Read Zotung Chin BYAPIATU 12 Bible Online

BYAPIATU 12 - Zotung Chin bible

BYAPIATU 12

¹Efraim phin hae tuh zunghe lawkute Zafon lang cceih hae zah Jefthah kha, “Ammon hae tuk khylan kaening kha kobua leite pawccemou vaw na zua? Na inn ryte maee kae soihbia cih oh!” a cipya hae.

²Jefthah nynh minmin kha, “Kae te ka ccungccaw hae tuh Ammon hae ryte thawte kae rhawkuh. Nanning kha kae ko oh zah mih kuih kyate nae luesah khyh oh.

³Nae luesah khyh oh paw kha he ka muih tuh, ka chi ze ka chih cite Ammon hae kha tuk khylan vaw kha ka zua, te BAWIPAW nynh minmin kha ka kuih kya yn pya hae. Kae kha tuk khylan pawccemou atunin nae ccianua oh?” a cipya hae.

⁴Te Jefthah nynh Gilead hae kha pum hae zah Efraim kha a tuk hae; “Efraim te Manasseh hae thinlung kya tuh nanning Gilead hae hynh Efraim phin kyate a ccue hae paw nynh na thua oh,” cite Efraim hae nynh a ci hae keiccuze Gilead hae nynh minmin kha a chia hae.

⁵Gilead hae nynh Jordan vaw zuanaw balyn kha Efraim hae kha a khee hae. A ccuepaw Efraim hae lukhakheit nynh, “Vaw hynh beih yn zua sah,” a ci ze, Gilead hae nynh, “Efraim phin na thua tou?” cite khia hae zah, “Ka thua khyh,” a ci ze,

⁶minmin nynh, “Tuhteze Shibboleth cite hotua,” cipah hae zah, aroi akyh lante hothya khyh zah, “Sibboleth” a ci. Tetuh minmin nynh amaw kha kyng hae zah Jordan vaw zuanaw kyakhe a chia hae. Tuh-e ccyh lya Efraim hae sung pali thong ning a chih hae.

⁷Jefthah nynh Israel kha kum taruh a uk. Gilead minphuinpaw Jefthah tuh chih zah Gilead ram e amaw khua kyakhe a uu hae.

⁸Jefthah koute Bethlehem khuapaw Ibzan nynh Israel kha a uk.

⁹Aning nynh ccapaw sung thum a hoi. A ccanung hae sung thum kha amaw phin athua lei hae paw kya tungtuhsah hae zah, a ccapaw hae hanlan ccanglang e liaccaw hae sung thum kha a thuakhae hae. Aning nynh Israel kha kum sari a uk.

¹⁰Te Ibzan tuh chih zah Bethlehem kya a uu hae.

¹¹Aning koute Zebulun phinpaw Elon nynh Israel kha kum haw a uk.

¹²Zebulun phinpaw Elon tuh chih zah, Zebulun ram e Aijalon khua kya a uu hae.

¹³Aning koute Pirathon khua kya umpaw Hillel ccapaw Abdon nynh Israel kha a uk.

¹⁴Aning nynh lann sung sari a ccikuh hae paw ccapaw sung pali te mintaw pise sung thum a hoi; aning nynh Israel kha kum tarya a uk.

¹⁵Pirathon khua kya umpaw Hillel ccapaw Abdon tuh chih zah, Amalek hae kya-e muaram, Efraim ram lungkhu e Pirathon khua khe a uu hae.