Read Zotung Chin BYAPIATU 16 Bible Online

BYAPIATU 16 - Zotung Chin bible

BYAPIATU 16

¹Vaekheih tuh Samson nynh Gaza khua lang cceih zah, tuin kyakhe ohhuanung lu kheit kha muih zah a ikhae.

²Gaza hae kha, “Samson hein kya yn thua,” cite a hopya hae. Tukeiccuze minmin nynh koihlu hae zah aning kha khua koikua kyakhe zidae a buh hae. “Awkhualan khuadae cia ngaw oh sih; te aning kha chia lan,” cite hokuh hae zah azi zidae daebabi lan a um hae.

³Thuasalama Samson tuh ziraccyng cia kyalya ih zah ziraccyng khe thokuh zah khua koikua thuakaw hae kha a tung ccangning te thuakaccong ryte abalyn mawte a raw kya puih zah, Hebron malang umpaw sangpyng dung langkhe a cciakhae.

⁴Tuh-e koute Sorek accya kya umpaw nopinung, a min Delilah cikuhpaw kha a sungsah.

⁵Filistin bawi hae nynh tuh-e nopinung kalan cceih hae zah, “Paw nynh mou Samson hynh hynhte myarya a thaw a saesah cipaw te aning kha khiite kae tae kho nawlan pawtemou kae cyih cih cipaw kha ny nawlan soihbia lah, a laanpi yn ccungtua; kaening nynh nang kha ngunphua thong kheit za kheit cci kae pya cih,” a cipya hae.

⁶Tukeiccuze Delilah nynh Samson kha, “Paw nynh mou hynhte myarya na thaw ae saesah cipaw te nang hynh tae kho nawlan pawtemou khii kho na ung cih cipaw kha beih yn hopya tua,” a cipya.

⁷Samson nynh amaw kha, “Arou loh leipaw lirui thawpaw ccangsari te yn khii hae zetuh, ka thawzya cih zah mingccangpaw hawte ka thua vae cih,” a cipya.

⁸Tetuh Filistin bawi hae nynh tuh-e nopinung tuh arou loh leipaw lirui thawpaw ccangsari kha ccyngpah hae zah, aning nynh tuh-e lirui tuhte Samson kha a khii.

⁹Ccungccaw hae nynh alungkhu lang e innkhaan kya a buh lya hae khe, nopinung nynh, “Samson, Filistin hae nynh ae thuanua vae hae!” a cipya. Thuasalama maee te a tungkuh hae paw law hawte aning nynh lirui hae kha pong a pae. Tukeiccuze a thawzung a umnaw kha nyh khyh hae.

¹⁰Tetuh Delilah nynh Samson kha, “Nae theihrya zah nae ling; pawtemou khiide kho na thua cih cipaw kha beih yn hopya tua,” a cipya.

¹¹Samson nynh, “Mang boi leipaw liarui thawpaw hae te yn khii hae zetuh ka thawzya cih zah, mingccangpaw hawte ka thua vae cih,” a cipya.

¹²Tukeiccuze Delilah nynh liarui thawpaw hae kha lah zah, tuh-e tuhte khii zah, “Samson, Filistin hae nynh ae thuanua vae hae!” a cipya. (A buhtu hae paw ccungccaw hae tuh alungkhu lang e innkhaan kya a um hae.) Thuasalama aning nynh a kuih kya-e liarui hae kha laawrui hawte pong a pae.

¹³Tetuh Delilah nynh Samson kha, “Atu cia nae theihrya zah nae ling; pawtemou khiide kho na thua cih cipaw kha beih yn hopya tua,” a cipya. Samson nynh, “Ka lu kya-e sangkhe ccangsari hynh boeikua kya na kuabia zah, phaeccya te na reihde zetuh, ka thawzya cih zah mingccangpaw hawte ka thua vae cih,” a cipya.

¹⁴Tukeiccuze a i lyakhe, Delilah nynh a lu kya-e a sangkhe ccangsari kha lah zah, boeikua kya kuabia zah phaeccya te a reihde. Te aning nynh, “Samson, Filistin hae nynh ae thuanua vae hae!” a cipya. Thuasalama a inaw kyate yn thokuh zah phaeccya, boeikua te boeikuanawpaw kha pong a phoh.

¹⁵Te Delilah nynh Samson kha, “Na thinlung te nae ry lei pite pawtemou, ‘Kae sungsah,’ cite na ho kho? Atu vae thum cia nae theihrya zah, na thaw myarya ae saesahpaw kha nae hopah khyh,” a cipya.

¹⁶Nyathyakou tuh, Delilah nynh a bya te nin takyh soihbiate a ngia keiccuze Samson tuh phe chi lan ciate a lungriathae.

