Read Zotung Chin 1 TIMOTE 3 Bible Online

1 TIMOTE 3 - Zotung Chin bible

1 TIMOTE 3

¹Ccungccaw lu kheit nynh pastor lang a tang ry ze, ahoypaw ryalaw kha a rypaw nynh thua cipaw tuh akyhpaw bya nynh thua.

²Khriccaawbuu pastor tuh ccaenaw um leipaw athua hahe cih, zu lu kheit kyalya a hoipaw, a sungkuh khopaw, a lungkyhrarihpaw, a ozia hoypaw, mikhia do-oihthyapaw te a ccangpah thyapaw athua cih;

³a zu-ae leipaw, a puatho leipaw, a lungnepaw, pekumaeku mang leipaw, phua eih duaa leipaw athua cih,

⁴a innbyn kha kou hoy lan a ukpaw, a ccaaw hae kha aphuinphuin te kawngae thyanaw te sawtua thyanaw a hoisah hae paw athua cih;

⁵pawccecize lukhakheit nynh a innbyn kha a ukthya khyh ze, pawtemou Pachia khriccaawbuu tuh a do-oih kho cih?

⁶Zyntu thawpaw thua lan khyh, tuhte athua ze, a lysakuh sei cih zah Satan hawte detahnaw lungkhu lang a phungkuh sei cih.

⁷Tuhpiaze atolang e ccungccaw hae kya thehoy ccoupaw athua cih; tuhkhyhze tuh thethyanaw te Satan kaang lungkhu lang a phungkuh sei cih.

⁸Tuhawte Khriccaaw piccan hae tuh sawtua lan umpaw athua cih hae, a lae pheipaw, misutui eih neihpaw te phua elang a karankuhpaw thua lan khyh hae.

⁹Mawtemaw nykunaw thinlung athyaapaw khate zynnaw byakhupaw kha varyng a kyngkuhpaw athua cih hae.

¹⁰Minmin tuh masaty syntawtua athua cih hae zah, ccaenaw a um khyh hae ze Khriccaaw piccan rya kha lah hae sah.

¹¹Tuhawte mih zu hae mah sawtua lan umpaw athua cih hae, ming hae thethya ho hae paw thua lan khyh hae, a sungkuh khopaw, pawpaw balyn kya a lungzipaw athua cih hae.

¹²Khriccaaw piccan hae tuh zu lu kheit kyalya a hoipaw athua cih hae, mih ccaaw hae te mih innbyn kha kou hoy lan a ukpaw athua cih hae.

¹³Pawccecize Khriccaaw piccan rya kha kou hoy lan a lah hae paw tuh mimaw elang ahoypaw thadynnaw kha mue hae zah Khri Jesu kya umpaw zynnaw kya myarya lepaw rawhoynaw kha a hoi hae.

¹⁴Aro mawze na kalan thua lan ka ngaehoi, thuasalama na kalan hynh-e ccaw kae zei rynawpaw tuh,

¹⁵taloi kae thua khyh ze, byaccing kya-e atungpi te abingkunaw athuapaw, a hiinpaw Pachia kya-e khriccaawbuu athuapaw Pachia innbyn kya pawtemou um lan accan cipaw na nyku nawlan nynh thua.

¹⁶Ah beiknaw kya-e byakhupaw alenaw zia hynh eiku lanpaw um khyh: Pachia tuh pynsaw lante yn langkuh vae zah, Muisaw liate thyaaccousah athua vae, vaaw hae nynh a muih vae hae. Zenta hae kya ho athua vae, laephi pynpi kya amaw kha a zyn vae hae. Phu-enaw te vaawlang lawthung athua vae.