Read Zotung Chin 1 TIMOTE 5 Bible Online

1 TIMOTE 5 - Zotung Chin bible

1 TIMOTE 5

¹Kum tang huapaw kha la pe nan, paaw hawte la soihbia. Kum no huapaw pise hae kha neitaw hae hawte,

²kum tang huapaw nopi hae kha nung hae hawte, kum no huapaw nopi hae kha ccia hae hawte thinlung thyaararih lante la ccuepe hae.

³Nomae ccaccing athuapaw nomae hae kha saw la tua hae.

⁴Thuasalama nomae lukhakheit nynh ccaaw hae tuhkhyhze mintaw hae a hoi lanze, tuh-e ccaaw hae te mintaw hae nynh mih innbyn elang cyi lanpaw mih beiknaw rya kha masaty ccangkuh hae sah lah, mih nung mih paaw hae te mih minnung mih minpaaw hae kha do-oihru hae sah; pawccecize tuh-e tuh Pachia lungrypaw nynh thua.

⁵Nomae ccaccing thua zah a makhaete a umpaw nopi tuh Pachia kha ngaehoikuh zah sawsangnaw te ngianaw kyakhe nynh khuazi khuadae po atyn.

⁶Thuasalama pynsaw hoysahnaw kya a hiinpaw nomaenung tuh a hiin pite a chihpaw nynh thua.

⁷Minmin tuh ccaenaw a um khyh ccaw hae, hynh-e kawbya hae hynh la pya hae.

⁸Lukhakheit nynh a puizia hae kha a do-oih khyh lanze, abyapi lante a innbyn hae kha a do-oih khyh lanze, zynnaw a vuapaw thua zah zynleitu laeze houh athah huapaw nynh thua.

⁹Kum sung taruh kaw e nomae tuh nomae ccazing kya teebua nan sah, pise lu kheit kyalya zu a la thuapaw,

¹⁰ahoypaw ryalaw hae hanlan thehoy ccousah hae paw; imua hae kha a kua ze, mikhia hae kha a thuasah hae ze, mithyaa hae ccu kha a singpya ze, riathae hae paw kha lunghoysah ze, ahoypaw ryalaw miakaw kha zuakute a law ze, ccazing kya la teebua sah.

¹¹Thuasalama kum ano huapaw nomae hae kha tuh la nuee hae. Pawccecize ohhuaku rynaw he a hoi hae tuh Khri kha rawsete vawpaw bua a hoi ry hae,

¹²masaty e mih zynnaw kha a vua vae hae keiccuze minmin tuh seibenaw a mue hae.

¹³Tuhlaeze, inn kheit kyate inn kheit kalan pae hae zah thawnawpaw kha a ccangku hae. Mih thawnaw kyalya thua leite thanry hae paw mah thua hae zah ho lan accan leipaw a hopaw, a ccukuh buapaw nynh athua hae.

¹⁴Tukeiccuze a rhawtupaw nynh saryanaw lanpaw kha ccyhhoy a pya khyh nawlan, kum a nohua hae paw nomae hae tuh vawpaw la hoi hae sah, ccaaw la sah hae sah, innloo la do-oih hae sah cite ka ry.

¹⁵Pawccecize abang tuh cceihsei hae zah Satan nulang a zuikuh vae hae.

¹⁶Zyntu lukhakheit nynh nomae hae a hoi ze, amaw nynh minmin kha do-oih hae sah lah, khriccaawbuu kha tavuan pya thua nan sah. Tuhteze nynh nomae ccaccing hae kha khriccaawbuu nynh a do-oih kho cih.

¹⁷Ahoyte a uk hae paw pastor hae, abyapi lante phunghonaw kya te ccangpyanaw kya ryalah hae paw tuh sawtuanaw leit ning te ccou lan angaekuh hae cite tua lanpaw nynh thua.

¹⁸Pawccecize Ccathyaa nynh, “Ccatan a tin cciamangpaw tangnuapaw mung kha na bucceih lan khyh,” a ci, te “Ryalahtupaw tuh a ryalaw mee mue lan accan,” bua a ci.

¹⁹Ccaekia lu ning, tuhkhyhze lu thum a um khyh ze, pastor sei a benaw hae kha nawccawpah nan hae.

²⁰Mingccang hae nynh mah a ri ccaw hae, a sei hae paw kha ccungccaw balyn malang khe pe hae.

²¹Lu kheit laeze lu kheit kha maedo huanaw kharouh hoi leite, laesahnaw te pawpaw sanmah na cyi khyh nawlan, Pachia te Bawipaw Jesu Khri malang thuasah, popaw vaaw hae malang thuasah e uccaw hae hynh nang nynh na zui nawlan, bya kae tawsya.

²²Hum ccungccaw tungvaw sanmah na kuih palou la khang nan. Milae seinaw kha mah la neethungkuh bua nan, namaw te namaw kha la thyaasakuh.

²³Na vue elang te leih na ccinawpaw hanlan, tui kyalya kha la neih nan, thuasalama misutui beihtaraw kha la mangbia.

²⁴Ccungccaw abang seinaw tuh raerae alangkuh, mih seinaw hae tuh byapianaw kalan laanmawty vae. Ccungccaw abang seinaw tuh nyalangte nynh alangku.

²⁵Tuhawte ccungccaw abang kya-e ahoypaw ryalaw tuh raerae alangkuh, te alangkuh loh leipaw ahoypaw ryalaw hae mah thuruh kho thua lan khyh.