Read Zotung Chin BYAPIATU 13 Bible Online

BYAPIATU 13 - Zotung Chin bible

BYAPIATU 13

¹Israel hae nynh BAWIPAW muihnaw kya hoyleinaw kha bua rae hae zah, BAWIPAW nynh minmin kha Filistin hae kuih kya kum sung pali lungkhu a pya hae.

²Zorah khuapaw, Dan phin athuapaw, a min Manoah cikuhpaw lu kheit a um, a zu tuh tiin zah ccaawsaah khyh.

³BAWIPAW vaawpaw tuh tuh-e nopinung kya yn langkuh zah, “Nang tuh na tiin zah ccaaw na saah khyh zemah, ccaaw na poi cih zah ccapaw na saah cih.

⁴Misutui thuasah, ruithyapaw thuasah na nia khyh nawlan te athyaa leipaw pawpaw mah na ae khyh nawlan raeringkuh,

⁵pawccecize ccaaw na poi cih zah ccapaw na saah cih. A sang na ngo lan khyh, pawccecize imuapaw tuh a pui takaw te Pachia hanlan nazir[1] ccungccaw athua cih. Aning tuh Filistin hae kuih kyate Israel hae kha luesah khylan rya a thotu athua cih,” a cipya.

⁶Tetuh nopinung nynh a vawpaw kalan cceih zah, “Pachia ccungccapaw lu kheit ka kya yn thua, a muinsan tuh Pachia vaawpaw muinsan te lokuh zah ri lan myarya um; tei kyate mou nae thua cite ka khia khyh, a min mah yn hopakuh khyh;

⁷thuasalama aning nynh kae kha, ‘Ccaaw na poi cih zah ccapaw na saah cih. Tukeiccuze misutui thuasah, ruithyapaw thuasah na neih lan khyh zah athyaa leipaw pawpaw mah na ae lan khyh, pawccecize imuapaw tuh a pui takaw te a chih cia Pachia hanlan nazir ccungccaw athua cih,’ a ci,” cite a hopya.

⁸Tetuh Manoah nynh BAWIPAW kha ngia zah, “Pou BAWIPAW , Pachia ccungccapaw nae sawpaw kha kae kalan bua yn thua sah lah, yn pui cih paw imuapaw kha pawtemou kae cyih cih cipaw yn ccangpah sah cite kae ngia,” a ci.

⁹Pachia nynh Manoah bya kha ngae zah, Pachia vaawpaw tuh loo kya a haungpaw nopinung kalan khe bua yn thua; thuasalama a vawpaw Manoah tuh tuh-e nopinung kya umbua khyh.

¹⁰Tukeiccuze nopinung tuh a vawpaw kalan arangte ccue zah, “Zekhanin lya ka kya yn langkuhpaw ccungccapaw kha atu bua yn langkuh vae,” a cipya.

¹¹Manoah nynh thokuh zah a zu kha a zui, te ccungccapaw kya thua zah, “Nang hynh hynh-e nopinung bya a hopahpaw kha na thua tou?” cite khia zah, “Ka thua,” a cipya.

¹²Te Manoah nynh, “Na bya he yn ccing te, imuapaw tuh a umtuzia pawtemou athua cih zah pawmou a cyih cih?” a cipya.

¹³BAWIPAW vaawpaw nynh Manoah kha, “Ka hopyapaw balyn kha nopinung nynh raeringkuh sah.

¹⁴Misu ku kyate a poupaw miakaw kha nopinung nynh ae lan khyh; misutui thuasah, ruithyapaw thuasah neih lan khyh zah, athyaa leipaw pawpaw mah ae lan khyh; kaw ka pyapaw miakaw kha aning nynh a sungkuh cih,” a ci.

¹⁵Manoah nynh BAWIPAW vaawpaw kha, “Nang hynh beih kae kang hin sah lah, miaa taraw kha kae paccynpah hin sah,” a cipya.

¹⁶BAWIPAW vaawpaw nynh Manoah kha, “Kae hynh nae kang zemah na looh kha ka ae lan khyh; thuasalama maee-ute silawnaw kha na paccyn ry zetuh BAWIPAW kalan raetua,” a cipya. (Pawccecize Manoah nynh BAWIPAW vaawpaw nynh thua cipaw nyh khyh.)

¹⁷Te Manoah nynh BAWIPAW vaawpaw kha, “Na bya he yn ccing te, saw kae tuathya nawlan na min tuh hum cikuh mou?” a ci.

¹⁸BAWIPAW vaawpaw nynh amaw kha, “Pawccemou ka min nae khia? Ka min tuh myaryasankae ngaeangthua lan umpaw nynh thua,” a cipya.

¹⁹Tukeiccuze Manoah nynh miaa taraw te ccathae silawnawpaw kha lah zah, lungpi vawlan khe ngaeangthua lan umpaw rya a lahpaw BAWIPAW kha a pya.

²⁰Silawhang kyate maeesoi tuh vaawlang kaethung zah, Manoah te a zu nynh a do lya hae khe BAWIPAW vaawpaw tuh silawhang kya-e maeesoi kya a kaethung; te mih mae kha laekhu lang a bakhung hae.

²¹BAWIPAW vaawpaw tuh Manoah te a zu kalan bua langkuh vae khyh. Tetuh Manoah nynh BAWIPAW vaawpaw nynh thua cipaw a ny.

²²Manoah nynh a zu kyakhe, “Pachia kha ah muih keiccuze solei chi lan vae,” a cipya.

²³Thuasalama a zu nynh, “BAWIPAW nynh aening hynh chia yn ry ze, maee-ute silawnaw te ccathae silawnaw kha oun ccoupah lan khyh, e uccaw hae balyn hynh oun muihsah lan khyh zah, atu lyahin hynh-e uccaw hae hynh mah oun hopah lan khyh,” a cipya.

²⁴Tuh-e nopinung nynh ccapaw saah zah Samson cite min a phu. Imuapaw tuh yn lethung zah BAWIPAW nynh hythua a pya.

²⁵Zorah te Eshtaol laku umpaw Mahaneh-dan kyakhe BAWIPAW muisaw nynh aning kha thawzung a pya takaw vae.