¹⁷Tukeiccuze Samson nynh a thinlung kya umpaw balyn kha hopah zah, “Ka sang hynh ngo boi leipaw nynh thua; pawccecize kae tuh ka nung vue lungkhu te Pachia hanlan Nazir ccungccaw nynh ka thua. Ka sang hynh ngo zetuh ka thawzung nynh yn cciataw cih; te ka thawzya cih zah mingccangpaw hawte ka thua vae cih,” a cipya.

¹⁸A thinlung kya umpaw balyn kha yn hopah vae cipaw Delilah nynh he a nyh tuh, Filistin bawi hae kha kosah hae zah, “Atu vae kheit kyalya oun cciatua hin oh, pawccecize aning nynh a thinlung kya umpaw balyn kha pong yn hopya vae,” a cipya hae. Tetuh Filistin bawi hae tuh a kalan oun cceih hae zah, mih kuih kya phua kha a ccyngpya bia hae.

¹⁹Delilah nynh a phae vawlan marya a isah; te pise lu kheit kha ko zah a lu kya-e sangkhe ccangsari kha a ngosah. Tuh-e paw nynh a thawzyasah zah, a thawzung nynh a cciataw vae.

²⁰Tetuh Delilah nynh, “Samson, Filistin hae nynh ae thuanua vae hae!” a cipya. A inaw kyate yn thokuh zah, “Ninhyn hawte ka pou cih zah, kamaw te kamaw ka luesakuh cih,” cite a tuaku. Thuasalama BAWIPAW nynh yn cciataw vae cipaw nyhkuh khyh.

²¹Tetuh Filistin hae nynh kyng hae zah a mitlung a khoi hae. Gaza khua lang cciakhae hae zah sohin bawtary te a khiide hae; te thong lungkhu khe sungmia te looh kha a miasah hae.

²²Thuasalama a lu kya-e sang tuh a ngo kou hae te, bua yn sae takaw vae.

²³Filistin bawi hae tuh mih pachia Dagon kalan myarya lepaw silawnaw rae khylan te lungpawnaw rae khylan a sueluakuh hae; pawccecize minmin nynh, “Ah pachia nynh ah rhawpaw Samson kha ah kuih kya oun pya vae,” a ciku hae.

²⁴Ccungccaw hae nynh Samson kha he a muih hae tuh, mih pachia kha thehoysah hae zah, “Ah pachia nynh ah ram rohtupaw, aening patae oun theihtupaw, ah rhawpaw kha ah kuih kya oun pya vae,” a ci hae.

²⁵Myaryamaw mih lung he apaw tuh, “Samson kha yn ko oh, ah lung oun pawsah tua sah,” a ci hae. Tukeiccuze Samson kha thong lungkhu te atolang poukhae hae zah, aning nynh lungpawnaw a raepya hae. Tung hae laku khe a thadynsah hae.

²⁶A kuih te a kyngtupaw imuapaw kha Samson nynh, “Inn a tuhdoupaw tung hae kya ka ngeiku ccaw, tung hae kha ka kuih te beih yn hae sah,” a cipya.

²⁷Inn kya nopi pise phe abeih hae; Filistin bawi hae balyn tuh tuin kya a um hae, innccuvaw kya mah Samson nynh lungpawnaw a raepya hae paw a dotu hae nopi pise thong thum loukaw a um hae.

²⁸Tetuh Samson nynh BAWIPAW kha ko zah, “Bawipaw PACHIA, atu vae kheit kyalya kae hynh yn liathui lah, thawzung beih yn pya. Pou Pachia, tuhteze nynh ka mitlung ccangning hanlan phulawnaw vae kheit kyalya raete Filistin hae hynh ka liaru kho cih hae,” a cipya.

²⁹Te Samson nynh inn a tuhdoupaw angaelung e tung ccangning hae kha a ranglang kuih te ccangkheit, a voilang kuih te ccangkheit kyng zah a koinua hae.

³⁰Te Samson nynh, “Filistin hae ryte kae chihkheih sah,” a ci; a thawzung balyn thuate a koinua hae; te inn nynh a lungkhu um hae paw bawi hae te ccungccaw hae balyn kha a deih hae. Tukeiccuze a hiin lya a chia hae paw ccungccaw hae laeze a chi lya a chia hae paw ccungccaw hae tuh alunghua hae.

³¹Te a uno hae te a innbyn hae balyn tuh oun thua hae zah a rhua kha lah hae zah cciakhae hae zah, Zorah khua te Eshtaol khua laku umpaw a paaw Manoah shawku kyakhe a uu hae. Aning nynh Israel hae kha kum kuin lungkhu a uk hae.