Read Zotung Chin HEBRU 12 Bible Online

HEBRU 12 - Zotung Chin bible

HEBRU 12

¹Tukeiccuze aening mah ccaekia athuapaw maeking pi nynh phang oun koihlu keiccuze zoikadeih lan kaang oun kaesahpaw seinaw te phupaw miakaw kha ccanglang dae nung oh sih lah, aening malang a umpaw ccuetaekunaw kyakhe lungsaenaw te ccue oh sih.

²Aening zynnaw a thotu te a ccingsahtupaw Jesu kha riri dote ccue oh sih. Aning tuh maethyanaw kha pawlangria leite amaw malang nungpya athuapaw lungtuanaw hanlan vaelantung kya teingnaw kha ngaesang zah Pachia kya-e bawitungkhung ranglang khe a dahung vae.

³Pawccecize nanning nae lungthawthang khyh nawlan te nae lungthawzya khyh nawlan misei hae kya-e khahcihawpaw rawsenaw a ngaesangtupaw amaw kha la tuatua oh.

⁴Nanning nynh seinaw dounaw kya chii phe lua lan ciate na dou loh khyh oh.

⁵Ccaaw hae kya hopya hawte nanning hopyapaw hyynaw bya kha na ning vae oh tou? Tuh-e bya tuh: “Ka ccapaw, Bawipaw thuiheinaw kha pawlangria leite um nan, amaw nynh ae thuihei ze na lungthang nan sah.

⁶Pawccecize Bawipaw nynh a sungsahpaw kha a thuihei, ccaaw lante a ccoupaw miakaw kha de a tah,” acikuh.

⁷Thuiheinaw kha na ngaesang oh ze, Pachia nynh ccaaw hae hawte ae ccuepe cih oh; pawccecize paaw nynh a thuihei leipaw ccaaw a um zawtou?

⁸Thuasalama ccungccaw miakaw nynh a mue hae paw thuiheinaw kha na muebua khyh oh ze, ccaaw ccaccing na thua khyh oh, ccalah nynh na thua oh.

⁹Tuhlaeze aening oun thuiheipaw pynsaw lante paaw hae ah hoi oh zah, minmin kha saw ah tua oh; tuhlaeze muisaw lante ah Paaw kaw kha houh ngaete ah hiin lan khyh oh tou?

¹⁰Pawccecize tuh-e paaw hae nynh ahoy cite a tua hae thyhte sosoh nynh oun thuihei hae; thuasalama Pachia nynh tuh amaw kya-e thyaararihnaw kha ah neethungku bua nawlan oh, aening thanenaw hanlan nynh oun thuihei.

¹¹Thuiheinaw miakaw teing lya tuh lungpawnaw laeze ngaethyanaw cite tua lan a umhua; thuasalama thuiheinaw te kia athua hae paw hanlan, tuh-e nynh nyalang tuh daenaw te asekuhpaw dingnaw thae kha a thuakhaepya hae.

¹²Tukeiccuze balae tingpaw kuih hae te a thawzyapaw ccukharu hae kha thawsaesah oh.

¹³Ccukhoupaw ccu tuh poh khahku leite dansah athua nawlan, nae ccu hanlan laanpi kha lawsah oh.

¹⁴Ccungccaw miakaw te daenaw te um lanpaw te thyaararih lante um lanpaw kha zuakuh oh; thyaanaw leite hum nynh sanmah Bawipaw kha muih lan khyh.

¹⁵Pachia thawccinaw kha hum nynh san mue leite a um khyh nawlan, akhahpaw tharui kyate yn popaw nynh nanning kha vawsaw ae pya khyh nawlan oh raeringkuh oh; tuh-e nynh ccungccaw patae kha a nungsisaku hae.

¹⁶A ohhuakuhpaw a um khyh nawlan, tuhkhyhze ccatawccaw thuanaw kha aepaw kaw kheit lang a zuakuhpaw Esau hawte Pachia pawlangria leipaw na thua khyh nawlan oh raeringkuh oh.

¹⁷Pawccecize Esau nynh nyalangte hythuanaw rho kha he a ccou ry tuh mue kho vae khyh, hythuanaw kha mitphi te thawte a ccung zemah a paaw kya-e ngaesikunaw kha mue kho vae khyh cipaw na ny oh.

¹⁸Pawccecize nanning nynh kuih te ty khopaw mua kalan na thua khyh oh, tuh-e mua kyatuin maee aruapaw, maeking amanpaw te mohnaw a um, khise tho zah

¹⁹mungkae roi te bya roi accae; tuh-e roi a thae hae paw nynh mih kalan bya bua a ho vae khyh nawlan a ngia hae.

²⁰Pawccecize, “Sahiin nynh heize tuh-e mua tuh a ty ze, lung te deih athua cih,” cikuhpaw kawbya kha minmin nynh ngae ngan khyh hae.

²¹Tuh-e muih tuh myarya ri lan um zah Moses nynh, “Myaryamaw ka rih zah ka thyngkuh,” a ci.

²²Thuasalama nanning tuh Zion mua lang, ahiinpaw Pachia khuapi athuapaw vaaw Jerusalem lang, riatae lei vaaw hae lungpawte a tungkunaw hae kalan,

²³vaawlang kya min zei athuapaw ccatawccaw hae a pumkunaw hae kalan, ccungccaw balyn bya a piatupaw Pachia kalan, accingpaw lan rae athuapaw adingpaw ccungccaw hae muisaw hae kalan,

²⁴byakinnaw thawpaw kya-e hopiatu Jesu kalan te Abel chiise nynh a hopaw uccaw laeze ahoy huapaw uccaw kong a hopaw theipaw chiise kalan na thua vae oh.

²⁵Nanning nynh a hotupaw bya kha na ei khyh nawlan oh raeringkuh oh; pawccecize laephi vawlan a hotupaw bya a ei hae paw tuh detahnaw kyate a lue khyh hae ze, vaawlang te a hotupaw bya kha aening nynh ah ei oh ze, pawtemou ah lue kho cih oh?

²⁶Tuh ccyh lyakhe amaw roi nynh laephi kha a hysah; thuasalama atu aning nynh, “Tuhzemah laephi kyalya thua leite, vaawlang kha mah vaekheit bua ka hy ung cih,” cite byakinkute a ho.

²⁷Hynh-e, “Tuhzemah vaekheit bua,” cipaw bya nynh a langsakupaw tuh hy kho a um leipaw uccaw hae tuh po a um cih zah, ahy khopaw uccaw hae athuapaw raepaw uccaw hae tuh nue athua cih cinawpaw nynh thua.

²⁸Tukeiccuze ahy kho leipaw peenaw kha ah ccou oh keiccuze lungpawte um oh sih, sawtuanaw te rawrinaw ryte douccah lante Pachia kha beik oh sih.

²⁹Pawccecize aening ah Pachia tuh aruapaw maee nynh thua.