Read Zotung Chin HEBRU 10 Bible Online

HEBRU 10 - Zotung Chin bible

HEBRU 10

¹Pawccecize kawbya tuh yn thua cih paw ahoypaw uccaw hae mynlyh thua zah uccaw hae muinsan ccaccing thua khyh, kum takyhte pyapaw alokuhpaw silawnaw liate amaw kalan a naekuh hae paw kha kharouh ccingsah kho khyh hae.

²A ccingsah kho lanze, silawkunaw kha phe a la umtaw vae cih hae khaw? Pawccecize a beiktu hae tuh zungzae hanlan vaekheit te sei thyaasah athua hae ze, mih seinaw nykunaw thinlung hoi vae lan khyh hae.

³Thuasalama tuh-e silawnaw kya tuh seinaw bua liathuinaw kum takyhte a um.

⁴Pawccecize tangnuapaw hae te miaa hae chii nynh seinaw po lawpya lanpaw tuh thua kho khyh.

⁵Tukeiccuze laephi kalan Khri yn thua lyaze aning nynh, “Silawnaw te pyapaw uccaw kha na rypaw thua khyh, thuasalama kamaw hanlan pyn kha phe nae paccynpya vae.

⁶Maee-ute silawnaw te seithyaanaw silawnaw kyakhe na lungrythua khyh.

⁷Tuinte kae nynh, ‘Ccauh kuekuhpaw kya kamaw konglang azeiku thyhte, pou Pachia, na rynaw rae khylan nynh kae tuh kae thua,’ ka ci,” cite a ho.

⁸Luki langkhe, “Silawnawpaw hae te pyapaw uccaw hae, maee-ute silawnawpaw uccaw hae te seishawnaw silawnawpaw hae kha na ry khyh, tuh-e hae kya na lungrythua khyh,” (tuh-e hae tuh kawbya thyhte pyapaw nynh thua) cite a ho koute,

⁹aning nynh, “Ngaetua, pou Pachia, kae tuh na rynaw rae khylan nynh kae thua,” a ci. Vaeningnaw e kha tynsah khylan vaekheitnaw e kha phe a vua.

¹⁰Tuh-e rynaw liate, Jesu Khri pyn kha zungzae hanlan vaekheit kyalya pyanaw liate aening tuh thyaasah ah thua vae oh.

¹¹Ranpibawi miakaw tuh mih ryalaw kya nin takyh a thadyn hae, seinaw kharouh a thyaasah kho leipaw alokuhpaw silawnaw kha palei a rae hae.

¹²Thuasalama Khri tuh seinaw elang silawnaw ccangkheit kha zungzae hanlan a pya koute, Pachia ranglang khe a dahung vae.

¹³Tuh-e ccyh kyate a rhaw hae kha a ccusy lang rae athua makhia phang a ngaw vae.

¹⁴Pawccecize pyapaw uccaw ccangkheit liate thyaasah athua hae paw kha zungzae accingpaw lang a rae hae.

¹⁵Thyaa Muisaw mah aening kya ccaekia nynh thua; pawccecize,

¹⁶“Tuh-e nin hae koute minmin ryte ka rae lanpaw byakinnaw tuh hynhte nynh thua: Ka kawbya hae kha mih thinlung kya ka nung cih zah tuh-e hae tuh mih lungkhu kya ka zei cih,” cite Bawipaw nynh a ho koute,

¹⁷“Mih seinaw hae te kawbya pawlangria leipaw mih cyisahnaw hae kha ka liathui vae lan khyh,” a ci.

¹⁸Atu hynh-e seingaethyanaw a umnaw kya, seinaw hanlan pyapaw uccaw ho vae khyh.

¹⁹Tukeiccuze uteno hae, Jesu chii liate beikinnthyaa lungkhu lang tee lan zynkunaw ah hoi vae oh.

²⁰Tuh-e a chii liate aning nynh amaw pyn athuapaw zokhawpaw boei khate aening hanlan ahiinpaw laanpi thawpaw kha oun hungpya.

