Read Zotung Chin HEBRU 6 Bible Online

HEBRU 6 - Zotung Chin bible

HEBRU 6

¹Tukeiccuze Khri konglang atakaw ccangpyakunaw hae kha cciataw te, piccan thuanaw ccangpyakunaw kalan khe cceih oh sih. Achihpaw ryalaw kyate ngaesikunaw kong, Pachia zynnaw kong,

²Baptisma kong ccangpyakunaw, kuih khangnaw kong, michi thoothuinaw kong te zungzae byapianaw kong ccangpyakunaw hynh aleihpaw te bua tho vae leite piccan thuanaw kalan cceih oh sih.

³Pachia nynh oun ua ze, hynh-e hynh ah cyih cih oh.

⁴Pawccecize vaekheit awsah athua vae hae paw, vaawlang e lasung a taangtua vae hae paw, te Thyaa Muisaw a ccoubua vae hae paw,

⁵te Pachia bya ahoynaw te yn thua vae cih paw she kya-e thungnaw hae kha a taangtua vae hae paw,

⁶tuh-e hae nynh a khuliaku hae ze, Pachia Ccapaw kha mimaw hanlan bua a khiade hae paw thua zah raerae alangkuh lan maethyasah hae paw athua keiccuze minmin kha ngaesikunaw kalan bua kikhae lanpaw tuh thua kho khyh.

⁷Pawccecize laephi nynh amaw vawlan palei leih accahpaw khuaatui kha neih zah tuh-e vawlan ryalahtupaw hanlan thingthae-eccang kha a pousahpya, te tuh-e laelung tuh Pachia kyate hythuanaw kha a ccou.

⁸Thuasalama hinpaw te thabu a pousahpaw laephi tuh thane vae khyh zah, thyalawnaw kalan a naekuh vae, tuh-e athangnaw tuh maee te soi lanpaw nynh thua vae.

⁹Thuasalama sungsah hae paw, hynhcite nae kya kae ho zemah, nanning nynh khumnaw te azuikuhpaw uccaw, ahoy huapaw uccaw hae kha na cyih cih oh cite kae zynkuh.

¹⁰Pawccecize Pachia nynh nae ryalaw kha thuasah, mithyaa hae hanlan rya na lawpya vae oh paw te rya na lawpya ung oh paw kya amaw min hanlan na langsaku oh paw sungsahnaw kha thuasah kharouh ning lan ciate Pachia tuh a ding leipaw thua khyh.

¹¹Nanning lu raveih nynh na ngaehoinaw oh kha phe accing nawlan, tuhcihawpaw zuakunaw kha athangnaw cia na langsaku nawlan oh kou kae ry.

¹²Tuhteze nynh nanning tuh nae thawnaw leite, zynnaw te lungsaenaw liate byakinpyakunaw rho a ccou hae paw kha thydokuh hae paw na thua cih oh.

¹³Pawccecize Pachia nynh Abraham kha bya he a kinpakuh tuh, amaw lae ale huapaw min kha phyate byakinku lanpaw a um khyh keiccuze amaw te amaw kha byakinkuh zah,

¹⁴“Thanccingte nang kha hythua kae pya cih zah kae pungthungsah cih,” a ci.

¹⁵Abraham nynh lungsaete a ngaesang keiccuze byakinpyakupaw kha a mue.

¹⁶Ccungccaw hae nynh tuh mimaw laeze ale huapaw min kha phyate bya leih a kinku hae; byakinkunaw nynh hopaw bya kha tynsah zah bya-eikunaw balyn kha a thangsah.

¹⁷Tuhte Pachia nynh bya a kinpyaku hae paw rho a ccoutu hae tungvaw kya arulaekuh kho leipaw a khuakhannaw kha ccaerarih lan langsaku a ry keiccuze a byakinnaw liate a tynsah.

¹⁸Khynnaw ah mue vae oh paw aening nynh tuh ah malang oun nungpyapaw ngaehoinaw kha kyngku khylan, alepaw thawzung pyanaw ah hoi kho nawlan oh, hynbya a ho kho leipaw Pachia nynh arulaekuh kho leipaw uccaw ccangning kya hynhte a cyi.

¹⁹Tuh-e ngaehoinaw tuh phe ariapaw te atynpaw thinlung kya-e sivawhinpi hawte ah hoi oh zah, hminthyaa kya zokhawpaw boei lungkhu lang po a tee.

²⁰Melkhizedek thuanaw thyhte zungzae Ranpibawi Lupi athuapaw Jesu, aening hanlan Zeccuetupaw tuh tuh-e kalan phe a tee vae.