Read Zotung Chin TITU 2 Bible Online

TITU 2 - Zotung Chin bible

TITU 2

¹Thuasalama nang tuh ahmepaw ccangpyanaw te angaekuhpaw kha la ccangpah hae:

²Paawpi hae tuh a sungkuh khopaw, sawtua lan umpaw, lungkyhrarihpaw athua nawlan hae, te zynnaw, sungsakunaw te ngaesangnaw kya atynpaw athua nawlan hae la ccangpah hae.

³Tuhawte nungpi hae kha mah umtu ziazae kya sawtua lan umpaw athua nawlan hae, milae thanthya a hopaw athua khyh nawlan hae, misutui eih a ranpaw athua khyh nawlan hae, ahoypaw kha a ccangpahtu athua nawlan hae la ccangpah hae.

⁴Nungpi hae nynh a kum no huapaw nopi hae kha, mih vawpaw hae a sungsahpaw, mih ccaaw hae a sungsahpaw,

⁵a sungkuh khopaw, athyaapaw, innloo a do-oihthyapaw, ahoypaw, mih vawpaw hae kawngae hae paw athua nawlan hae a thuihei cih hae; tuhcite Pachia bya tuh thethya a ccou khyh nawlan nynh thua.

⁶Tuhawte a kum nopaw pise hae kha a sungkuh khopaw athua nawlan hae la tuhou hae.

⁷Pawpaw balyn kya ahoypaw ryalaw hae khate dosuinkupaw lang la umpah hae. Ccangpyakunaw kya ccirarihnaw, thanccing thuanaw,

⁸seibe kho leipaw ahmepaw byaho kha la mang; aening oun rawsetupaw tuh aening konglang athahpaw a ho lanpaw hoi vae leite, maethya a bongkuh vae cih.

⁹See hae nynh mih bawi hae kaw a ngae nawlan hae, pawpaw kya balyn mih lunghoysah nawlan hae, bya a khungru khyh nawlan hae,

¹⁰a rupya khyh nawlan hae, pawpaw kya balyn zyn lan a umnaw hae balyn kha hoyte a langsaku nawlan hae la tuhou hae, tuhteze nynh aening oun Khumtu Pachia ccangpyanaw kha pawpaw kya balyn minmin nynh a paccan cih hae.

¹¹Pawccecize khumnaw yn thuakhaepaw Pachia thawccinaw tuh ccungccaw balyn kya a langkuh vae.

¹²Pachia pawlangria leinaw te laephi uccaw duaanaw kha vua lan zah, aening tuh mawtemaw ukku kho te dingrarih lante, Pachia rawrite atu she kya ah hiin nawlan oh, tuh-e thawccinaw nynh oun ccangpya.

¹³Alesaepaw ah Pachia te oun Khumtu Jesu Khri a phu-enaw yn langku lanpaw kha aening nynh ah ngaehoi oh, tuh-e tuh lungtua lan umpaw aening ngaehoinaw nynh thua.

¹⁴Jesu Khri tuh hoyleinaw balyn kyate aening kha shawkhaw khylan thuasah, amaw elang ccungccaw hae kha thyaasah khylan te tuh-e ccungccaw hae nynh ahoypaw cyisahnaw kha mih lungzua nawlan thuasah amaw te amaw kha aening hanlan a pyaku.

¹⁵Hynh-e uccaw hae hynh la ccangpah hae; kawhoinaw balyn khate thawzung pyate la hyy hae lah, pe biate la thuihei hae. Hum nynh sanmah ae dothatheih nan sah.