Read Zotung Chin 1 TIMOTE 6 Bible Online

1 TIMOTE 6 - Zotung Chin bible

1 TIMOTE 6

¹Pachia a min te a ccangpyanaw kha thethyaccou khyh nawlan, see hae balyn nynh mih bawi hae kha myarya sawtua lan accan cite tua hae sah.

²See hae nynh zyntu athua hae paw mih bawi hae kha uteno nynh kae thua cite pawlangria leite um nan hae sah. Thanenaw a ccou hae paw tuh zyntu hae te sungsah hae paw athua hae keiccu mih bawi hae kha houh ryalawpah hae sah. Hynh-e uccaw hae hynh la ccangpah hae lah la hyy hae.

³Lukhakheit nynh ccanglang te a ccangpya ze thuasah, ah Bawipaw Jesu Khri bya ahmepaw kha a nawccaw khyh ze thuasah, Pachia lante ccianaw te accawkuhpaw ccangpyakunaw kha a nawccaw khyh ze thuasah,

⁴aning tuh pawsang ny leite a lysakuhpaw nynh thua. Aning tuh byalungnaw te bya-eikunaw a rypaw nynh thua. Tuh-e hae kyate eiungnaw, pekunaw, thethyahonaw, ahoy leipaw lunghiinnaw,

⁵byaccing a hoi leipaw te thinlung kya bya a tuathya lei hae paw ryte thawte eikunaw kha a pousah, Pachia rawrinaw tuh muenawpaw nynh thua cite a tua hae. Khahcihawpaw ccungccaw hae kha la sibia hae.

⁶Lungryachikhaekute Pachia lante cciapaw tuh myarya lepaw muenaw nynh thua.

⁷Pawccecize aening nynh laephi kalan pawsang mah ah thuakhae khyh oh; pawsang mah ah poukhae kho lan khyh oh.

⁸Aepaw te boeiningsungpue ah hoi oh paw khate ah lungryachikhaeku lanpaw nynh thua.

⁹Thuasalama hoirum a ry hae paw tuh tuhounaw lungkhu lang, kaang lungkhu lang, ngaeenaw patae te ronaw a thuakhaepaw ryduaanaw lungkhu lang nynh a phungkuh cih hae. Tuh-e hae nynh ccungccaw hae kha ronaw te zonaw kya a phungsaku hae.

¹⁰Pawccecize phua eih rynaw tuh hoyleinaw phuin balyn kya-e atharuipi nynh thua. Ccungccaw abang nynh phua eih a ry hae keiccuze zynnaw kyate a cceihsei vae hae, te mimaw te mimaw kha ngaethyanaw pataepi khate a thuingku hae.

¹¹Thuasalama, pou Pachia ccungccapaw, nang tuh tuh-e uccaw hae kha sibia lah dingnaw, Pachia rawrinaw, zynnaw, sungsakunaw, ngaesangnaw te lungnenaw kha hoi lan zuaku tua.

¹²Zynnaw khungtaekunaw kya na thawzung balyn kha thuatua, zungzae hiinnaw kha varyng kyngkuh. Tuh-e kalan nang tuh ko na thua zah ccaekia patae malang ahoypaw ccaekia phe na khan vae.

¹³Pawpaw balyn hiinnaw a pyatupaw Pachia malang te Pontias Pilat malang ahoypaw ccaekia a khangtupaw Khri Jesu malang, nang kha bya kae tawsyapaw tuh,

¹⁴ah Bawipaw Jesu Khri yn langkuh cia nang nynh athupaw beku leite, seibe lanpaw a um lei lante, kawbya kha la zui cipaw nynh thua.

¹⁵Tuh-e langkunaw tuh Pachia nynh amaw accyh kya yn langsakuh cih. Aning tuh thehoy ccoupaw, amaw kyalya Uktu athuapaw, siapharan hae Siapharan te bawi hae Bawipaw nynh thua.

¹⁶Amaw rou nynh chi kho leinaw a hoi, hum nynh san a naeku kho leipaw awnaw kya a umpaw nynh thua; amaw kha hum nynh san muih boi khyh zah muih kho khyh; sawtuanaw te zungzae thungnaw tuh amaw kya um sah. Amen.

¹⁷Atu she kya a hoirum hae paw nynh a lysaku khyh nawlan hae, atyn leipaw hoirumnaw kha a doliaku khyh nawlan hae kawpya hae, thuasalama aening ah lungtua nawlan pawpaw balyn phe beih lan oun pyatupaw, a hiinpaw Pachia kha a doliaku nawlan hae kawpya hae.

¹⁸Minmin nynh ahoypaw ryalaw kya a hoirum nawlan hae, a hysahpaw athua nawlan hae te neethungbua lan a paccynku nawlan hae ahoypaw ryalaw lan kawpya hae.

¹⁹Hiinnaw ccaccing kha a ccou nawlan hae, malang ccyh elang ahoypaw sisua tungpi kha mimaw hanlan a ccakhungkuh cih hae.

²⁰Timote, na kya ae apsya hae paw kha la rin. Anungsikuhpaw te accakaepaw byahokupaw te ahme lei lante nynaw a ci hae paw konglang eikunaw kha la sibia.

²¹Tuh-e ahme leipaw nynaw kha lawkute ccungccaw abang nynh zynnaw kha a poutaw vae hae. Thawccinaw tuh nae tungvaw la um vae sah.