Read Zotung Chin BYAPIATU 1 Bible Online

BYAPIATU 1 - Zotung Chin bible

BYAPIATU 1

¹Joshua a chih koute Israel hae nynh BAWIPAW kha, “Kanaan hae kha tuk khylan kaening hanlan hummou masaty a cceih cih?” cite a khia hae.

²BAWIPAW nynh, “Judah nynh a cceih cih. Ram kha a kuih kya ka pya vae,” a ci.

³Judah nynh a upaw Simeon kha, “Kanaan hae kha tuk khylan ka ccoupaw ram lungkhu lang yn cciakhae; kae nynh mah na ccoupaw ram lungkhu lang kae cciakhae ru cih,” a cipya. Tukeiccuze Simeon nynh a cciakhae.

⁴Te Judah nynh cceih zah Kanaan hae te Periz hae kha BAWIPAW nynh mih kuih kya pya hae zah, Bezek khua kya ccungccaw thong haw kha a chia hae.

⁵Bezek khua umpaw Adonibezek kha ccianua hae zah a tuk hae, Kanaan hae te Periz hae kha a tae hae.

⁶Adonibezek tuh a ccue, thuasalama deehuite kyng hae zah a kuihpi te a ccupi kha thoh tya hae.

⁷Adonibezek nynh, “Mih kuihpi te mih ccupi tya athua hae paw siapharan hae sung sari nynh ka ccaboi kaw e loohmoi hae kha leih a khuingku hae; ka la cyi hawte Pachia nynh yn liaru vae,” a ci. Jerusalem lang cciakhae hae zah tuin kya a chih.

⁸Te Judah hae nynh Jerusalem kha tuk hae zah a law hae, thaloi te bae hae zah maee te a soi hae.

⁹Tukoute muaram hae, Negeb te laelung anenaw kya um hae paw Kanaan hae kha tuk khylan Judah hae nynh a ccianua hae.

¹⁰Judah hae nynh Hebron khua kya um hae paw Kanaan hae kha ccianua hae zah, Sheshai, Ahiman te Talmai kha a tae hae (Hebron khua a min tuh langmawlya Kiriath-arba acikuh).

¹¹Tuin kyate Judah hae nynh Debir khuaccaaw hae kha a ccianua hae (Debir khua a min tuh langmawlya Kiriath-sefer acikuh).

¹²Te Kaleb nynh, “Kiriath-sefer khua kha tuk zah a lah khopaw tuh ka ccanung kha zu lang ka pya cih,” a ci.

¹³Kaleb neitawpaw Kenaz ccapaw Othniel nynh tuh-e khua tuh lah zah, Kaleb nynh a ccanung Aksah kha zu lang a pya.

¹⁴Aksah nynh a kya a thua te, Othaniel tuh Aksah nynh a paaw loo ccyng kheit kha ngia lan a naw. Aksah tuh a lann tungvaw te a sahkuh te, Kaleb nynh, “Pawmou na ry?” cite a khia.

¹⁵Aksah nynh, “Lasung ccangkheit beih yn pya; kae hynh Negeb ram kya nae umsah keiccuze Tuisung kha mah beih yn pya,” a cipya. Tukeiccuze Kaleb nynh Palung Tuisung te Alia Tuisung kha a pya.

¹⁶Moses a pupaw Ken minphuin Hobab ciihan hae tuh Judah hae ryte ungcci ku khua kyate Arad khua pe e Negeb kya umpaw Judah ramkaw langkhe cceih hae zah Amalek hae ryte khua a sahkheih hae.

¹⁷Judah tuh a upaw Simeon ryte cceih hae zah Zefath khua kya um hae paw Kanaan hae kha tae hae zah, khaleih a ro hae. Tukeiccuze tuh-e khua min tuh Hormah a ci hae.

¹⁸Judah nynh Gaza khua te a pepan e ram, Ashkelon khua te a pepan e ram, Ekron khua te a pepan e ram hae kha a law hae.

