Read Zotung Chin JOSHUA 7 Bible Online

JOSHUA 7 - Zotung Chin bible

JOSHUA 7

¹Thuasalama pya vae paw uccaw kyakhe Israel hae tuh lungzinaw hoi khyh hae: Judah phin hae kya-e Zerah ccapaw Zabdi ccapaw Karmi ccapaw Akhan nynh pya vae paw uccaw abang kha a law; te Israel hae tungvaw kya BAWIPAW thinrianaw tuh maee lang arua.

²Joshua nynh Jeriko kyate Bethel nithua lang, Beth-aven pe umpaw Ai khua langkhe ccungccaw hae kha saw hae zah, “La cceihthung oh lah, ram kha la dophitua oh,” a cipya hae. Te ccungccaw hae nynh cceihthung hae zah, Ai khua kha a dophi hae.

³Te Joshua kalan ki hae zah, “Ccungccaw balynte cciathung ho lan khyh; milu thong ning thong thum loukaw maw te cceih hae sah lah, Ai kha la tuk hae sah. Minmin tuh eih azya hae keiccuze ccungccaw balynte mih thawbangsah nan hae,” cite a hopya hae.

⁴Tukeiccuze ccungccaw thong thum han tuh cceihthung hae zah, Ai khua e ccungccaw hae malang khe a ccue vae hae.

⁵Ai khua e ccungccaw hae nynh sung thum lu taruh a chia hae, khua koikua atolang te Shebarim kyacia dee hae zah hary apannaw kyakhe a chia hae. Te ccungccaw hae balyn tuh myarya rih hae zah mih rawthungnaw phe zo.

⁶Tetuh Joshua nynh a boeining kha seii zah BAWIPAW byakin thingkua malang khe Israel piccan hae ryte zete cia laekhu kya a bakhung hae; mih lu kya vuiping a phingku hae.

⁷Te Joshua nynh, “Ezou, BAWIPAW Pachia! Kaening hynh Amor hae kuih kya pyate ro khylan, pawccemou e ccungccaw hae hynh Jordan khuraw lang na zuakhae hae? Jordan khuraw kya khuasah lan kha kae lung la ccingkhaekuh sah lah ze!

⁸Pou Bawipaw, Israel hae nynh mih rhaw hae malang te nulang ki vae hae zah, pawmou ka ho kho vae cih!

⁹Kanaan hae te e ram kya um hae paw balyn nynh a thae cih hae zah kaening hynh oun koihlu cih hae, kae min hynh laephi kyate a zosah vae cih hae. Tetuh alesaepaw na min hanlan pawtemou na cyih vae cih?” a ci.

¹⁰BAWIPAW nynh Joshua kha, “Thoku tua! Pawccemou na bakhung?

¹¹Israel nynh phe sei vae; kaw ka pya hae paw ka byakin kha phe ro vae hae. Pya vae paw uccaw abang kha phe law hae; ruh hae zah hynbya hote mih uccaw hae kya a nungbia hae.

¹²Tukeiccuze Israel hae tuh mih rhaw hae malang thadyn kho khyh hae; mimaw toulou kha ro lanpaw uccaw lang a tansaku hae keiccuze mih rhaw hae malang khe nulang a maeleihkuh hae. Pya vae paw uccaw hae kha nae kyate na ro khyh oh zetuh, nae kya ka um vae lan khyh.

¹³Thoku tua, ccungccaw hae kha thyaasah hae lah, ‘Awkhualan hanlan thyaasakuh oh, pawccecize Israel Pachia BAWIPAW nynh, “Pou Israel, pya vae paw uccaw hae tuh nae kya a um; tuh-e pya vae paw uccaw hae kha nae kyate ccaring na vua mawlaezung oh, nae rhaw hae malang na thadyn kho lan khyh oh,” a ci.

¹⁴Tukeiccuze awkhualan awkhua tuh phin kheit koute phin kheit malang na cceih cih oh. BAWIPAW nynh a popaw phin tuh puizia hae thyhte na naekuh cih oh, BAWIPAW nynh a popaw puizia tuh innbyn thyhte na naekuh cih oh, BAWIPAW nynh a popaw innbyn tuh lu kheit ccite na naekuh cih oh.

¹⁵Te pya vae paw uccaw hae a lahtupaw tuh a hoipaw uccaw hae balyn ryte maee te soi athua cih, pawccecize aning nynh BAWIPAW byakinnaw kha ei zah Israel hae kya maethya lan umpaw kha a cyi vae,’ cite hopah hae,” a cipya.

¹⁶Joshua tuh awkhua takaw te tho zah Israel hae kha phin kheit koute phin kheit cciakhae hae zah, Judah phin tuh law athua.

¹⁷Judah phin kha cciakhae hae zah, Zerah puizia hae tuh law athua; te Zerah puizia hae tuh innbyn byn kheit koute byn kheit cciakhae hae zah Zabdi innbyn tuh law athua.

¹⁸Te Zabdi innbyn kha lu raveihte cciakhae hae zah Judah phin kya-e Zerah ccapaw Zabdi, Zabdi ccapaw Karmi, Karmi ccapaw Akhan tuh law athua.

¹⁹Tetuh Joshua nynh Akhan kha, “Ka ccapaw, Israel Pachia BAWIPAW kha phu-esah lah, amaw malang na seinaw kha phyku tua. Na cyipaw kha atu yn hopya tua; yn phei nan,” a cipya.

²⁰Te Akhan nynh Joshua kha, “Athua, Israel Pachia BAWIPAW tungvaw a seipaw tuh kamaw hynh nynh ka thua. Ka cyipaw tuh hynhte nynh thua:

²¹luadepaw uccaw hae kyakhe apuithyapaw Babilon angkiccua, ngun shekel za ning te shekel sung pangaw aripaw suitung tung kheit kha he ka muih tuh, eih ka duaa zah ka lawku. Tuh-e hae tuh ka bu lungkhu lae kaw kya nynh ka thuruh, ngun tuh akawkou nynh a um,” a cipya.

²²Tukeiccuze Joshua nynh locceihtu hae kha saw hae zah, tuh-e hae tuh bu kalan a ccue hae; a bu kyatuin a thuruhpaw tuh-e uccaw hae tuh la um zah ngun tuh akawkou a la um.

²³Bu kya-e kha lah hae zah Joshua te Israel hae kalan a cciakhae hae; te BAWIPAW malang khe a nung hae.

²⁴Te Joshua te Israel hae balyn nynh Zerah ccapaw Akhan kha ngun, angkiccua, suitung, a ccapaw hae te a ccanung hae, a tangnua hae, lann hae, tuu hae, a bu te a hoipaw uccaw hae balyn ryte cciakhae hae zah Akhor Accya langkhe a thuakhae hae.

²⁵Joshua nynh, “Pawccemou kae tungvaw vawsawnaw na thuasah? Atunin BAWIPAW nynh na tungvaw vawsawnaw a thuasah cih,” a ci. Te Israel hae balyn nynh Akhan tuh lung te phe chih lan a deih hae; minmin kha lung te deih hae zah maee te a u hae.

²⁶Aning kha lung patae pumthin hae zah tuh-e tuh atunin cia a um ung. Te BAWIPAW nynh maee lang ruapaw a thinrianaw kha a daesah vae. Tukeiccuze tuh-e hmin tuh atunin cia Akhor[3] Accya a ci hae.