Read Zotung Chin HEBRU 2 Bible Online

HEBRU 2 - Zotung Chin bible

HEBRU 2

¹Tukeiccuze aening nynh ah cciasei khyh nawlan oh, ah thae vae oh paw byaccing kha houh ah kyngku lan oh paw nynh thua.

²Pawccecize vaaw hae kha mangte hopaw bya tuh tyn zah, cyiseimenaw miakaw te kawngae leinaw nynh atazaepaw detahnaw kha a mue hae lanze thuasah,

³myarya alepaw khumnaw kha aening nynh pawlang ah ria khyh oh ze thuasah pawcihtemou ah lue kho cih oh? Bawipaw nynh masaty lya mawte a hopaw hynh-e khumnaw tuh ahme cite amaw bya a thae hae paw nynh aening kya ccaekia a khan hae.

⁴Tuh-e ccaekiakhantu hae ryte Pachia nynh mah muihsahnaw hae, ngaeangnaw hae te khuaruarunaw aphuinphuin khate thuasah, amaw a rynaw thyhte Thyaa Muisaw nynh a pyapaw lasung hae khate thuasah ccaekia a khan.

⁵Aening nynh ah ho oh paw, yn thua vae cih paw laephi kha Pachia nynh vaaw hae kuihkaw kya nung khyh.

⁶Thuasalama Ccathyaa san kheit kyakhe lukheitpaw nynh, “Ccungccaw tuh paw athua keiccu mou nang nynh na tua na lia? Tuhkhyhze, ccungccaw ccapaw tuh paw athua keiccu mou na do-oih?

⁷Amaw kha vaaw hae laeze ccapyh anehua lante na rae; phu-enaw te sawtuanaw kha na khungsakuh zah,

⁸pawpaw balyn kha a ccuphe kaw khe marya na nung,” cite ccaekiakhan zah a ho. Pawpaw balyn kha amaw zakaw marya a nung cipaw tuh amaw zakaw a nung leipaw pawsang um khyh cinawpaw nynh thua. Thuasalama pawpaw balyn amaw zakaw marya a nungpaw kha atu aening nynh ah muih loh khyh oh.

⁹Thuasalama Pachia thawccinaw liate ccungccaw miakaw hanlan chinaw taangtua khylan, vaaw hae laeze ccapyh anehua lante rae athuapaw Jesu kha aening nynh ah muih oh. Chinaw a teing keiccuze aning tuh phu-enaw te sawtuanaw lukhung kha khungsah athua.

¹⁰Pawpaw balyn tuh amaw liate um zah amaw hanlan athuapaw Pachia nynh ccaaw hae patae kha phu-enaw kalan a cciakhaenaw kya, minmin khumnaw a thokhaetupaw kha a teingsahnaw liate accingpaw lang a tangsahpaw tuh angaekuhpaw nynh thua.

¹¹Pawccecize a thyaasahtu te thyaasah athuapaw balyn tuh parouhte mih thonaw ccangkheit nynh thua. Tukeiccuze Jesu nynh minmin kha uno hae cite ko lan a maethyakhaekuh khyh.

¹²Aning nynh, “Ka uno hae kya na min kha ka siakhae cih, a pumkuh hae paw ngaelung kya namaw thehoysahnaw hlaw kha ka sah cih,” acikuh.

¹³Te, “Amaw kha ka doliakuh cih,” bua ci zah, “Pachia nynh yn pyapaw imua hae te kae tuh hein kya kae um,” bua acikuh.

¹⁴Tukeiccuze imua hae tuh chii te saw kha a neethungkuh bua hae paw athua keiccuze, Khri amaw mah tuhawte chii te saw kha a neethungkuh bua; tuhcite Khri a chinaw liate chinaw tungvaw kawhoitu Satan kha rote,

¹⁵chi raw a ri hae keiccuze mih hiin lungkhu balyn seetangnaw kya um hae paw kha luesah khylan nynh thua.

¹⁶Pawccecize Khri nynh vaaw hae kha bawm khyh hae, Abraham ciihan kha nynh a bawm cipaw phe aria.

¹⁷Tukeiccuze ccungccaw hae seinaw hanlan seishawnaw raepya khylan, Pachia te asekuhpaw uccaw hae kya Khri tuh thawccithyapaw te a lungzipaw Ranpibawi Lupi athua nawlan, pawpaw balyn kya a uno hae te a loku lan hae paw nynh thua.

¹⁸Amaw nynh tuhounaw kha a teing vae keiccuze tuhounaw a teing hae paw kha a bawm kho hae.