Read Zotung Chin 2 TIMOTE 4 Bible Online

2 TIMOTE 4 - Zotung Chin bible

2 TIMOTE 4

¹Pachia malang te Khri Jesu malang thawte kae ngia. Khri nynh amaw yn langkunaw kya te a peenaw kya michi te mihiin kha bya a pia cih.

²Kae ngiapaw tuh: Pachia Bya kha la ho. Accyh accanthya zemah, accanthya khyh zemah la zuakuh, mih seinaw kha la muihsakuh hae, la pe hae lah thawzung la pya hae, myarya lungsaete la ccangpah hae.

³Pawccecize ccungccaw hae nynh ahmepaw ccangpyakunaw kha a ngae ry khyh hae ccyh yn thua cih, mih rynaw hawte a ho lanpaw ccangpahtu hae kha oun suelua cih hae.

⁴Mih nakaring kha byaccing ngaenaw kyate ccanglang oun mae cih hae zah phungpaw huataw hae kha oun ngae ry cih hae.

⁵Thuasalama nang tuh pawpaw balyn kya la raeringkuh, riathaenaw kha la ngaesang, evangelist ryalaw kha la lah lah, na ryalaw kha phe ccing lan la lah.

⁶Pawccecize kae tuh silawnaw kya mang lanpaw niapaw silawnaw hawte paccyn ka thua vae, laephi vaw hiinnaw hynh ka cciataw ccyh yn thua vae.

⁷Kae nynh ahoypaw rhawtukkunaw kha ka tuk vae, ccuetaekunaw kha ka thangsah vae, zynnaw kha ka tynsah vae.

⁸Atu te vae tuh dingnaw bawilukhung kha kamaw hanlan nungpya athua vae. Tuh-e tuh adingpaw byapiatu, Bawipaw nynh tuh-e Nin kya kae kha yn pya cih. Kamaw kyalya thua leite amaw yn langku lanpaw a ngaehoi hae paw balyn kha mah a pya cih hae.

⁹Kamaw kalan aro maw thua lan thawte yn zuakuh.

¹⁰Pawccecize Demas nynh hynh-e atu she hynh sungsahte, kae kha yn vuasya zah, Thesalonika khua lang a cceih vae. Kresen tuh Galatia ram lang cceih zah, Titu tuh Dalmatia ram lang a cceih vae.

¹¹Luka kyalya nynh ka kya a um. Marka kha yn kobua lah namaw ryte oun cceih oh. Pawccecize aning tuh ka ryalawnaw kya a ccungkia.

¹²Taikhikas kha Efesa khua lang ka saw vae.

¹³Troas khua umpaw Karpas kya ka cciatawpaw angkiccua kha nae ccia vae ze yn phubia, te ccauh hae kha mah yn phubia lah, abyapi lante saving-ccauh hae kha yn phubia.

¹⁴Sohinlaeetupaw, Alexanda nynh myarya lepaw vawsawnaw yn pya; Bawipaw nynh tuh-e paw tuh a ryalaw thyhte amee pyaru vae sah.

¹⁵Amaw kha la raeringkuh, pawccecize aning nynh kae bya kha thawmawte a rawse.

¹⁶Byapianaw kya masaty ka pou lyaze hum nynh san yn pankhae khyh, mih balyn te phe oun vua hae; tuh-e hanlan mih tungvaw seibe thua nan sah.

¹⁷Thuasalama thehoypaw kha phe ccing lan ka ho zah Zenta hae balyn nynh a thae nawlan hae Bawipaw nynh yn pankhae zah thawzung yn pya. Kae tuh chindeih khalang kyate luesah ka thua.

¹⁸Bawipaw nynh ahoy leipaw ryalaw miakaw kyate kae kha yn luesah cih zah, a vaawlang peenaw kalan khyndadyh lan yn cciakhae cih. Amaw kya phu-enaw tuh zungzae te zungzae cia um sah. Amen.

¹⁹Prisilla te Akuila, te Onesiforas innbyn kha la beihlang hae.

²⁰Erastas tuh Korin khua nynh a um; Trofimas tuh a cci keiccu Miletas khua kya ka cciataw.

²¹Khuaccihsaw athua maw kamaw kalan thua lan thawte yn zuakuh. Zubulas, Puden, Linas, Klaudia te uteno hae balyn nynh nang kha ae beihlang hae.

²²Bawipaw tuh na muisaw kya la um sah. Thawccinaw tuh na kya la um sah. Amen.