¹⁹BAWIPAW nynh Judah kha umkhae zah, muaram kha a law kho, thuasalama bialae um hae paw tuh sivaw marangle a hoi hae keiccuze dee kho khyh hae.

²⁰Moses nynh a ho hawte, Hebron kha Kaleb a pya hae; aning nynh Anak ccapaw hae lu thum kha tuin kyate a dee hae.

²¹Thuasalama Benjamin phin hae nynh Jerusalem kya um hae paw Jebus hae kha dee khyh hae; tukeiccuze Jebu hae tuh Benjamin phin hae ryte Jerusalem kya atunin cia a umkheih hae.

²²Josef ciihan hae nynh mah Bethel kha tuk lan a ccianua hae; BAWIPAW tuh minmin kya a um.

²³Josef ciihan hae nynh Bethel langkhe dophitu hae kha a saw hae (tuh-e khua min tuh langmawlya Luz acikuh).

²⁴Khua lungkhu te yn cceihpaw ccungccapaw lu kheit kha dophitu hae nynh muih hae zah, “Khua lungkhu lang a teepaw laanpi kha beih oun hopya tua, te na tungvaw thawccinaw kae hoi cih,” a cipya hae.

²⁵Tetuh aning nynh khua lungkhu lang a teepaw laanpi kha a hopya hae; te minmin nynh khuaccaaw hae kha thaloi te a bae hae, thuasalama tuh-e ccungccapaw te a innbyn hae balyn kha tuh a cciasah hae.

²⁶Tuh-e paw tuh Hit hae ram lang cceih zah khua khuakheit rae zah Luz cite min a phu; atunin cia tuh-e tuh a min nynh thua.

²⁷Manasseh nynh Beth-shean khua te a khua taraw hae kya um hae paw, Taanak khua te a khua taraw hae kya um hae paw, Dor khua te a khua taraw hae kya um hae paw, Ibleam khua te a khua taraw hae kya um hae paw te Megiddo khua te a khua taraw hae kya um hae paw kha dee khyh hae; Kanaan hae tuh tuin ram kya po a um hae.

²⁸Israel hae nynh thawzung oun hoi hae tuh, Kanaan hae kha nangsete ryalawsah hae zah dee tuh dee khyh hae.

²⁹Efraim nynh Gezer khua kya um hae paw Kanaan hae kha dee khyh hae; Kanaan hae tuh minmin ryte Gezer khua kya a umkheih hae.

³⁰Zebulun nynh Kitron khuaccaaw hae, Nahalol khuaccaaw hae kha dee khyh hae; Kanaan hae tuh minmin kya umbua hae zah nangsete ryalawsah athua hae.

³¹Asher nynh Akko khuaccaaw hae, Sidon khuaccaaw hae, Ahlab khuaccaaw hae, Akzip khuaccaaw hae, Helbah khuaccaaw hae, Afik khuaccaaw hae te Rehob khuaccaaw hae kha dee khyh hae;

³²Asher phin hae nynh tuin ram kya um hae paw Kanaan hae kha a dee khyh hae keiccuze minmin ryte a umkheih hae.

³³Naftali nynh Beth-shemesh khuaccaaw hae, Beth-anath khuaccaaw hae kha dee khyh hae, tuin ram kya um hae paw Kanaan hae ryte a umkheih hae; tuhzemah Beth-shemesh khuaccaaw hae te Beth-anath khuaccaaw hae tuh minmin hanlan nangsete ryalawpahtu lang a tang hae.

³⁴Amor hae nynh Dan hae kha muaram langkhe dee hae zah, bialae lang rungbung lan kaw-ua khyh hae.

³⁵Amor hae tuh Har-heres mua, Aijalon te Shaalbim kya po a um hae, thuasalama Josef ciihan hae tuh thawzung a hoi hae keiccuze minmin tuh nangsete ryalawsahpaw lang a tang hae.

³⁶Amor hae ramri tuh Akrabbim kaethungnaw te Sela kyate palung lang po a kaethung.