Read Zotung Chin FILEMON 1 Bible Online

FILEMON 1 - Zotung Chin bible

FILEMON 1

¹Jesu Khri keiccu thong a ccahpaw Paul te kae unopaw Timote nynh kae sungsahpaw te rya kae lahkheihpaw Filemon kalan,

²kae sungsahpaw Apfia te rhawkaw kae tangkheihpaw Arkhippas kalan te na inn kya a pumkuh hae paw khriccaawbuu kalan ccaw kae ky oh.

³Ah Paaw Pachia te Bawipaw Jesu Khri kya-e thawccinaw te daenaw tuh nae kya la um sah.

⁴Ka sawsangnaw kya nang kha kae lia takyhte, ka Pachia kalan lungtuabya zungzae ka ho.

⁵Pawccecize Bawipaw Jesu Khri na zynnaw te mithyaa hae balyn na sungsahnaw hae kha ka thae.

⁶Khri hanlan aening kya umpaw ahoypaw uccaw miakaw kha nynaw liate na zynnaw na neethung hae paw tuh ccungkiapaw lang a tang nawlan saw kae sang.

⁷Ka sungsahpaw ka neitaw, na hoipaw sungsakunaw nynh lungtuanaw te thawzung patae yn pya, pawccecize nang nynh mithyaa hae kha mih lung na tuasah hae.

⁸Tukeiccuze kawpya lan accanpaw kha Khri liate rawhoyte kae pya ngan zemah,

⁹a kum mah tang vae zah atu lya Khri Jesu keiccu thong mah a ccahpaw kae, Paul nynh sungsakunaw keiccu ngiate kae ngia paleih.

¹⁰Thong yn sawnaw hae kya ka saahkupaw ka ccapaw Onesimas hanlan nang kha kae ngia.

¹¹Langmawlya aning tuh na hanlan ccungkia khyh, thuasalama atu tuh na hanlan te ka hanlan ccungkia vae,

¹²amaw kha na kalan bua kae saw, tukeiccuze amaw kha leh la khan; tuh-e tuh kamaw ka thinlung kya-e nynh thua.

¹³Thehoypaw keiccuze thong ka ccaw lungkhu aning nynh namaw ccelang rya yn lawpya nawlan amaw kha ka kya ka umsah rypaw nynh thua.

¹⁴Thuasalama na nawccawpaw tuh nangse keiccu thua leite, lungthote na cyipaw kha ka ryhua, na nawccaw leite pawsang ka cyih ry khyh.

¹⁵Aning nynh na kyate sosoh a la toikupaw tuh amaw kha zungzae na hoi nawlan athua khopaw nynh thua.

¹⁶Atu tuh see lu kheit hawte thua vae leite, see lae ahang lante la ccou ccavae, abyapi lante kamaw hanlan sungsahpaw uno nynh athua vae; pynsaw lante thuasah, Bawipaw kya thuasah na hanlan pawcihmou houh sungsahpaw thua lan accan.

¹⁷Tukeiccuze kae hynh ah mungkuhpaw lu kheit lante nae tua ze, amaw hynh kamaw hawte la ccou.

¹⁸Na tungvaw a cyisei ze, tuhkhyhze hankhakheit laebah ae um ze, tuh-e tuh kae nynh laebah ka umpaw lante la tua.

¹⁹Tuh-e laebah tuh kae pyaru cih cite hynh-e hynh kae, Paul nynh kamaw ka kuih te ka zeipaw nynh thua. Tuhzemah namaw na hiinnaw heize ka kya laebah na um cipaw kae hopah khyh.

²⁰Athua, ka neitaw, na kyate thanenaw kha Bawipaw kya mue ka ry, Bawipaw min te nang nynh ka lung yn tuasah.

²¹Nang nynh kaw na la ngae cih cite zynkunaw ka hoi zah, e ccaw hynh na kalan kae zei, ka hopaw lae heize na la cyih cih cite ka zyn.

²²Ka thuanaw lanpaw hmin kha mah yn la paccynpah; pawccecize nae sawsangnaw liate nae kalan thuanaw kaw ka mue cih cite ka ngaehoi.

²³Khri Jesu kya kamaw ryte thong kae ccahkheihpaw Epafras nynh nang kha ae beihlang.

²⁴Kamaw ryte rya kae lahkheih hae paw Marka, Aristarkhas, Demas te Luka nynh ae beihlang hae.

²⁵Ah Bawipaw Jesu Khri kya-e thawccinaw tuh nae muisaw kya la um vae sah. Amen.