Read Zotung Chin BYAPIATU 11 Bible Online

BYAPIATU 11 - Zotung Chin bible

BYAPIATU 11

¹Gilead minphuin Jefthah cikuhpaw ohhuanung ccapaw tuh a rawthungpaw rhawkaw nynh thua. Gilead tuh Jefthah a paaw nynh thua.

²Gilead zu nynh mah ccapaw hae kha a saahpya; a zu ccapaw hae he oun le hae tuh, Jefthah kha ccaring dee hae zah, “Kae paaw inn kya-e rho ccapyh san na ccoubua lan khyh; pawccecize nang tuh nung ccangpaw ccaaw nynh na thua,” a cipya hae.

³Tetuh Jefthah tuh a neitaw hae kyate ccue zah Tob ram kya a um. Ccungkia lei hae paw tuh Jefthah kya sueluakuh hae zah a nulang a zuikuh hae.

⁴Ccyh sosoh koute Ammon hae nynh Israel hae kha rhawtuk hae.

⁵Ammon hae nynh Israel hae kha rhaw he a tuk hae tuh, Gilead piccan hae tuh Jefthah kha Tob ram kyate ko khylan a cceih hae.

⁶Minmin nynh Jefthah kha, “Ammon hae kha tuk khylan yn cceih lah, kae rhawbawi lang oun tangpah,” a cipya hae.

⁷Thuasalama Jefthah nynh Gilead piccan hae kha, “Nanning tuh kae nae vua oh paw te ka paaw inn kyate nae dee oh paw na thua khyh oh tou? Atu vawsaw na tung oh te, pawccemou ka kalan nae ccia oh?” a cipya hae.

⁸Gilead piccan hae nynh Jefthah kha, “Tukeiccu latu, atu na kalan kae maeleihku, kae kya cceihbua lah, Ammon hae kha dou lan hae, te Gilead ram kae umpaw balyn kya lu lang na tang cih,” a cipya hae.

⁹Jefthah nynh Gilead piccan hae kha, “Ammon hae tuk khylan inn lang nae kikhae oh zah, BAWIPAW nynh minmin kha ka kuih kya yn pya ze, kae tuh nae lu lang ka tang cih,” a cipya hae.

¹⁰Te Gilead piccan hae nynh Jefthah kha, “BAWIPAW tuh aening laku kya ccaekia athua cih; na ho hawte solei kae cyih cih,” a cipya hae.

¹¹Tukeiccuze Jefthah tuh Gilead piccan hae ryte cceih hae zah, ccungccaw hae nynh lupi lang te cciakhaetu lang a nungku hae; te Jefthah nynh tuh-e a bya balyn tuh Mizpah khua kya BAWIPAW malang khe a hopya.

¹²Te Jefthah nynh Ammon hae siapharan kalan khe locceihtu hae saw hae zah, “Ka ram kha dou khylan ka kalan ccianua ciate nang te kae laku paw bya mou a um?” a ci.

¹³Ammon hae siapharan nynh Jefthah a locceihtu hae kha, “Israel hae nynh Izip ram kyate oun ccia lya hae khe ka ram kha Arnon vaw kyate Jabbok vaw kyacia, Jordan vaw phe thua lan a law hae keiccu nynh thua; tukeiccuze atu daebabi lante yn pyathui,” a cipya.

¹⁴Jefthah nynh Ammon hae siapharan kalan khe locceihtu hae kha bua saw hae zah,

¹⁵“Jefthah nynh hynhte aho: Israel hae nynh Moab ram thuasah, Ammon hae ram thuasah lah khyh hae,

¹⁶thuasalama Izip ram kyate oun kaethung lya hae ze, Israel hae nynh ramkaw kyakhate Rili Se kalan po cceih hae zah, Kadesh khua a thua hae.

¹⁷Te Israel hae nynh Edom siapharan kalan locceihtu hae saw hae zah, ‘Na ram lungkhu kya beih oun cciasah,’ a cipya hae; thuasalama Edom siapharan nynh ua khyh hae, Moab siapharan kalan saw hae zahmah a nawccah khyh. Tukeiccuze Israel hae tuh Kadesh khua kya a um hae.

¹⁸Te ramkaw kyakhate cceih hae zah Edom ram te Moab ram kha po voi hae zah Moab ram nithua langkhe a thua hae, te Arnon khuraw langkhe a rya hae. Moab ram lungkhu lang tee khyh hae, pawccecize Arnon vaw tuh Moab ramri nynh thua.

¹⁹Te Israel hae nynh Amor hae siapharan Sihon, Heshbon siapharan kalan khe locceihtu hae kha a saw hae; te Israel hae nynh amaw kha, ‘Na ram lungkhu te kae ram lang po beih oun ccia sah,’ cite a hopya hae.

²⁰Thuasalama Sihon nynh Israel kha a ram lungkhu po ccia lan zyn khyh; tukeiccuze Sihon nynh a ccungccaw hae balyn kha pum hae zah, Jahaz kya ryahmin tahkute Israel kha a tuk.

