Read Zotung Chin HEBRU 3 Bible Online

HEBRU 3 - Zotung Chin bible

HEBRU 3

¹Tukeiccuze vaawlang te asekuhpaw konaw kya a pabua hae paw athyaapaw uteno hae, aening nynh ccaekia ah khan oh paw Locceihtu te Ranpibawi Lupi athuapaw Jesu kong kha tuatua oh.

²Moses tuh Pachia inn balyn kya a lungzi hawte, Jesu mah amaw a khangtupaw kya a lungzipaw nynh thua.

³Inn saktupaw tuh inn laeze sawtuanaw a ccouhua hawte, Jesu tuh Moses laeze phu-enaw mue lan angaekuh huapaw nynh thua.

⁴Pawccecize inn miakaw tuh ccungccaw lukhakheit nynh a sakpaw nynh thua, thuasalama pawpaw balyn a saktupaw tuh Pachia nynh thua.

⁵Moses tuh nyalang ho athua cih paw uccaw hae kha ccaekiakhan khylan Pachia inn balyn kya ryalahtu lu kheit hawte a lungzipaw nynh thua.

⁶Thuasalama Khri tuh Pachia inn kya ccapaw hawte a lungzipaw nynh thua. Aening nynh zynkunaw thuasah, ngaehoinaw kya-e lungtuanaw thuasah athangnaw cia tynkaring lan ah kyngku oh ze, aening tuh amaw a inn nynh ah thua oh.

⁷Tukeiccuze Thyaa Muisaw nynh, “Atunin amaw roi kha na thae oh ze,

⁸ramkaw kya syntaw nin kya a dou lya hae hawte nae lungkhung nan oh.

⁹Rya ka lawpaw balyn kha nae minpaaw hae nynh kum sung pali cia mang a muih hae pite kae kha yn syntawtua hae.

¹⁰Tukeiccuze kae tuh tuh-e ciihan kya ka thinria zah, ‘Mih thinlung tuh palei cceihsei zah ka laanpi kha nyh khyh hae,’ ka ci.

¹¹Tukeiccuze ka thinria zah, ‘Minmin tuh ka haeungnaw lungkhu lang tee lan khyh hae,’ cite bya ka kinku,” a ci.

¹²Uteno hae, nanning nynh zyn leinaw thinlung ahoy leipaw kha hoite, a hiinpaw Pachia kyate na pou khyh nawlan oh raeringkuh oh.

¹³Thuasalama “atunin” cite hopaw accyh a um lungkhu balyn tuh lu kheit te lu kheit nin takyhte thawzung la pyakuh oh. Tukhyhze tuh seinaw kya-e lingkunaw keiccu nae lungkhungsei cih.

¹⁴Pawccecize aening nynh atakaw e ah zynkunaw oh kha athangnaw cia tynkaring lan ah kyngku oh ze, aening tuh Khri a ruiban hae ah thua vae oh.

¹⁵Ccathyaa kyaze, “Atunin Pachia roi kha na thae oh ze, nae minpaaw hae nynh Pachia a dou lya hae hawte nae lungkhung nan sah,” a ci.

¹⁶Pawccecize mang a thae hae pite amaw a dou hae paw tuh hum hae mou? Moses nynh Izip ram kyate a cciakhae hae paw balyn kha thua khyh hae tou?

¹⁷Thuasalama kum sung pali lungkhu Pachia tuh hum tungvaw mou a thinria? Ramkaw kya mih rhua a huekuh hae paw, a sei hae paw kya thua khyh tou?

¹⁸A haeungnaw lungkhu lang minmin tuh tee lan khyh hae cite Pachia nynh hum hae mou bya a kinnuaku hae? Kawngae lei hae paw kha thua khyh tou?

¹⁹Tukeiccuze zyn leinaw keiccuze minmin tuh tee kho khyh hae cipaw ah muih oh.