Read Zotung Chin TITU 1 Bible Online

TITU 1 - Zotung Chin bible

TITU 1

¹Pachia rya a lahtu te Jesu Khri locceihtu athuapaw Paul nynh ccaw kae ky oh. Pachia nynh a popaw a ccungccaw hae zynnaw kha tynsah khylan te ah beiknaw nynh oun ccangpyapaw byaccing kalan cciakhae khylan popaw te sawpaw nynh ka thua,

²tuh-e ah beiknaw tuh zungzae hiinnaw ngaehoinaw kya a bingkuhpaw nynh thua; a hyn boi leipaw Pachia nynh hynh-e hiinnaw tuh laephi thotakaw mawte bya oun kinpyakupaw thua zah,

³accyh azaw te phunghonaw liate a bya kha a langsaku vae, tuh-e tuh aening oun Khumtu Pachia kya-e kawbya thyhte kamaw kya pya athua.

⁴Phe lokuh lante ah hoipaw zynnaw kya ka ccaaw ccaccing athuapaw Titu: Paaw Pachia te aening oun Khumtu Khri Jesu kyate thawccinaw te daenaw tuh na kya la um vae sah.

⁵Nang kha kaw kae pya vae thyhte, ahobou ungpaw ryalaw kha kou hoy lan law khylan te khua takyh kya pastor hae kha khang khylan Krete tuikoih kya nang kha kae cciataw;

⁶Khriccaaw piccan tuh ccaenaw um leipaw athua cih, zu lu kheit kyalya a hoipaw athua cih, a ccaaw hae tuh zyntu athua cih hae zah, a ccouseikuh hae paw te kawngae lei hae paw cite a ccae lei hae paw athua cih.

⁷Pastor tuh Pachia kya-e synriatu athua hawte ccaenaw um leipaw athua cih; amaw rynaw te um leipaw, a thindyn leipaw, misutui a ran leipaw, peku a mang leipaw, phua elang a karankuh leipaw athua cih,

⁸tukoute mikhia do-oihthyapaw, ahoypaw a rypaw, a tuathyapaw, hmerarihpaw, beiknaw lang a zuakuhpaw te a sungkuh khopaw athua cih,

⁹ahmepaw ccangpyanaw khate ming hae kha a hyy kho nawlan hae te tuh-e ccangpyanaw a rawse hae paw kha mih seinaw a muihsahku kho nawlan hae, aning tuh ccangpya athua vae thyhawte zyn lan umpaw bya kha varyng a kyngkuhpaw athua hahe cih.

¹⁰Pawccecize kawngae lei hae paw, accakaepaw bya a hotu hae te lingtu hae patae a um hae. Abyapi lante vingdungawkuh hae paw nynh thua hae.

¹¹Tuh-e hae mih khalang tuh phang hu athua hahe cih, minmin nynh ahme leipaw muenaw a ry hae keiccuze ccangpya lan accan leipaw kha ccangpah hae zah innbyn mawte phe a buleih hae.

¹²Mimaw kyaze minphuin kheit athuapaw, mih profeh lu kheit nynh, “Krete ccungccaw hae tuh palei a hyn hae paw, arepaw sarangpaw hae, mih thawnawpaw aemoh hae nynh thua hae,” a ci.

¹³Hynh-e bya tuh ahmepaw nynh thua. Tukeiccuze minmin tuh zynnaw kya atyn nawlan hae thawte la pe hae.

¹⁴Byaccing a vuapaw ccungccaw hae kya-e kawbya hae te Judah hae phungpaw huataw hae kha pawlang a ria khyh nawlan hae nynh thua.

¹⁵Athyaapaw ccungccaw hae hanlan tuh pawpaw balyn marya athyaa, thuasalama anungsikuhpaw te a zyn lei hae paw hanlan tuh pawsang mah thyaa khyh. Thuasalama mih thinlung te mimaw nykunawpaw thinlung mah anungsikuh.

¹⁶Minmin nynh Pachia kae nyh cite ho hae salamah mih cyisahnaw te Pachia kha a vua hae; pawccecize minmin tuh luathua-ae-ui lan um hae paw, kawngae lei hae paw te ahoypaw ryalaw miakaw kya ccungkia lei hae paw nynh thua.