Read Zotung Chin HEBRU 4 Bible Online

HEBRU 4 - Zotung Chin bible

HEBRU 4

¹Tukeiccuze Pachia haeungnaw lungkhu lang teenawpaw byakinpyakupaw mang a um pite, nanning kyaze lukhakheit nynh tee leite a um khyh nawlan raeringkuh oh sih.

²Pawccecize thehoypaw tuh minmin kalan mah hopya athua hawte, aening kalan hopya athua vae; thuasalama a thaetu hae nynh zynnaw te a lawku khyh hae keiccuze ho athuapaw bya tuh minmin hanlan thane khyh.

³Pawccecize a zyn hae paw aening tuh tuh-e haeungnaw lungkhu lang ah tee oh. Laephi athonaw aleihpaw kyate Pachia a ryalaw hae tuh phe athang vae zemah, “Ka thinria zah, ‘Minmin tuh ka haeungnaw lungkhu lang tee lan khyh hae,’ cite bya ka kinku,” a ci hawte nynh thua.

⁴Pawccecize Ccathyaa san kheit kya nin sarinaw nin kong kha hynhte a ho, “Pachia tuh nin sarinaw nin kya a ryalaw hae balyn kyate a haeung,” a ci.

⁵Tuh-e Ccathyaa kya, “Minmin tuh ka haeungnaw lungkhu lang tee lan khyh hae,” bua a ci.

⁶Tukeiccuze, ccungccaw abang hanlan tuh-e haeungnaw lungkhu lang tee khonaw phang a um, masaty thehoypaw hopya athua hae paw minmin tuh kawngae leinaw keiccuze tee khyh hae.

⁷Pachia nynh anin nin kheit kha, “Atunin” cite khya zah, ccyh khaw aro koute, langmawlya a la ho vae hawte, “Atunin Pachia roi kha na thae oh ze, nae lungkhung nan sah,” cite David kyate a ho.

⁸Pawccecize Joshua nynh minmin kha haeungnaw a la pya hae ze, tuh-e koute nin ccangpaw kong kha Pachia nynh la ho vae lan khyh.

⁹Tukeiccuze Pachia ccungccaw hae hanlan sabbath haeung nin tuh a um ung.

¹⁰Pawccecize Pachia nynh a ryalaw hae kha thangsah zah a haeung hawte, Pachia kya-e haeungnaw lungkhu lang a teepaw ccungccaw tuh amaw a ryalaw hae kyate a haeung.

¹¹Tukeiccuze minmin nynh kawngae leinaw keiccu a khuliaku hae hawte hum sanmah a khuliaku khyh nawlan, tuh-e haeungnaw lungkhu lang tee lan thawte zuakuh oh sih.

¹²Pawccecize Pachia Bya tuh ahiinpaw, athungpaw te kyn ning te ahepaw thaloi laeze ahe huapaw thua zah, hiinnaw te muisaw, kintui te ru atungkunaw hae phianaw cia heize a thuing khopaw nynh thua; thinlung kya-e tuanaw te paccynkunaw kha mah aphiathyapaw nynh thua.

¹³Pachia malang thuruh khopaw raepaw uccaw pawsang um khyh, pawpaw balyn tuh amaw malang khe akhawpaw um lei lante pong alangkuh; aening nynh ahmaw konglang kha amaw kya ah phykuh cih oh.

¹⁴Tukeiccuze vaawlang po a khung vae paw, alesaepaw Ranpibawi Lupi, Pachia Ccapaw Jesu ah hoi oh keiccuze ah ccaekiakhannaw kha tynkaring lan kyngkuh oh sih.

¹⁵Pawccecize aening ah Ranpibawi Lupi tuh aening thawzyanaw kya thawccihthya leipaw thua khyh, aning tuh aening hawte tuhounaw aphuinphuin a ing, thuasalama seinaw rae khyh.

¹⁶Tukeiccuze ahoboupaw ccyh kya bawmnaw mue nawlan, ngaethyaumsahnaw te thawccinaw kha ah mue nawlan oh, thawccinaw bawitungkhung kalan khe rawhoyte cceih oh sih.