Read Zotung Chin HEBRU 13 Bible Online

HEBRU 13 - Zotung Chin bible

HEBRU 13

¹Uteno sungsakunaw kha po tynsah oh.

²Mikhia hae do-oihnaw kha la ning nan oh. Pawccecize tuhte mikhia do-oihnaw kya abang nynh vaaw hae kha tualeipite innccong a la thuasah hae.

³Thongccah hae paw kha ning nan oh; minmin ryte thongccahkheih hae paw hawte tuakuh oh; vawsawnaw a teing hae paw kha la ning nan oh, naemaw nae pyn kya tuhcite a teingpaw hawte tuakuh oh.

⁴Ccungccaw balyn nynh zuvaw tangnaw hynh sawtua lanpaw nynh thua, te zuvaw tangnawpaw ikhung mah thusah lanpaw thua khyh; a ohhuakuh hae paw te milae zu milae vawpaw ryte a sei hae paw tuh Pachia nynh byapia cih hae.

⁵Nae hiinzia tuh phua a duaa leipaw thua sah lah, na hoi oh paw uccaw hae khate nae lungryachih sah. Pawccecize Pachia nynh, “Nang kha kae cciataw boi lan khyh zah kae vua boi lan khyh,” a ci.

⁶Tukeiccuze, “Bawipaw tuh kae yn bawmtu thua zah ka rih lan khyh. Ccungccaw nynh pawmou yn cyih kho cih?” cite rawhoyte ah ho kho cih oh.

⁷Nae kya Pachia bya ae la hopah oh paw, nanning ae la cciakhae oh paw kha la ning nan oh. Mih hiinzia nynh a poukhaepaw kha tua biate, mih zynnaw kha thydokuh oh.

⁸Jesu Khri tuh inkhawnin, atunin te zungzae cia rulaekuh khyh.

⁹Alokuh leipaw ccangpyakunaw aphuinphuin nynh ae cciakhaesei nan oh sah; pawccecize aepaw te thua leite, thawccinaw liate lungthawsaesahpaw tuh ahoypaw nynh thua. Aepaw kyalya phang a tua hae paw tuh thanenaw mue khyh hae.

¹⁰Beikhang ccangkheit ah hoi oh zah, tuh-e kya tuh beikbu ryalahtu hae nynh aenaw kaw hoi khyh hae.

¹¹Pawccecize ranpibawi lupi nynh sahiin chii kha beikinnthyaa lungkhu lang teekhae zah seinaw hanlan silawnaw a rae vae ze, sahiin pyn hae kha ryabu atolang khe maee te a u hae.

¹²Tukeiccuze Jesu mah amaw a chii te ccungccaw hae kha thyaasah khylan koikua atolang khe a teing.

¹³Tukeiccuze aening nynh amaw kalan ryabu atolang cceih oh sih lah, a teingpaw saryanaw kha teingbua oh sih.

¹⁴Pawccecize aening tuh hein kya po atynpaw khuapi ah hoi khyh oh, yn thua cih paw khuapi kha nynh ah ccung oh.

¹⁵Tukeiccuze amaw liate Pachia kalan thehoysahnawpaw silawkunaw kha palei rae oh sih, tuh-e tuh amaw min kya lungtuabya hopaw khalang athae nynh thua.

¹⁶Ahoypaw cyi lanpaw te neethungbua lanpaw kha la ning nan oh; pawccecize tuhcihawpaw silawnaw hae kya Pachia tuh a lungrythua.

¹⁷Nanning ae uktu oh paw kaw kha ngae oh lah, mih bya kha zui oh. Pawccecize minmin tuh mih ryalaw kong a phykuh cih hae paw athua hawte, nanning kha ae do-oih oh. Ngaethyanaw te thua leite lungtuanaw te ryalah hae sah; pawccecize tuhte ngaethyanaw te rya a law hae paw tuh nae hanlan thanenaw um lan khyh.

¹⁸Kaening hanlan saw oun sangpah oh; kaening tuh mawtemaw nykunaw thinlung athyaapaw kae hoi zah pawpaw kya balyn kou hoy lante hiin lan kae ry cipaw kha kae nyku ccaccing.

¹⁹Kae tuh nae kalan taloi bua kae thua nawlan, saw yn la sangpah oh cite pekite kae ngia oh.

²⁰Zungzae atynpaw byakinnaw chiise liate, tuu hae kya-e alesaepaw Tuurintu, ah Bawipaw Jesu kha chinaw kyate a thoosahpaw, daenaw Pachia nynh,

²¹amaw malang a lungrythuapaw rya kha Jesu Khri liate nae kya lah zah a rynaw kha na rae kho nawlan oh, ahoypaw ryalaw miakaw kya nanning kha ae ccingsah vae oh sah. Jesu Khri kya zungzae te zungzae cia phu-enaw um sah. Amen.

²²Uteno hae, hyynawpaw bya hynh la ngaesang oh cite kae ngia oh; pawccecize nae kalan ccaw hynh adynnaw te nynh ka zei.

²³Ah unopaw Timote tuh a luesah vae hae cipaw la nyh oh. Aning tuh aro maw yn thua ze naemaw ryte kae muihkheih cih oh.

²⁴Nanning ae cciakhaetu oh paw balyn te mithyaa hae balyn kha la beihlang oh. Italy ram kya a um hae paw nynh nanning kha ae beihlang oh.

²⁵Nae balyn tungvaw kya thawccinaw la um sah. Amen.