Read Zotung Chin HEBRU 11 Bible Online

HEBRU 11 - Zotung Chin bible

HEBRU 11

¹Zynnaw tuh ngaehoipaw uccaw hae kha ka mue ccaccing cih cite phe riasakunaw te, muih loh leipaw uccaw hae kha a um ccaccing cite nynaw nynh thua.

²Pawccecize tuh-e zynnaw liate langmawlya e ccungccaw hae tuh Pachia lungry a tung hae.

³Laephi tuh Pachia bya liate rae athua cipaw kha zynnaw liate ah thaethya oh; muihpaw uccaw hae hynh muih leipaw uccaw hae kyate raepaw nynh thua hae.

⁴Abel nynh zynnaw liate Kain silawnaw laeze ahoy huapaw silawnaw kha Pachia kalan a pya. Tuh-e zynnaw liate aning tuh miding lante ccou athua, pawccecize a lasung kha Pachia nynh a ccoupya; aning tuh a chi vae zemah tuh-e zynnaw liate bya a ho ung.

⁵Enok tuh chinaw a tung vae khyh ccaw cite zynnaw liate lawthung athua. Pachia nynh amaw kha a lawthung vae keiccuze aning tuh muih lan um vae khyh. Pawccecize lawthung athua maw, “Aning tuh Pachia lungry a tung,” cipaw ccaekia kha a hoi.

⁶Zynnaw leite Pachia lungrytung lanpaw tuh thua kho khyh; pawccecize Pachia kalan yn naekuhpaw ccungccaw nynh tuh Pachia a um cipaw te amaw a ccung hae paw kha amee a pya hae cipaw kha a zyn hahe cih.

⁷Noah tuh muih loh leipaw uccaw hae kong kha Pachia nynh raeringnaw a pya koute a innbyn khumnaw hanlan Pachia rawrinaw te zynnaw liate sanphalung kha a sak, tuh-e zynnaw liate laephi kha seibe zah zynnaw liate yn thuapaw dingnaw rho a ccoutu lang yn tang.

⁸Abraham nynh rho lang a ccou cih paw ram langkhe ccia khylan ko he athua tuh, zynnaw liate kaw a ngae; teilang nynh ka ccia cipaw ny leite a cceih.

⁹Byakinpyakupaw loram kyakhe ramccangpaw hawte zynnaw liate a um. Tuh-e byakinpyakunaw kha amaw ry, rhoccoutu athua hae paw Isak te Jakob ryte bu kya a um hae.

¹⁰Pawccecize Pachia nynh a sakpaw te a raepaw, atynpaw athonaw a hoipaw khuapi kha aning nynh a ngaehoi.

¹¹Abraham tuh myarya taw vae zah Sarah mah a tiinnung athua zemah zynnaw liate ccaawpoi khonaw thawzung a mue; pawccecize bya a kinpakuhtupaw tuh a lungzipaw nynh thua cipaw a zyn.

¹²Tukeiccuze achihpaw hawte athua vae paw Abraham kyate vaawlui e awsi hae zeih alungpaw te rili kin e riatae leipaw laesia zeih alungpaw ciihan patae a pui hae.

¹³Hynh-e ccungccaw hae balyn tuh byakinpyakupaw kha ccou leite zynnaw hoite a chih hae. Thuasalama minmin nynh asawpi te tuh-e tuh muihlang hae zah a cciadue hae, te minmin tuh laephi vawlan mikhia hae te khuaccong hae paw nynh kae thua cipaw ccaerarih lan a nyku hae.

¹⁴Pawccecize tuh-e uccaw kong a hotu hae nynh minmin tuh mimaw ram nynh a ccung hae cipaw ccaerarih lan a langsaku hae.

¹⁵Minmin nynh a poutaw hae paw ram kha palei a la tuathui hae ze, tuh-e ram lang bua kithui lan ccyhhoypaw phe a hoi cih hae paw.

¹⁶Thuasalama minmin nynh ahoy huapaw ram kha a ngae hae, tuh-e ram tuh vaawram nynh thua. Tukeiccuze mih Pachia cite koku lanpaw kha Pachia tuh a maethah khyh; pawccecize Pachia nynh minmin hanlan khuapi kha a paccynpya vae hae.

¹⁷Abraham tuh syntawtua athua lyakhe zynnaw liate Isak kha silawku nawlan a pya; byakinpyakupaw a muetupaw nynh a hoi thypaw a ccapaw kha a pya.

