israel hae muihnaw kyakhe BAWIPAW kha hynhte a hopya, “Khuanin, Gibeon khua kya phang thadyntua, Sawpaw, Aijalon accya kya phang thadyntua,” a ci.

¹³Israel hae nynh mih rhaw hae kha phu a lawru makhia hae, khuanin tuh tyty um zah, sawpaw tuh a thadyn. E hynh Jashar ccauh kya azeikuh khaw? Khuanin tuh vaawlui ngaelung kya thadyn zah, nin kheit loukaw ccaw leite a um.

¹⁴Tuin nin hawte BAWIPAW nynh ccungccaw bya a ngaepya nin tuh um boi khyh zah malang ccyh kya mah um vae khyh; pawccecize BAWIPAW nynh Israel hae elang rhaw a tukpya hae.

¹⁵Tukoute Joshua te Israel hae tuh Gilgal umpaw mih ryahmin lang a ki hae.

¹⁶E siapharan lu pangaw hae tuh ccue hae zah Makkedah lungkarung kya a rekuh hae.

¹⁷“Makkedah lungkarung kya a rekuh hae paw siapharan lu pangaw hae kha muih athua vae hae,” cite Joshua kha a hopya hae.

¹⁸Joshua nynh, “Lungkarung akhu rae kalan khe lungtungpi hae kha tounua oh lah, a pepan kya minmin a ngawtu hae kha nung oh;

¹⁹thuasalama naemaw tuh tuin kya um nan oh; nae rhaw hae kha deehui oh lah, mih nulang te tuk oh. Mih khua lang teesah nan oh, pawccecize BAWIPAW nae Pachia nynh minmin kha nae kuih kya ae pya vae oh,” a cipya hae.

²⁰Joshua te Israel hae nynh minmin kha a thang makhia hae cia, patae a theih kou hae te, te a hiinhy hae paw tuh akoihkuhpaw khua lungkhu lang he a tee hae te,

²¹ccungccaw hae balyn tuh Makkedah ryahmin kya umpaw Joshua kalan khe khyndadyh lan a ki hae; humhung nynh mah Israel ccungccaw lukhakheit kha rawsete byakhung ngan khyh hae.

²²Te Joshua nynh, “Lungkarung akhu kha hung oh lah, siapharan lu pangaw hae kha lungkarung kyate ka kalan oun poukhae oh,” a cipya hae.

²³Tuhcite cyih hae zah, Jerusalem siapharan, Hebron siapharan, Jarmuth siapharan, Lakhish siapharan te Eglon siapharan, tuh-e siapharan lu pangaw hae tuh lungkarung kyate amaw kalan a poukhae hae.

²⁴Te tuh-e siapharan hae kha Joshua kya a thuakhae hae tuh, Joshua nynh Israel hae balyn kha ko hae zah, amaw ryte a cceihkheih hae paw rhawbawi hae kyakhe, “Oun naekuh oh lah, e siapharan hae nging kyahin nae ccu kha khang oh,” a cipya hae. Tetuh minmin nynh naekuh hae zah mih ccu kha siapharan hae nging kya a khang hae.

²⁵Te Joshua nynh minmin kha, “Rih nan oh, nae bungzou nan sah; nae thawsaesakuh oh lah, nae rawthungsakuh oh; pawccecize na tuk oh paw rhaw hae balyn tungvaw kya BAWIPAW nynh hynhcite a cyih cih,” a cipya hae.

²⁶Tukoute Joshua nynh bua hae zah a chia hae, te thingku ku pangaw kya a sae hae. Zete cia thingku kya a sae hae.

²⁷Khuanin yn ccah te, Joshua nynh kawpya hae zah, thingku kyate sahbung hae zah a rekunaw hae lungkarung kalan a vua hae, lungkarung khurae kyakhe lungtungpi hae kha a nungkhaw hae, tuh-e tuh atunin cia a um.

