Read Zotung Chin JOSHUA 2 Bible Online

JOSHUA 2 - Zotung Chin bible

JOSHUA 2

¹Te Nun ccapaw Joshua nynh pise hae lu ning kha Shittim khua kyate dophitu lang aruh lante saw hae zah, “La cceih oh lah, ram kha la dotua oh, abyapi lante Jeriko khua kha la do oh,” a cipya hae. Tukeiccuze cceih hae zah a min Rahab cikuhpaw ohhuanung inn kya tee hae zah a rya hae.

²Te Jeriko siapharan kyakhe, “Ram kha dophi khylan Israel hae abang tuh atu zete oun thua hae,” cite a hopya hae.

³Te Jeriko siapharan nynh Rahab kalan ccungccaw saw hae zah, “Na kalan oun thua hae zah na inn kya oun tee hae paw ccungccaw hae kha oun poukhae hae; pawccecize ram pynpi hynh dophi khylan nynh oun thua hae,” cite a hosahpya hae.

⁴Thuasalama Rahab nynh tuh-e pise hae lu ning kha ko hae zah a thuruh kou hae te, “Ka kalan pise lu ning oun thua ccaccing hae, thuasalama tei langte nynh oun thua hae cipaw ka nyh khyh.

⁵Amoh takaw koikua khaw ccyh khe nynh minmin tuh a pou hae. Teilang nynh a ccia hae cipaw ka nyh khyh. Arangte la deehui oh, phe na phah kho oh,” a cipya hae.

⁶Thuasalama Rahab nynh minmin kha innccuvaw lang kaekhae hae zah, innccuvaw kya a phaepaw buri ku hae kyakhe a thuruh hae.

⁷Tukeiccuze ccungccaw hae nynh Jordan vaw lang cceihpaw laanpi kya vaw zuanaw kyacia a deehui hae. A deehuitu hae he a cceih kou hae te, koikua kha a khaw hae.

⁸Minmin a i maw hae khe, Rahab nynh innccuvaw lang kae zah,

⁹minmin kyakhe, “BAWIPAW nynh e ram hynh ae pya vae oh cipaw kha thuasah, nanning raw kha eih kae ri keiccuze ram lungkhu um hae paw balyn tuh nae malang a thyngkuh hae cipaw kha thuasah ka ny.

¹⁰Izip ram kyate he na pou oh te, BAWIPAW nynh nae malang khe Rili Se a rousah cipaw kha thuasah, Jordan khuraw lang umpaw Amor hae siapharan lu ning Sihon te Og kha marya na ro oh cipaw kha thuasah kae thae vae.

¹¹Te tuh-e tuh he kae thae takaw te, kae bung tuh thyngkuh zah, nanning keiccuze kaening lu kheit kya sanmah rawthungnaw um vae khyh, BAWIPAW nae Pachia tuh ahangnaw vaaw te anenaw laephi kya Pachia ccaccing nynh thua.

¹²Tukeiccuze nae tungvaw thawccinaw ka hoi hawte, nanning nynh mah ka innbyn tungvaw kya thawccinaw na hoiru nawlan oh, BAWIPAW min te bya yn kinpakuh oh.

¹³Ka nung te ka paaw, ka raee hae te ka uno hae, minmin te asekuh hae paw balyn kha na haang oh zah, chinaw kyate kae hiinnaw nae luesah nawlan oh, ahmepaw muihsahnaw kha yn pya oh,” a cipya hae.

¹⁴Te minmin nynh Rahab kha, “Kae hiinnaw tuh nang na hanlan thua vae sah! E kae ryalaw hynh na ho khyh zetuh, BAWIPAW nynh e ram hynh he oun pya te, na tungvaw thawccinaw te lungzinaw kae hoi cih,” a cipya hae.

¹⁵Te Rahab nynh minmin kha thanlan-aw kyate liarui te laekhu lang a sawbung hae, pawccecize a inn tuh khuapi koihnawpaw khualungrua pe khe um zah, amaw tuh khualungrua lungkhu lang te nynh a um.

¹⁶Aning nynh minmin kha, “Ae deehui oh paw nynh ae phya khyh nawlan oh, mua lang la ccue oh. Ae deehui oh paw a ki mawlaezung hae, nin thum cia tuin kya rekuh oh, tukoute tuh po na cceih kho vae oh,” a cipya hae.

¹⁷Minmin nynh amaw kha, “Na kya thyalawkute bya nae kinsakupaw e byakinnaw kyate kae lue nawlan,

¹⁸e ram lungkhu lang he kae tee te, kaening nae sawbungnaw thanlan-aw kyakhe e liarui asepaw hynh na la khiide cih zah, na inn kyakhe na nung te na paaw, na raee hae te na innbyn hae balyn kha na la pum cih hae.

¹⁹Nanning laku e lukhakheit nynh na inn thuakaw kyate laanpi lang pou zah a chi lanze, amaw tungvaw accah cih zah, kaening tuh seinaw hoi leipaw kae thua cih; thuasalama na inn lungkhu kya na umkheih oh paw lukhakheit tungvaw kya kuihsaw thua zah a chi lanze, kaening tungvaw accah cih.

²⁰Thuasalama e kae ryalaw hynh nae ho lanze, na kya thyalawkute bya nae kinsakupaw e byakinnaw kyate kae lue cih,” a cipya hae.

²¹Te Rahab nynh, “Nae bya thyhte thua vae sah,” a cipya hae. Aning nynh minmin kha cciasah hae zah a cceih vae hae; te aning nynh liarui asepaw kha thanlan-aw kya a khii.

²²Te minmin tuh mua langkhe cceih hae zah, a deehuitu hae a ki mawlaezung hae tuin kya nin thum a um hae; a deehuitu hae nynh laanpi takyh kya ccung hae zah paw sanmah muih khyh hae.

²³Tetuh pise hae lu ning tuh mua langte bua oun rungbung hae. Vaw kha po zua hae zah Nun ccapaw Joshua kya a thua hae te, mih kya acyihkuhpaw balyn kha a hopya hae.

²⁴Minmin nynh Joshua kyakhe, “BAWIPAW nynh ram pynpi tuh aening kuih kya oun pya ccaccing vae; tuhpiaze ram lungkhu um hae paw balyn tuh aening keiccuze a rih vae hae,” a cipya hae.