¹⁸Amaw kong lante asekuhte, “Isak kya nynh na ciihan tuh atyn cih,” cite hopya athua.

¹⁹Pachia tuh achihpaw heize a thosathui kho cite varyng a zyn; aning nynh muihsahnaw lante a chih hae paw kyate Isak kha mah a mue.

²⁰Isak nynh yn thua cih paw uccaw hae kong lante Jakob te Esau kha zynnaw liate hythua a pya hae.

²¹Jakob nynh a chi dyn khe Josef ccaaw hae kha zynnaw liate hythua ccarou a pya hae, te a hoitang dung kya phang ngeikute Pachia kha a beik.

²²Josef nynh a chi dyn khe, Israel ccaaw hae nynh a pou lan hae paw kong kha zynnaw liate hosya zah amaw a ru konglang te bya a tawsya hae.

²³Moses he a pui tuh, apuithyapaw imua nynh thua cipaw kha a muih hae keiccuze zynnaw liate siapharan nynh kawthopaw kha ri leite a nung te a paaw nynh Moses kha sawpaw sah thum a thuruh hae.

²⁴Moses nynh piccan he thua tuh, Faro ccanung a ccapaw cite koku lanpaw kha zynnaw liate phe a ei.

²⁵Seinaw te asekuhpaw lungrythuanaw kya sosoh hoysah lanpaw laeze Pachia ccungccaw hae ryte vawsawnaw teing lanpaw kha a poku paleih.

²⁶Izip ram kya-e sisua hae laeze Khri keiccuze saryakunaw tuh asung huapaw hoirumnaw nynh thua cite a tuaku. Pawccecize nyalang mue lanpaw lasung kha nynh a tua.

²⁷Siapharan thinrianaw kha ri leite Izip ram kha zynnaw liate a cciataw; pawccecize muih kho leipaw Pachia kha a muihpaw hawte aning nynh phang a ngaesang.

²⁸Ccatawccaw hae a rohtupaw nynh Israel ccatawccaw hae kha a ty khyh nawlan, Moses nynh Kawtaw Poi te chii theinaw kha zynnaw liate a rae.

²⁹Israel hae nynh laerou kya ccia hawte zynnaw liate Rili Se kha po a zua hae. Tuhcite Izip hae nynh he a zuabua hae tuh tui nynh pong a vu hae.

³⁰Jeriko khualungrua kha nin sari a voilu kou hae te, zynnaw liate khualungrua tuh pong atin.

³¹Ohhuanung Rahab tuh dophitu hae kha ahoyte innccong a thuasah hae keiccuze zynnaw liate aning tuh kawngae lei hae paw kya chihbua khyh.

³²Tuhlaelan pawmou ka ho ung cih? Gideon, Barak, Samson, Jefthah, David, Samuel te profeh hae kong honaw ccyh ka zaw lan khyh.

³³Tuh-e hae nynh peenaw hae kha zynnaw liate a tae hae, dingnaw rya kha a law hae, byakinpyakunaw kha a mue hae, chindeih hae khalang kha a myhsah hae,

³⁴Maee aruapaw kha a the hae, thaloi haw kyate a lue hae, thawzyanaw kyate a thawsaepaw lang a tang hae, rhawdounaw kya a rawthungpaw lang a tang hae, ramccang rhawkaw hae kha a ccuesah hae.

³⁵Nopi hae nynh mih michi hae kha hiinnaw kalan thoosahthuinaw te bua a mue hae, te mingccang hae tuh ahoy huapaw thoothuinaw kha mue khylan luesahnaw kha lawku leite tuaasahnaw kha a teing hae.

³⁶Abang tuh saryanaw te ziakunaw kha a teing hae, sivawrui te khii hae zah thongsaw hae.

³⁷Lung te a deih hae, thing-aw te ccangning lang a aw hae, thaloi te a chia hae, tuu phua te miaa phua kha kikuh hae zah a khiakuh hae; boeining leite ae van ae leite vawsaw a teing hae, ming hae nynh a tuaa a sah hae.

³⁸Laephi tuh minmin te ngaekuh khyh. Minmin tuh ramkaw kya, mua hae kya a la khiakuh hae, lungkarung te laekarung hae kya a la um hae.

³⁹Minmin balyn tuh zynnaw liate thehoynaw a ccou hae zemah byakinpyakupaw kha mue khyh hae.

⁴⁰Minmin tuh aening leite accingpaw lang rae athua khyh nawlan hae Pachia nynh ahoy huapaw uccaw kha aening hanlan oun paccynpya vae.