Read Zotung Chin 1 TIMOTE 2 Bible Online

1 TIMOTE 2 - Zotung Chin bible

1 TIMOTE 2

¹Ngiapyanaw, sawsangpyanaw, alaku te ngiapyanaw te lungtuabya honaw kha ccungccaw balyn hanlan na raepya nawlan oh masaty lan kae ngia oh,

²aening nynh Pachia nyhpaw hiinnaw kya te sawtua lan umpaw hiinnaw balyn kyakhe daenaw te ah hiin kho nawlan oh te daebabipaw hiinnaw ah hoi kho nawlan oh, siapharan hae te kawhoitu hae balyn hanlan saw la sangpah oh cite kae ngia oh.

³Tuh-e cyisahnaw tuh aening oun Khumtu Pachia malang ahoypaw te ry lan umpaw nynh thua.

⁴Ccungccaw balyn nynh khumnaw mue hae sah lah byaccing kha nyh hae sah cite Pachia nynh a ry.

⁵Pawccecize Pachia ccangkheit nynh a um; Pachia te ccungccaw hae laku kya Hopiatu Ccungccapaw Khri Jesu lu kheit rou nynh a um.

⁶Aning nynh ccungccaw balyn shawkhaw nawlan amaw kha a pyaku, —tuh-e tuh accyh azawpaw kya ccaekia a khanpaw nynh thua.

⁷Tuh-e khylan kae tuh phunghotu lang, locceihtu lang, zynnaw te byaccing kha Zenta hae kya ccangpahtu lang khangpaw nynh ka thua. Byaccing nynh ka ho, ka hyn khyh.

⁸Te pise hae nynh hmin takyh kya thinrianaw te eikunaw um leite athyaapaw kuih kha hangte sawsang hae sah ci ka ry.

⁹Tuhawte nopi hae nynh mah maethyaum leipaw boeining dohoypaw kha lawkute, ozia hoypaw te angaekuh lante ccaankuh hae sah lah, akhekuhpaw sang, sui, palee hae te amee rupaw boeining te ccaankuh nan hae sah;

¹⁰Pachia tungvaw rawri sawtuanaw a hoipaw nopi hae nynh cyi lan accan thyhte ahoypaw cyisahnaw khate ccaankuh hae sah ci ka ry.

¹¹Nopi nynh tuh kawngaenaw abalynte daebabi lan ccangkuh sah.

¹²Nopi nynh ccangpya lan, pise tungvaw kaw hoi lan ka ua khyh, daebabi lan zya um sah.

¹³Pawccecize Adam tuh masaty rae athua, tukoute nynh Evi kha rae athua.

¹⁴Adam kha hynpya thua khyh; nopinung kha hynpya thua zah misei lang a tang.

¹⁵Thuasalama nopi hae nynh ningccehoyte zynnaw, sungsakunaw te thyaanaw kya atyn hae ze, ccaawsaahnaw kya khum athua cih hae.