Read Zotung Chin 2 TIMOTE 1 Bible Online

2 TIMOTE 1 - Zotung Chin bible

2 TIMOTE 1

¹Khri Jesu kya a umpaw hiinnaw kya-e byakinpyakupaw thyhte, Pachia rynaw liate Jesu Khri kya-e locceihtu athuapaw Paul nynh,

²Kou ka sungsahpaw ka ccapaw, Timote: Paaw Pachia te ah Bawipaw Jesu Khri kyate thawccinaw, ngaethyaumsahnaw te daenaw tuh na kya la um sah.

³Khuazi khuadae ka sawsangnaw kya apaekuh lei lan nang kha kae liathui zah, ka minpaaw hae nynh a beik hae hawte mawtemaw nykunaw thinlung athyaapaw te ka beikpaw Pachia kha ka luung.

⁴Na mitphi kha ka tuathui tuh lungtuanaw te phe ka bia nawlan nang kha muih lan myarya kae ry.

⁵Na minnung Lois te na nung Zunis kya masaty a la umpaw zynnaw hawte, thyaararihpaw na zynnaw kha ka liathui; tuh-e zynnaw tuh nang na kya mah a um cipaw ccaerarih lan ka ny.

⁶Tukeiccuze ka kuih khangnaw liate na kya umpaw Pachia lasung kha po na hiinsah nawlan nang kha kae nysah thui ry.

⁷Pawccecize Pachia nynh rawthyanaw muisaw kha aening oun pya khyh, thuasalama thungnaw, sungsakunaw, te mawtemaw yhku khonaw muisaw kha nynh oun pya.

⁸Tukeiccuze ah Bawipaw kya-e ccaekia kha thuasah, amaw keiccu thong a ccahpaw kamaw kha thuasah mae oun thyakhae nan; thuasalama Pachia thungnaw liate thehoypaw hanlan kamaw ryte teingbua.

⁹Tuh-e Pachia nynh aening kha phe oun khum vae zah athyaapaw konaw te oun ko vae; tuh-e tuh aening ah ryalawnaw keiccu thua leite, amaw a eenaw te a thawccinaw keiccu nynh thua. Tuh-e a thawccinaw tuh laephi atho mawze Khri Jesu liate aening kha oun pya vae.

¹⁰Tuh-e thawccinaw tuh aening oun Khumtu Khri Jesu yn langkunaw liate atu alangkuh vae. Tuh-e Jesu nynh chinaw kha zosah zah hiinnaw te chi kho leinaw kha thehoypaw liate awnaw kalan a thuakhae.

¹¹Tuh-e thehoypaw phunghotu lang, locceihtu lang te Zenta hae ccangpahtu lang kae tuh khang ka thua.

¹²Tuh-e keiccu nynh hynh-e vawsawnaw hae hynh ka teing. Tuhzemah ka maethah khyh. Pawccecize hum nynh ka zyn cipaw kha ka ny, amaw kalan ka appaw uccaw kha tuh-e Nin kyacia a khynsah kho cipaw ka ny.

¹³Khri Jesu kya a umpaw zynnaw te sungsakunaw te asekuhpaw, kamaw kyate na thae vae paw dosuinku lan umpaw ahmepaw bya kha varyng la kyngkuh.

¹⁴Nang na kya pya athuapaw, ahoypaw uccaw kha aening kya a umpaw Thyaa Muisaw liate la khynsah.

¹⁵Asia ram kya a um hae paw balyn nynh kae kha oun cciataw vae hae cipaw phe na ny, tuh-e hae kya Fikelas te Hemokene a umbua hae.

¹⁶Onesiforas innbyn kha Bawipaw nynh ngaethya la umsah vae sah, pawccecize aning tuh ka thaw yn muinsah hepaw thua zah, sivawrui te yn khii hae zemah a mae yn thyakhae khyh.

¹⁷Rom khua he a thua te, kae kha thawmawte yn ccung zah yn muih.

¹⁸Tuh-e Nin kya Bawipaw kya-e ngaethyaumsahnaw kha a mue nawlan Bawipaw nynh la pyabua vae sah. Efesa khua kya ka hanlan pawcih nynh rya yn lawpya cipaw kha hoyte na ny.