Read Zotung Chin JOSHUA 11 Bible Online

JOSHUA 11 - Zotung Chin bible

JOSHUA 11

¹E konglang hynh Hazor siapharan Jabin nynh he a thae tuh, Madon siapharan Jobab, Shimron siapharan, Akhshaf siapharan,

²thahlang muaram kya um hae paw siapharan hae, Khinneroth alia lang e Arabah kya um hae paw siapharan hae, laelung anenaw um hae paw siapharan hae, niccaw lang e Nafoth-dor kya um hae paw siapharan hae,

³nithua lang te niccaw lang um hae paw Kanaan hae, muaram kya um hae paw Amor hae, Hit hae, Periz hae, Jebus hae, Mizpah ram Hermon mua kaw kya um hae paw Hiv hae kha bya a taw hae.

⁴Tuh-e siapharan hae tuh, milu lante rili kin e laesia zeih cih hae paw mih rhawkaw hae balyn te myarya lungpaw marang hae te marangle hae ryte oun pou hae.

⁵E siapharan hae balyn nynh mih rhawkaw hae kha sueluate oun cceih hae zah, Israel hae kha dou khylan Merom tuili pe khe pynkheihlan a rya hae.

⁶Te BAWIPAW nynh Joshua kyakhe, “Minmin kha rih nan hae, pawccecize awkhualan atu ccyh kya mih balynte phe chiate Israel hae kya ka pya cih hae; mih marang hae kha mih ccukantho na bae cih oh zah, mih marangle hae kha maee te na soi cih oh,” a cipya.

⁷Tukeiccuze Joshua nynh a rhawkaw hae balyn ryte Merom tuili pe khe vaekheihmawte thuanua hae zah a tuk hae.

⁸Te BAWIPAW nynh minmin kha Israel hae kuih kya a pya hae, minmin kha tuk hae zah Sidon Lepaw te Misrefoth-maim kyacia, te nithua lang Mizpah accya kyacia a deehui hae. Lu kheit san hiin leite a chia hae.

⁹BAWIPAW nynh kaw a pya thyhte Joshua nynh mih tungvaw a cyi; mih marang hae ccukantho kha bae zah, mih marangle hae kha maee te a soi.

¹⁰Tuh ccyh lyakhe Joshua nynh nulang ki zah Hazor khua kha a law, te mih siapharan kha thaloi te a chia. Tuh-e ccyh maw lyaze Hazor tuh tuh-e peenaw hae balyn kya lu nynh thua.

¹¹Hazor khua kya um hae paw balyn kha thaloi te bae hae zah khaleih a chia hae; ahiinpaw lu kheit san um khyh, Hazor khua kha maee te phe a soi.

¹²Te BAWIPAW ryalahtu Moses nynh kaw a pya thyhte, tuh-e siapharan hae kya-e khua hae balyn te mih siapharan hae kha Joshua nynh a law hae, thaloi te theih hae zah khaleih a ro hae.

¹³Thuasalama Joshua nynh maee te a soipaw Hazor khua laelan, mua vawlan umpaw khua hae kha tuh Israel hae nynh maee te soi khyh hae.

¹⁴E khua hae kya-e luadepaw uccaw hae balyn te sahiin-awvaw hae kha Israel hae nynh mimaw elang a lawku hae; thuasalama ccungccaw hae balyn kha tuh a chi kou makhia hae, thaloi te theih hae zah ahiinpaw lu kheit san um lei lan marya a chia hae.

¹⁵BAWIPAW nynh a ryalahtu Moses kha kaw a pya thyhte, Moses nynh Joshua kha kawpya pathy zah, Joshua nynh tuhcite a cyi; BAWIPAW nynh Moses kya kaw a pyapaw balyn kha a cyi leipaw um khyh.

¹⁶Tuhcite Joshua nynh tuh-e ram hae balyn kha a law: muaram, Negeb hae balyn, Goshen ram hae balyn, laelung anenaw, Arabah, Israel kya-e muaram te laelung anenaw ram,

¹⁷Seir lang a kaethungpaw Halah Mua kyate Hermon Mua kaw e Lebanon accya kya umpaw Baal-gad kyacia a law hae. Te Joshua nynh mih siapharan hae balyn kha a kyng hae, te tuk hae zah a chia hae.

¹⁸Joshua tuh tuh-e siapharan hae ryte khaw cia rhaw a tukkuh hae.

¹⁹Gibeon khua kya um hae paw Hiv hae holeite, Israel hae ryte daenaw a rae hae paw khua khuakheit san um khyh; khua abalyn mawte tuk hae zah a law hae.

²⁰Pawccecize BAWIPAW nynh Moses kha kaw a la pya thyhte, tuh-e minphuin hae kha thawcci leite khaleih ro athua nawlan hae, Israel hae kha tuk khylan ccianua lan ciate mih lungkhungpaw tuh BAWIPAW maw nynh a cyipaw nynh thua.

²¹Tuh ccyh lyakhe Joshua nynh yn cceih zah Anak hae kha muaram, Hebron khua, Debir khua, Anab khua, te Judah kya-e muaram hae balyn, Israel muaram hae balyn kyakhe khaleih a maemih hae; Joshua nynh minmin kha mih khua mawte khaleih a robia hae.

²²Israel hae ram kya Anak hae lu kheit san um vae khyh hae; Gaza khua, Gath khua te Ashdod khua kya tuh abang a um ung hae.

²³Tuhcite BAWIPAW nynh Moses a la hopyapaw balyn thyhte, Joshua nynh ram pynpi tuh a law; Joshua nynh Israel hae kha mih phin raveihte rho lang nee hae zah a pya hae. Te ram tuh rhawtuk adae vae.