Read Zotung Chin TITU 3 Bible Online

TITU 3 - Zotung Chin bible

TITU 3

¹Uktu hae te kawhoitu hae nynh oun uknaw hae kha zakawsangsakute kaw a ngae nawlan hae thuasah, ahoypaw ryalaw miakaw hanlan paccynkute a um nawlan hae thuasah minmin kha bua la hopah hae,

²hum ccungccaw kong sanmah thethya a ho khyh nawlan hae, a peku khyh nawlan hae, nevyalyapaw athua nawlan hae te ccungccaw miakaw kya lungnenaw kha a langsaku nawlan hae la hopah hae.

³Pawccecize langmawlya tuh aening mah mingaee hae, kawngae lei hae paw, a cceihsei hae paw, ryduaanaw aphuinphuin te hoysahnaw hae see nynh ah la thua oh, ahoy leipaw te eiungnaw kya hiinte, ming hae nynh a hua hae paw te lu kheit te lu kheit a huakuh hae paw nynh ah la thua oh.

⁴Thuasalama aening oun Khumtu Pachia a hoynaw te a thawcci sungsahnaw kha ccungccaw hae kya he yn langkuh tuh,

⁵aening nynh ah rae oh paw dingnaw cyisahnaw hae liate thua leite, amaw ngaethyaumsahnaw liate oun khum, puithuinaw te asekuhpaw singpyanaw te Thyaa Muisaw nynh thawsahthuinaw liate aening kha oun khum.

⁶Aening oun Khumtu Jesu Khri liate tuh-e Muisaw tuh aening tungvaw kya phe beih lan oun bu.

⁷Tuhcite a thawccinaw liate thyaaccousah ah thua oh zah, zungzae hiinnaw ngaehoinaw thyhte rhoccoutu hae ah thua nawlan oh nynh thua.

⁸E tuh zyn lan umpaw bya nynh thua. Pachia a zyn hae paw nynh ahoypaw rya hae kha law lan a raeringku nawlan hae hynh-e uccaw hae hynh pekite la ho ci ka ry; e uccaw hae tuh ccungccaw hae hanlan hoy zah athanepaw nynh thua.

⁹Thuasalama ngaeepaw bya-eikunaw, thokeinaw kong, lungloku leinaw te kawbya kong pekunaw hae kha la sibia, pawccecize tuh-e hae tuh ccungkia leipaw te athane leipaw nynh thua.

¹⁰Phiakunaw a raepaw ccungccaw kha vae kheit, vae ning thuiheinaw na pya koute tuh la dee ccavae.

¹¹Tuhcihawpaw ccungccaw tuh amaw te amaw seibekuhpaw, a lungzi leipaw te a seipaw nynh thua cipaw na ny.

¹²Artemas khyhze Tikhikas kha na kalan he kae saw te, Nikopolis khua cia ka kalan thua khonaw te yn zuakuh, pawccecize khuaccihsaw lungkhu tuin kya um lante ka tuaku vae.

¹³Kawbya a thyapaw Zenas te Apollos kha mih khuaccongnaw kya mih hanlan pawsang ahobou khyh nawlan la zuapakuh hae lah la cciakhae hae.

¹⁴Aening ah ccungccaw hae mah athae thae leipaw athua khyh nawlan hae, mih hanlan ahoboupaw kya mang lanpaw a hoi nawlan hae, ahoypaw ryalaw law lan la ccangkuh hae sah.

¹⁵Ka kya a umbua hae paw balyn nynh nang kha ae beihlang hae. Zynnaw kya aening oun sungsah hae paw kha la beih hae. Thawccinaw tuh nae balyn kya la um vae sah. Amen.