Read Zotung Chin BYAPIATU 15 Bible Online

BYAPIATU 15 - Zotung Chin bible

BYAPIATU 15

¹Ccyh sosoh aro koute, chanvuih rue lyakhe, Samson tuh miaa taraw ccyngte a zu kalan paebua lan cceih zah, “Ka zu khaan lungkhu lang ka tee cih,” a ci. Thuasalama a zu paaw nynh tee lan kaw-ua khyh.

²A zu paaw nynh, “Ka ccanung kha na vua vae cipaw phe ria lan ka ny; tukeiccuze aning kha na banpaw kalan ka pya vae. A neitawnung tuh amaw laeze a puithyahua khaw? A unung hanpaw a neitawnung hynh lawkuh,” a cipya.

³Samson nynh minmin kha, “Atu lya tuh, Filistin hae tungvaw hoyleinaw ka rae zemah, yn seisah lan khyh hae,” a cipya hae.

⁴Tukeiccuze Samson nynh cceih zah suizaw za thum kha kyng zah, maeccatung kha lah zah mih leihmae hae kha ccangkheit te ccangkheit piade hae zah, tuh-e leihmae ccangning hae laku khe maeccatung kha ccarou a heede.

⁵Maeccatung hae kha maee a tyh koute, Filistin hae loohku a thadyn hae paw kalan khe suizaw hae kha saw hae zah, loohku hae, loohcce hae ryte misu khokhu hae te oliv khokhu hae kha maee nynh a u hae.

⁶Tetuh Filistin hae nynh, “E hynh hummou a cyih?” a ci hae. Minmin nynh, “Timnah khua e lukheitpaw paeepaw Samson nynh a cyih, pawccecize Samson zu kha ko zah a banpaw kha a pya,” a ci hae. Tukeiccuze Filistin hae tuh oun cceih hae zah tuh-e nopinung te a paaw kha maee te a soi hae.

⁷Samson nynh minmin kha, “Hynhte na cyi oh keiccuze phu kae law mawlaezung oh umtaw lei lante thyalawkute bya ka kinku,” a cipya hae.

⁸Aning nynh minmin kha patae a chia hae; te cceihbung zah Etam lungpi karung kya a um.

⁹Tetuh Filistin hae tuh oun cceih hae zah Judah ram kya ryahmin tahkute Lehi khua kha a thiing hae.

¹⁰Judah hae nynh, “Pawccemou nae ccianua oh?” a cipya hae. Minmin nynh, “Samson nynh kae tungvaw a cyi hawte a tungvaw cyirute khiide khylan nynh kae ccia,” a ci hae.

¹¹Tetuh Judah hae thong thum nynh Etam lungpi karung lang cceih hae zah Samson kha, “Filistin hae tuh aening oun uktu hae cipaw na nyh khyh tou? Pawccemou kae tungvaw hynhte na cyi?” a cipya hae. Aning nynh, “Minmin nynh oun cyi hae hawte minmin kha ka cyi hae,” cite a khung hae.

¹²Judah hae nynh, “Nang kha Filistin hae kuih kya pya lan cite nang kha khiide khylan kae thua vae,” a cipya hae. Samson nynh minmin kha, “Naemaw ccaccei nynh kae hynh nae chia khyh nawlan oh thyalawkute bya yn kinpakuh oh,” a cipya hae.

¹³Minmin nynh Samson kha, “Kaening nynh nang kha khiide kyalya kae khiide cih zah mih kuih kya kae ap cih; kaening nynh nang kha kae theih lan khyh,” a cipya hae. Tetuh minmin nynh liarui thawpaw ccangning te aning kha khiide hae zah, lungpi kyate a cciakhae hae.

¹⁴Samson tuh Lehi khua he a thua te, Filistin hae nynh sia biate a thuanua hae; te BAWIPAW muisaw tuh vaekheihmawte a tungvaw yn thua zah, a kuih kya umpaw liarui hae tuh maee te a tungkuh hae paw laphan hawte thua hae zah, a khiidenaw hae paw liarui tuh a kuih kya palae tui vae.

¹⁵Te aning nynh lann a khawru thawpapingpaw kha muih zah, dyngnuakute a law, tuh-e tuhte ccungccaw thong kheit kha a chia.

¹⁶Te Samson nynh, “Lann a khawru te patah khanthykuh lan ka pum vae, lann a khawru te ccungccaw thong kheit ka chia vae,” a ci.

¹⁷Bya a ho koute, lann khawru kha ccaring a vua; te tuh-e hmin tuh Ramath-lehi a ci hae.

¹⁸Samson tuh myarya tuihaw zah, BAWIPAW kha ko zah, “E myarya lepaw taenaw hynh na seepaw kuih kya nae pya vae. Atu tui kanmawte ka chih cih zah, vingdungawkuh lei hae paw kuih kya tou ka thua vae cih?” a ci.

¹⁹Tetuh Pachia nynh Lehi khua kya akarungpaw hmin kha poh uasah zah, tuin kyate tui apou. Aning nynh tui kha neih zah a hy yn sue zah a thaw yn um. Tukeiccuze tuh-e hmin tuh En-hakkore cite a minphu hae zah atunin cia Lehi khua kya a um.

²⁰Samson nynh Filistin hae she lya Israel hae kha kum kuin a uk hae.