Read Zotung Chin HEBRU 9 Bible Online

HEBRU 9 - Zotung Chin bible

HEBRU 9

¹Masaty byakinnaw nynh heize Pachia beiknaw phung hae te laephi vaw e beikinnthyaa kha a hoi.

²Pawccecize beikbu kha sak hae zah, masaty khaan kya maeekhuatung, ccaboi te Nungpyapaw sanlou a um hae; tuh-e khaan tuh Hmin Thyaa a ci hae.

³Ccangningnaw zokhawpaw boei nulang khe Athyaa Huaccepaw Hmin a ci hae paw khaan a um.

⁴Tuh-e khaan kya mynkhuhpaw unawpaw sui silawhang te sui te po lekuh lan alaeekuhpaw byakin thingkua a um, tuh-e lungkhu kyatuin manna nungnawpaw sui ang, anaw toihpaw Aaron hoitang te byakin lungphe hae a um.

⁵Tuh-e byakin thingkua vawlan phu-enaw kya-e cherub hae nynh ngaethyaumsahnaw tungkhung kha phang a dawkhaw hae, tuh-e kong tuh atu phe ccing lan ah ho kho loh khyh oh.

⁶Tuh-e uccaw hae tuh tuhcite paccyn he athua te, ranpibawi hae nynh mih rya kha law khylan, beikbu masaty akhaan lungkhu langkhe leih a tee hae.

⁷Thuasalama ccangningnaw akhaan lungkhu lang tuh ranpibawi lupi rou nynh chii ryte kum kheit ze vaekheit kyalya a tee. Amaw hanlan te ccungccaw hae nynh nyku leite a rae hae paw seinaw hanlan tuh-e chii te aning nynh si a law.

⁸Ccangkheitnaw beikbu phang a thadyn lya tuh beikinnthyaa lungkhu lang ccianaw tuh hungpya thua loh khyh cipaw kha hynhcite Thyaa Muisaw nynh a muihsah.

⁹Tuh-e beikbu tuh atu ccyh hanlan muihsahnawpaw nynh thua; tuh-e beikbu kya Pachia pyapaw te silawkunaw hae paw kha pya hae zah, tuh-e nynh a beiktu hae mawtemaw nykunaw thinlung kha ccingsah kho khyh.

¹⁰Tuh-e tuh aepaw, niapaw, singkupaw aphuinphuin te pynsaw te asekuhpaw phunglang hae kyalya thua zah raethuinaw ccyh kyacia rou nynh mang athua.

¹¹Thuasalama Khri tuh phe alangkuh vae paw ahoypaw uccaw hae kya-e ranpibawi lupi lante yn thua zah, kuih te rae leipaw, tuh-e ho rypaw tuh kuih te rae athua leipaw, hynh-e raenaw kya-e athua leipaw, lesaehua zah houh accingpaw beikbu liate,

¹²miaa hae te vaetuataw hae chii liate thua vae leite, amaw a chii liate Hmin Thyaa lungkhu lang vaekheit kyalya teete, aening hanlan zungzae shawkhawnaw kha oun raepya.

¹³Pawccecize tangnuapaw hae te miaa hae chii, te maee te upaw vaetua tohlaw buhhaw hae khate a thyaa lei hae paw kha theipaw nynh pynsaw ccikanku nawlan a thyaasah kho lanze,

¹⁴zungzae tynpaw Muisaw liate Pachia kya ccaenaw um leipaw, amaw te amaw a pyakuhpaw, Khri chii nynh a chihpaw ryalaw kyate a hiinpaw Pachia ryalawpya khylan naemaw nykunaw thinlung kha pawcihmou houh a thyaasah kho cih!

¹⁵Tukeiccuze Khri tuh byakinnaw thawpaw kya-e hopiatu nynh thua, tuhteze nynh Pachia nynh a ko hae paw tuh bya a kinpyaku hae paw zungzae tynpaw rho uccaw kha a ccou kho cih hae, pawccecize masaty byakinnaw zakaw kya cyiseimenaw kha shawkhaw khylan Khri tuh chinaw a ing vae.

¹⁶Rhohuinaw kong hynh ho lanze rhohuitu a chih koute rou nynh zui lanpaw athua.

¹⁷Pawccecize rhohuitupaw a chih koute nynh rhohuinaw tuh cyi khonaw a hoi, rhohuitu phang a hiin lya tuh rhohuinaw nynh kharouh kaw hoi kho khyh.

¹⁸Tukeiccuze masaty byakinnaw kha heize chii leite tynsah thua khyh.

¹⁹Pawccecize Moses nynh kawbya ccauh kya-e kawbya miakaw kha ccungccaw hae balyn kalan a hopah kou hae te, tui pykuhpaw vaetuataw chii te miaa chii kha lah zah sekakungpaw tuuming te hyssop khate ccauh te ccungccaw hae balyn kha thei hae zah,

²⁰“Hynh-e tuh Pachia nynh nanning ae pya oh paw byakinnaw kya-e chii nynh thua,” a ci.

²¹Tuhawte beikbu te Pachia beiknaw kya mangpaw uccaw hae balyn kha mah chii te pong a thei.

²²Kawbya thyhte pawpaw balyn chii liate vya thang lan thyaasah athua, chii luanaw um leite seingaethyanaw um khyh.

²³Tukeiccuze vaawlang umpaw uccaw hae pungsan kha khahcihawpaw silawnaw hae te thyaasah lanpaw tuh ahoboupaw nynh thua; vaawlang te asekuhpaw uccaw hae tuh tuh-e hae laeze ahoy huapaw silawnaw te nynh thyaasah athua.

²⁴Pawccecize thanccingpaw pungsan athuapaw, kuih te raepaw beikinnthyaa lungkhu lang Khri tuh tee khyh; atu aening ccelang Pachia muihnaw kya langku khylan, vaawram lang nynh a tee.

²⁵Tuhzemah ranpibawi lupi nynh amaw chii athua leipaw ryte Hmin Thyaa lungkhu lang kum takyh a tee hawte, Khri nynh amaw te amaw kha palei pyaku lan tee vae khyh.

²⁶Tuhte a la thua lanze, laephi athotakaw te aning tuh palei a la teing vae cih; amaw te amaw silawkunaw liate seinaw kha ccaring vua khylan atu she athangnaw kya vaekheit rou nynh a langku.

²⁷Ccungccaw hae hanlan vaekheit chi lanpaw tuh laerui-awdepaw thua zah tuh-e koute byapianaw a um hawte,

²⁸Khri nynh ccungccaw patae seinaw kha phu khylan vaekheit kyalya a pyaku. Amaw kha ngaehoite a ngawpaw ccungccaw hae kha khum khylan aning tuh seinaw te asekuh lei lante vaeningnaw bua yn langkuh ung cih.