²¹BAWIPAW , Israel Pachia nynh Sihon te a ccungccaw hae balyn kha Israel kuih kalan pya hae zah a tae hae; tukeiccuze tuin ram kya umpaw Amor hae ram balyn kha Israel hae nynh a law hae.

²²Minmin nynh Amor hae ram balyn kha Arnon kyate Jabbok kyacia, ramkaw kyate Jordan vaw kyacia a law hae.

²³Tuhcite BAWIPAW , Israel Pachia nynh a ccungccaw Israel hae hanlan Amor hae kha a taepya hae. Nang nynh mih umnaw hmin kha law lan na tuaku tou?

²⁴Na pachia Khemosh nynh ccou lan ae pyapaw kha na ccou lan ccan khyh tou? BAWIPAW kae Pachia nynh kae hanlan oun taepyapaw miakaw kha kaening nynh kae ccou lan khyh tou?

²⁵Moab ram e Zippor ccapaw Siapharan Balak laeze nang tuh na hoyhua zawtou? Aning nynh Israel hae kha a dou boi hae zawtou? Minmin kha tuk khylan a ccianua boi hae zawtou?

²⁶Heshbon te a khua taraw hae kya te Aroer vahue umpaw khua hae balyn kya Israel hae nynh kum za thum a um lya hae khe, pawccemou nanning nynh na lawthui khyh oh?

²⁷Kae tuh na tungvaw ka sei khyh, kae kha nae tuk keiccuze nang tuh ka tungvaw na sei. Byapiatu athuapaw BAWIPAW nynh atunin kya Israel hae te Ammon hae laku byapae vae sah,” a cipya.

²⁸Thuasalama Jefthah nynh bya a tawpaw kha Ammon hae siapharan nynh pawlangria khyh.

²⁹Te BAWIPAW muisaw tuh Jefthah tungvaw yn thua zah, Gilead ram te Manasseh ram kya po a cceih. Gilead ram Mizpah khua lang po cceih zah, Gilead ram Mizpah khua kyate Ammon hae kalan po a cceih.

³⁰Jefthah nynh BAWIPAW kya byakinkuh zah, “Ammon hae hynh ka kuih kya nae pya zetuh,

³¹Ammon hae kyate taenaw te he ka ki te, kae kha cciadue khylan ka inn thuakaw kyate yn poupaw ahumhung zemah BAWIPAW kya-e athua cih zah, maee-ute silawnaw lante kae pya cih,” a ci.

³²Tetuh Jefthah tuh Ammon hae kha tuk khylan cceih zah BAWIPAW nynh minmin kha a kuih kya a pya.

³³Aroer kyate Minnith khua pe cia, Abel-keramim khua kyacia khua khuakuin kha patae a tae hae. Tuhcite Israel hae malang khe Ammon hae tuh a shung hae.

³⁴Jefthah tuh Mizpah kya umpaw a inn lang yn cceih zah, a ccanung nynh amaw kha cciadue khylan vaedaw khuakute law biate yn cceih. Aning tuh lu kheit kyalyapaw ccanung nynh thua, tuhlaepaw ccanung ccapaw hoi vae khyh.

³⁵Jefthah nynh a ccanung kha he a muih tuh, a boeining kha seii zah, “Ezou, ka ccanung! Ka thinlung phe nae koisah vae; nang tuh myarya lepaw vawsawnaw yn pyatu lang nynh phe na tang vae. Pawccecize BAWIPAW kalan bya phe ka ho vae, bya ka kinkupaw kha ka lahthui kho vae lan khyh,” a cipya.

³⁶Aning nynh a paaw kha, “Apang, BAWIPAW kalan bya phe na ho vae zetuh, na mung te na ho vae thyhte ka tungvaw yn cyih, BAWIPAW nynh na rhaw Ammom hae tungvaw phu ae lawsah vae hae,” a cipya.

³⁷Te aning nynh a paaw kha, “E uccaw hynh beih yn cyipya tua: Sawpaw sah ning lungkhu beih yn cciasah tua, tuhteze nynh ka cceih cih zah mua vawlan khiakute liaccady ka thuanaw hynh ka ban hae ryte kae rawkhae cih,” a cipya.

³⁸A paaw nynh, “La cceih,” cipah zah sawpaw sah ning lungkhu a saw. Tukeiccuze a ban hae ryte cceih hae zah, mua vawlan khe liaccady athuanaw kha a rawkhae hae.

³⁹Sawpaw sah ning aro te, a paaw kalan yn ki zah, a paaw nynh bya a kinku thyhte a tungvaw a cyi. Tuh-e nopinung tuh pise te ihkheih boi khyh hae. Tukeiccuze tuh-e tuh Israel hae kya phungtho lang yn tang zah,

⁴⁰Israel minphuin nopi hae nynh Gilead phin Jefthah ccanung hanlan raw khylan kum kheit ze nin pali atolang a pou hae.