Read Zotung Chin BYAPIATU 10 Bible Online

BYAPIATU 10 - Zotung Chin bible

BYAPIATU 10

¹Abimelek koute Issakhar phin, Dodo ccapaw Puah a ccapaw Tola tuh Israel hae luesah khylan yn langkuh, aning tuh Efraim muaram, Shamir khua kya a um.

²Aning tuh Israel hae kya kum kuin lae thum cia byapiatu lang a tang. Te aning tuh chih zah Shamir khua kya a uu hae.

³Tola koute Gilead phin Jair tuh yn langkuh zah, Israel hae kya kum kuin lae ning cia byapiatu lang a tang.

⁴Aning tuh lann sung thum a ccikuh hae paw ccapaw sung thum a hoi; minmin tuh Gilead ram kya khua sung thum hoi hae zah, atunin cia Havvoth-jair cite ko athua hae.

⁵Jair tuh chih zah Kamon khua kya a uu hae.

⁶Israel hae tuh BAWIPAW malang khe hoyleinaw kha bua rae hae zah, Baal te Astartes pachia hae, Aram pachia hae, Sidon pachia hae, Moab pachia hae, Ammon hae pachia hae, Filistin hae pachia hae kha a beik hae. Tuhcite BAWIPAW kha vua hae zah amaw kha beik khyh hae.

⁷Tukeiccuze BAWIPAW tuh Israel tungvaw myarya a thinria zah, Filistin hae kuih te Ammon hae kuih kalan a zua hae,

⁸minmin nynh Israel hae kha tuh-e kum kya reih hae zah a tuaa a sah hae. Jordan khuraw lang Gilead ram kya umpaw Amor ram e Israel hae balyn kha kum haw lae tarya lungkhu a tuaa a sah hae.

⁹Ammon hae nynh mah Judah, Benjamin te Efraim ciihan hae kha dou khylan Jordan vaw a zua hae; tukeiccuze Israel tuh myarya vawsawte a um.

¹⁰Tetuh Israel hae nynh BAWIPAW kalan sia hae zah, “Kaening nynh na tungvaw kae sei vae, pawccecize kae Pachia kha kae vua zah Baal pachia hae kha kae beik vae,” a ci hae.

¹¹Te BAWIPAW nynh Israel hae kha, “Izip hae, Amor hae te Filistin hae kyate nanning kha kae luesah khyh oh tou?

¹²Sidon hae, Amalek hae te Maon hae nynh nanning kha ae tuaa ae sah oh; te ka kalan nae sia oh zah mih kuih kyate kae luesah oh.

¹³Tuhzemah kae kha nae vua oh zah ccangpaw pachia hae kha na beik oh; tukeiccuze kae luesah vae lan khyh oh.

¹⁴Cceih oh lah, na poku oh paw pachia hae kalan khe sia oh; nae vawsaw lyakhe tuh-e hae nynh ae luesah oh sah,” a cipya hae.

¹⁵Te Israel hae nynh BAWIPAW kha, “Kae sei vae; ahoy na ci hawte kae tungvaw oun cyih; thuasalama atunin beih oun luesah!” a ci hae.

¹⁶Tetuh ramccang pachia hae kha mih kyate vua hae zah BAWIPAW kha a beik hae; te Israel hae teingnaw a muih tuh a lunghoy khyh.

¹⁷Te Ammon hae tuh zunghe ccyngku lan suelua thua hae zah, Gilead ram kya a rya hae; Israel hae tuh sueluakuh hae zah Mizpah khua kya a rya hae.

¹⁸Gilead ccungccaw hae rhawbawi hae nynh, “Ammon hae khuh hum nynh mou a tuk ty cih hae? Tuh-e paw tuh Gilead ram um hae paw balyn kyaze lupi athua cih,” a ciku hae.