²⁸Tuin nin khe Joshua nynh Makkedah khua kha lah zah, tuh-e khua te a siapharan kha thaloi te a bae hae; khua lungkhu umpaw ccungccaw balyn kha lu kheit san a laehy lei lan ciate khaleih a ro hae. Jeriko siapharan tungvaw a cyi hawte Makkedah siapharan tungvaw kya mah a cyi.

²⁹Te Joshua tuh Israel hae balyn ryte Makkedah kyate Libnah lang po sulue hae zah Libnah khua kha a tuk hae.

³⁰BAWIPAW nynh Libnah khua te mih siapharan kha mah Israel hae kuih kya a pya hae; tuh-e khua kha thaloi te bae zah, khua lungkhu umpaw ccungccaw balyn kha lu kheit san a laehy lei lan a bae hae; Jeriko siapharan tungvaw a cyi hawte Libnah siapharan tungvaw kya mah a cyi.

³¹Joshua tuh Israel ccungccaw hae ryte Libnah kyate Lakhish khua lang cceih hae zah, khua kha koihlute a tuk hae.

³²BAWIPAW nynh Lakhish khua tuh Israel hae kuih kya a pya hae, nin ningnaw nin khe khua kha lah zah, Libnah khua kya a cyi hawte, khua lungkhu umpaw ccungccaw balyn kha thaloi te a bae hae.

³³Te Gezer siapharan Horam tuh Lakhish khua kha bawm lan yn cceih; Joshua nynh Horam te a ccungccaw hae kha ahiinpaw lu kheit san um lei lan a chia hae.

³⁴Joshua tuh Israel hae balyn ryte Lakhish kyate Eglon lang sulue hae zah, khua kha koihlute a tuk hae;

³⁵tuin nin khe khua tuh lah hae zah thaloi te a bae hae, Lakhish tungvaw kya a cyi hawte, tuin nin khe khua lungkhu umpaw ccungccaw balyn kha khaleih a ro hae.

³⁶Tukoute Joshua tuh Israel hae balyn ryte Eglon kyate Hebron khua langkhe cceihthung hae zah a tuk hae;

³⁷Hebron kha lah hae zah mih siapharan te khua pepan e khua hae te tuin khua kya umpaw ccungccaw balyn kha thaloi te a bae hae; Eglon tungvaw a cyi hawte, lu kheit san haang leite bae hae zah, khua lungkhu umpaw ccungccaw balyn kha khaleih a ro hae.

³⁸Te Joshua tuh Israel hae balyn ryte Debir langkhe ki hae zah a tuk hae,

³⁹Debir siapharan te a pepan e khua hae balyn kha a law hae; minmin kha thaloi te bae hae zah, khua lungkhu umpaw ccungccaw balyn kha lu kheit san a laehy lei lan khaleih a ro hae; Hebron tungvaw a cyi hawte thuasah, Libnah te mih siapharan tungvaw a cyi hawte thuasah Debir te mih siapharan tungvaw kya mah a cyi hae.

⁴⁰Tuhcite Joshua nynh ram pynpi kha thuasah, muaram te Negeb ram kha thuasah, laephi anenaw ram te laephi hary apannaw ram hae te mih siapharan hae balyn kha thuasah a tae hae; BAWIPAW , Israel Pachia nynh kaw a pya thyhte, lu kheit san a laehy lei lan, ahysuepaw balyn kha khaleih a ro hae.

⁴¹Joshua nynh minmin kha Kadesh-barnea kyate Gaza kyacia, Goshen ram abalynte Gibeon khua kyacia a tae hae.

⁴²BAWIPAW , Israel Pachia nynh Israel hae hanlan rhaw a tuk keiccuze, Joshua nynh hynh-e siapharan hae balyn te mih ram kha vae kheit te marya a law hae.

⁴³Te Joshua tuh Israel hae balyn ryte Gilgal umpaw ryahmin langkhe a ki hae.