²¹Pachia inn a uktupaw Ranpibawi Lupi ah hoi oh keiccuze,

²²ahoy leipaw mawtemaw nykunaw thinlung kha thyaasaku khylan tui theikute, ah pyn kha tui ccipaw te singkute, thinlung ccaccing te zynnaw atynpaw te Pachia kalan naekuh oh sih.

²³Ngaehoinaw kong ccaekia ah khan oh paw kyate voikheit voikheit lang pu leite varyng kyngkuh oh sih, pawccecize bya oun kinpakuhpaw tuh a lungzipaw nynh thua.

²⁴Sungsaku nawlan te ahoypaw rya kha law khylan lu kheit te lu kheit pawtemou lungthosaku lan cipaw kha tua kalang oh sih.

²⁵Ccungccaw abang nynh leih a cyimae hae hawte pynkheihlan pumkunaw kha umtaw leite, lu kheit te lu kheit thawzung pyakuh oh sih, Ninsaw tuh houhouh yn naekuh vae cipaw kha na muih oh hawte thawzung houhouh pyakuh oh sih.

²⁶Pawccecize byaccing nynaw kha aening nynh phe ah mue kou oh te lungraroute ah sei oh ze, seinaw hanlan silawkunaw umlae vae khyh.

²⁷Thuasalama ri lan umpaw byapianaw yn thua lanpaw te rawsetu hae kha phe ccung lan a u cih hae paw, bungpawnaw maee rou nynh a um vae.

²⁸Moses kawbya kha a zui leipaw ccungccaw tuh ccaekia lu ning khyhze lu thum nynh ccaekia a khan hae thyhte ngaethyaumsahnaw mue leite a chih.

²⁹Pachia Ccapaw kha a ccu kaw syde zah, amaw a thyaasahpaw byakinnaw chiise kha athyaa leipaw uccaw lang ria zah, thawccinaw Muisaw kha a saryapaw ccungccaw tuh pawcih alepaw detahnaw mou mue lan accan cite na tua oh?

³⁰Pawccecize, “Liarunaw tuh kamaw kya-e nynh thua, kae nynh amee ka sangru cih,” cite Bawipaw nynh a ci. Te, “Bawipaw nynh a ccungccaw hae kha bya a pia cih hae,” bua a ci, cite a hotupaw kha aening nynh ah ny oh.

³¹Ahiinpaw Pachia kuih lungkhu lang ccaw lanpaw tuh ri lan umpaw nynh thua.

³²Thuasalama nanning kha awsah na thua kou oh te, alepaw vawsawnaw na teing oh zah na ngaesang oh paw, langmaw e nin hae kha bua liathuitua oh.

³³Vaekhakheit vae ze ccungccaw hae malang saryanaw te vawsawnaw kha na teing oh zah, vaekhakheit vae ze tuhcite a teing hae paw ryte mungkute na teingkheih oh.

³⁴Pawccecize thongccah hae paw kha thaw na cci oh, te ahoy huapaw te atynpaw uccaw na hoi oh paw kha na nyku oh keiccuze na hoi oh paw uccaw hae ae luade oh paw kha lungtuate na ngaesang oh.

³⁵Tukeiccuze myarya lepaw lasung a thuakhaepaw nae rawhoynaw kha vua nan oh.

³⁶Pawccecize Pachia rynaw kha na rae kou oh te, byakinpyakupaw na mue nawlan oh ngaesangnaw na hoi oh aho.

³⁷“Pawccecize yn thua cih paw aning tuh thysung leite sosohtari aro koute yn thua vae cih.

³⁸Adingpaw ka ccungccaw tuh zynnaw liate a hiin cih; thuasalama lukhakheit nynh nulang a sihku lanze ka muisaw tuh tuh-e paw kya a lungrythua lan khyh,” a ci.

³⁹Thuasalama aening tuh ronaw kalan nulang a sihkuh hae paw ah thua khyh oh, thuasalama zynnaw hoite khumnaw a ccou hae paw nynh ah thua oh.