Read Zotung Chin BYAPIATU 14 Bible Online

BYAPIATU 14 - Zotung Chin bible

BYAPIATU 14

¹Vaekheit lyaze Samson tuh Timnah khua lang la cceih zah, tuin khua kyakhe Filistin nopinung lu kheit kha a muih.

²Te yn ki zah a nung te a paaw kha, “Timnah khua kya Filistin nopinung lu kheit kha ka muih; aning kha ka zu lang yn dypah oh,” a cipya hae.

³Thuasalama a nung te a paaw nynh, “Na puizia hae kya thuasah, ah minphuin hae kya thuasah nopi a um khyh keiccu tou vingdungawkuh leipaw Filistin hae laku e zu kha dyku lan na cceih cih?” a cipya hae. Thuasalama Samson nynh a paaw kha, “Aning tuh ka lungry yn tung keiccuze zu lang yn dypah oh,” a cipya.

⁴Tuh-e tuh BAWIPAW kyate nynh thua cipaw kha a nung te a paaw nynh nyh khyh hae; pawccecize BAWIPAW nynh Filistin hae kha dou khylan ccyhhoy kha a ccung. Tuh ccyh lya tuh Filistin hae nynh Israel hae kha a uk hae.

⁵Tetuh Samson tuh a nung te a paaw ryte Timnah khua lang cceih hae zah, Timnah misu khokhu hae kya he a thua hae tuh, chindeih nopaw sa kheit nynh amaw kha vaekheihmawte a sianua.

⁶BAWIPAW muisaw tuh a tungvaw yn thua zah, miaa taraw kha thoh pae hawte a kuih kyalya te tuh-e chindeih tuh thoh a pae. Thuasalama a cyipaw kha a nung te a paaw hopah khyh hae.

⁷Te cceih zah tuh-e nopinung te byabeihkuh hae zah, nopinung nynh Samson kha a lungry a ccingsah.

⁸Sosoh koute tuh-e nopinung kha zu lang dy khylan a kinua, chindeih rhua kha do khylan laanpi kyate ccanglang cceih zah, chindeih pyn lungkhu kya khoibu te khoitui a um.

⁹A kuih te lawkuh zah a ccia lyakhe a aebia. A nung te a paaw kya he a thua te, beihtaraw pyabua hae zah a ae hae. Thuasalama khoitui tuh chindeih rhua kya-e a lawpaw kha hopah khyh hae.

¹⁰A paaw tuh nopinung kalan cceih zah, ccangvae hae nynh poi leih a tua hae hawte, tuin kyakhe Samson nynh poi a tua.

¹¹Ccungccaw hae nynh Samson kha he a muih hae tuh, a kya umbua khylan ruiban sung thum a thuakhae hae.

¹²Samson nynh minmin kha, “Phohpawbya kae hopah cih oh. Poi nin ninsari lungkhu asuilan nae ccaesahpah oh zah na ny kho oh zetuh, nebaleihpaw boei zung sung thum te liakunawpaw boeining zung sung thum kha kae pya cih oh.

¹³Thuasalama asuilan nae ccaesahpya kho khyh oh zetuh, nebaleihpaw boei zung sung thum te liakunawpaw boeining zung sung thum kha nae pya cih oh,” a cipya hae. Te minmin nynh, “Na phohpawbya tuh yn hotua, kae la ngaetua,” a cipya hae.

¹⁴Samson nynh minmin kha, “A aetu lungkhu te aepaw a pou, a thawsaepaw lungkhu te a-epaw a pou,” a cipya hae. Tuh-e phohpawbya tuh minmin nynh nin thum lungkhu ccaesah kho khyh hae.

¹⁵Nin palinaw nin khe minmin nynh Samson zu kha, “Na vawpaw nynh phohpawbya kha oun ccaesahpya nawlan soihbiatua, tuhkhyhze tuh nang te na paaw innbyn hae kha maee te kae soi cih oh. Kaening hynh ryachisah khylan tou hynhlang hin nae ko oh?” a cipya hae.

¹⁶Tukeiccuze Samson zu nynh a malang khe rah zah, “Kae hynh nae hua; nae sungsah ccaccing khyh. Ka minphuin hae kha phohpawbya na khia hae, thuasalama asuilan kha kae hynh nae ccaesahpah khyh,” a cipya. Samson nynh a zu kha, “Dotua, ka nung ka paaw hae mah ka hopah khyh hae. Pawccemou nang kha kae hopah cih?” a cipya.

¹⁷Mih poi phe thang lan, nin sari lungkhu Samson malang khe a rah; palei a ngia keiccuze nin sarinaw nin khe a hopya. Tetuh a zu nynh phohpawbya kha a minphuin hae kya a ccaesahpya hae.

¹⁸Nin sarinaw nin khuanin ccaw mawkhe, khuaccaaw hae nynh amaw kha, “Khoitui laeze pawmou a ehua? Chindeih laeze pawmou a thawsaehua?” cite a hopya hae. Aning nynh minmin kha, “Ka vaetua tohlaw te na thue khyh oh zetuh, ka phohpawbya hynh na nyh kho lan khyh oh,” a cipya hae.

¹⁹Te BAWIPAW muisaw tuh a tungvaw yn thua, te Ashkelon khua lang cceih zah khuaccaaw hae sung thum kha theih hae zah mih boeining kha lah zah phohpawbya a ccaesah hae paw kalan khe liakunawpaw boei hae kha a pya hae. Myarya thinriate a paaw inn lang a ki.

²⁰Te a zu kha Samson a ruibanpaw, a ban hoy huapaw kalan khe a pya hae.