Read Zotung Chin BYAPIATU 17 Bible Online

BYAPIATU 17 - Zotung Chin bible

BYAPIATU 17

¹Efraim muaram kya a min Mikah cikuhpaw ccungccapaw lu kheit a um.

²Aning nynh a nung kha, “Na kya-e ngunphua thong kheit za kheit ae lawpah hae zah, tuh-e kong thyalawnaw bya kha ka thaenaw kya na ho; khah-e ngunphua kha ka kya nynh a um, kae nynh ka lah; thuasalama atu kae kii cih,” a cipya. Te a nung nynh, “Ka ccapaw hynh BAWIPAW nynh hythuapya vae sah!” a ci.

³Tetuh aning nynh ngunphua thong kheit za kheit kha a nung kalan a kii; a nung nynh, “E ngunphua hynh ka ccapaw hanlan laeepaw zohtuh lang raepya nawlan BAWIPAW kalan ka pya,” a ci.

⁴Aning nynh ngunphua kha a nung kalan he a kii te, a nung nynh ngunphua za ning kha lah zah, phualaeetupaw kha a pya, te aning nynh laeepaw zohtuh lang rae zah, tuh-e tuh Mikah inn kya a um.

⁵E ccungccapaw Mikah nynh hminthyaa hoi zah, ranpibawi angki te tera zohtuh kha a rae, te a ccapaw lu kheit kha a ranpibawi lang a nung.

⁶Tuh ccyh lya tuh Israel hae kya siapharan um khyh; ccungccaw hae balyn nynh mih muihnaw kya akyh a ci hae paw kha a rae hae.

⁷Judah ram kya Judah phin athuapaw, Bethlehem khuapaw ccangvaepaw lu kheit a um. Aning tuh tuin khua kya umpaw Levi phin nynh thua.

⁸Tuh-e ccungccapaw nynh a muih khopaw hmin miakaw kya khuasah khylan Judah ram Bethlehem khua kyate a pou. A ccia lyakhe Efraim muaram umpaw Mikah inn kya a thua.

⁹Mikah nynh amaw kha, “Paw kyate mou nae thua?” a cipya. Aning nynh, “Kae tuh Judah ram e Bethlehem khuapaw Levi phin nynh ka thua, ka muih khopaw hmin miakaw kya khuasah khylan kae cceihpaw nynh thua,” cite a khung.

¹⁰Mikah nynh amaw kha, “Ka kya umbua, ka hanlan paaw lang te ranpibawi lang nae umpah cih, kum kheit ze ngunphua kia haw, boeining bua kheit kae pya cih zah aenia kae rin cih,” a cipya.

¹¹Levi phinpaw tuh tuh-e paw te umkheih lan a nawccah; te ccangvaepaw tuh a ccapaw hae kyaze lu kheit lang a tang.

¹²Te Mikah nynh Levi phin ccangvaepaw tuh a ranpibawi lang nungkuh zah, tuh-e ccangvaepaw tuh ranpibawi lang a tang, te Mikah inn kya a um.

¹³Mikah nynh, “Atu tuh Levi phinpaw tuh ka ranpibawi lang a tang vae keiccuze, BAWIPAW nynh laansui-uanaw yn pya vae cih cipaw ka ny,” a ci.