Read Zotung Chin 2 PETER 3 Bible Online

2 PETER 3 - Zotung Chin bible

2 PETER 3

¹Sungsah hae paw, hynh-e vaeningnaw ccaky hynh atu nae kalan kae zei. Ccaky ccangning kyahin nanning kha bua nysah thui te athyaapaw nae thinlung kha kae thosah oh.

²Langmawlya athyaapaw profeh hae nynh a hoty hae paw bya te Bawipaw Khumtu nynh nae locceihtu hae kyate a hopaw kawbya kha na liathui nawlan oh nynh kae zei.

³Masaty na ny lan oh paw tuh: nyathyakou ccyh kya, mimaw ryduaanaw thyhte a hiin hae paw ccungccaw saryatu hae oun langkuh cih hae.

⁴Minmin nynh, “Amaw yn thuanaw lanpaw byakinpyakunaw tuh teimou a um? Pawccecize minpaaw hae a i ccyh hae kyate tho zah pawpaw balyn tuh raenaw athonaw kya hawmawte nynh atu mah po acyiku,” cite oun ho cih hae.

⁵Pawccecize langmawlya Pachia bya liate vaawlang tuh la um zah, laephi hynh mah tui kyate yn langkuh zah tui te raepaw nynh thua,

⁶tuh lyaze laephi tuh tui nynh khaleih vu zah phe aroh cipaw kha minmin nynh a ny hae zemah pawlangria khyh hae.

⁷Thuasalama atu a umpaw vaawlang te laephi hynh byapianaw nin te Pachia pawlangria leipaw ccungccaw hae ronaw nin kyacia maee te ro khylan tuh-e bya liate phang ccy athua.

⁸Thuasalama sungsah hae, Bawipaw hanlan nin kheit tuh kum thong kheit hawte, kum thong kheit tuh nin kheit hawte athuapaw hynh-e uccaw ccangkheit hynh ning nan oh.

⁹Ccungccaw abang nynh a thysung cite a tua hae hawte, Bawipaw tuh byakinpyakunaw kong lante a thysung khyh. Lu kheit san ro leite ccungccaw balyn a ngaesiku nawlan hae a ry keiccu nynh aening kya a lungsae.

¹⁰Thuasalama Bawipaw Nin tuh khuazi kya miruh a thua hawte nynh yn thua cih. Tuh-e Nin kya vaawlang tuh myarya ccaepaw siaruanaw khate azo cih, vaawlang a umpaw uccaw hae tuh maee nynh oun u cih hae zah marya oun roh cih. Laephi te a vawlan um hae paw mah phe athang cih hae.

¹¹E uccaw hae balyn tuh ro athua cih keiccuze athyaapaw hiinzia te Pachia rawrinaw kya pawcihawpaw ccungccaw lang mou thua lan na ccan oh?

¹²Pachia Nin yn thua lanpaw kha na ngaw oh keiccuze tuh-e Nin tuh arangte yn thuasah nawlan hoyte zuakuh oh. Tuh-e nin kya vaawlang tuh maee te ro athua cih, vaawlang e uccaw hae kha maee nynh oun u cih hae.

¹³Tuhzemah aening tuh bya oun kinpyaku thyhte dingnaw a umnaw vaaw thawpaw te laephi thawpaw kha nynh ah ngaw oh.

¹⁴Tukeiccuze sungsah hae, tuh-e uccaw hae tuh na ngaw oh keiccuze athupaw um leite, ccaenaw hoi leite daenaw kya amaw nynh ae muih nawlan oh thawte zuakuh oh.

¹⁵Aening ah sungsah oh paw, ah unopaw Paul nynh mah amaw kya pya athuapaw hawnaw thyhte nae kalan phe a zei vae hawte, ah Bawipaw kya-e ngaesangnaw tuh khumnaw nynh thua cipaw la nyh oh.

¹⁶Aning nynh a ccaky hae balyn kya mah hynh-e uccaw hae kong hynh a la ho. A ccaky hae kya thaethya lan arupaw abang a um. Tuanaw a zya hae paw te thinlung atyn lei hae paw nynh ccangpaw Ccathyaa hae kha asuilan a mae hae hawte mimaw ronaw hanlan a maeku hae.

¹⁷Tukeiccuze, sungsah hae paw nanning, hynh-e uccaw hae hynh na nyty vae oh hawte, ccungccaw hoylei hae kya-e cyiseinaw khate cciakhaesei na thua khyh nawlan oh, naemaw na tynnaw oh kyate na khuliaku khyh nawlan oh la raeringkuh oh.

¹⁸Ah Bawipaw te Khumtu Jesu Khri a thawccinaw te amaw nynaw kyakhe lethung oh. Amaw kyakhe phu-enaw tuh atu te zungzae cia la um sah. Amen.