Read Zotung Chin BYAPIATU 19 Bible Online

BYAPIATU 19 - Zotung Chin bible

BYAPIATU 19

¹Tuh-e she lya, Israel hae kya siapharan a um khyh lyakhe, Efraim muaram asawnaw kya umpaw Levi phinpaw lu kheit nynh Judah ram Bethlehem khua e kha lovae lang a hoiku.

²A tungvaw kya a lovaenung nynh a thinria zah, a kyate Judah ram Bethlehem khua umpaw a paaw inn lang ccue zah, tuin kya sawpaw sah pali loukaw a um.

³Te a vawpaw nynh byanepaw te hopya lan zah kikhae lan cite a ccianua. Aning nynh a ryalahtupaw te lann bua kheit kha a cciakhae hae. A lovaenung a paaw inn kya he a thua te, nopinung a paaw nynh muih zah tungku lan lungpawte a cciadue.

⁴A pupaw, nopinung a paaw nynh kang zah nin thum a um; tukeiccuze ae hae neih hae zah, tuin kya a um hae.

⁵Nin palinaw nin tuh awkhua takaw te tho hae zah, ccia lan a paccynkuh vae; thuasalama nopinung a paaw nynh a paeepaw kha , “Looh beihtaraw ae hin lah, na thawsaesakuh hin, tukoute na cceih cih oh,” a cipya.

⁶Tukeiccuze lu ning te dahung hae zah a ae a neihkheih hae; te nopinung a paaw nynh a paeepaw kha, “Atu khuazi tuh rya hin lah, lungpawte um hin,” a cipya.

⁷A paeepaw nynh ccia lan vae cite he a thokuh tuh, a pupaw nynh a paeepaw kha tuin kya khuazi bua a rya mawlaezung kang zah bua a rya.

⁸Nin pangawnaw nin khe a paeepaw tuh ccia lan vae cite awkhua takaw te a thokuh; te nopinung a paaw nynh, “Na thawsaesakuh hin,” a cipya. Tukeiccuze khuanin phe laeleih lan lu ning mawte a ae a neih hae.

⁹A paeepaw tuh a lovaenung te a ryalahtupaw ryte ccia lan vae cite he a thokuh hae tuh, a pupaw, nopinung a paaw nynh, “Dotua, zetesang thua vae. Atu khuazi mah rya hin. Dotua, khua vyavya zi vae. Hein kya khuazi rya hin lah, lungpawte umtua. Awkhualan awkhua takaw te tho lah, na inn lang na cceih cih,” a cipya.

¹⁰Thuasalama tuh-e paw tuh khuazi rya vae khyh; thokuh zah cceih zah Jebus (tuh-e tuh Jerusalem) rawlang khe a thua. Lannde dekuhpaw lann bua kheit te a lovaenung tuh amaw kya a umbua hae.

¹¹Jebus khua lang he a naekuh hae tuh, khuanin vyavya ccah vae zah a ryalahtupaw nynh a bawipaw kha, “Yn cceih, e Jebus hae khua lang tee oh sih lah, e khua kya rya oh sih,” a cipya.

¹²A bawipaw nynh, “Israel ccungccaw a um leinaw ramccang hae khua lang tee lei lan; Gibeah khua lang po ccia lan,” a cipya.

¹³Te a ryalahtupaw kha, “Rang, e hmin hae sankhakheit kya thua kho nawlan zuakuh oh sih, Gibeah khua khyhze Ramah khua kya rya lan,” a cipya.

¹⁴Tukeiccuze po sulue hae zah a cceih hae; Benjamin phin kya-e Gibeah khua pe a thua hae tuh, khuanin nynh a ccawtaw hae.

¹⁵Gibeah khua kya khuazi rya khylan tuhlang tuin a tee hae. Khualae lang tee zah khua ngaelung kya a haung, lu kheit nynh sanmah khuazi rya nawlan innccong thuasah khyh hae.

¹⁶Te zete vae tuh paawpipaw lu kheit tuh loo kya rya a lawnaw kyate yn ki. Tuh-e paw tuh Efraim muaram e ccungccapaw thua zah Gibeah khua kya a um buapaw nynh thua. (Tuin hmin kya-e ccungccaw hae tuh Benjamin phin hae nynh thua hae).

¹⁷Tuh-e paawpipaw nynh do zah khua ngaelung kya khyccepaw kha he a muih tuh, “Teilangmou na cceih cih oh? Tei kyate mou nae thua oh?” a cipya hae.

¹⁸Aning nynh paawpipaw kha, “Judah ram Bethlehem khua kyate kae cceih zah, ka umnaw Efraim muaram asawnaw lang kae cceih cih. Judah ram Bethlehem khua lang ka la cceih zah, atu tuh ka inn lang kae ki vae paw nynh thua. Humhung nynh mah innccong oun thuasah khyh.

¹⁹Na ryalahtu hae kaening tuh kae lann hae hanlan ccatanphue te a looh mah kae hoi, kamaw te nopinung te kae kya um buapaw ccangvaepaw hanlan sanlou te misutui mah kae hoi. Kaening hanlan ahopaw um vae khyh,” a cipya.

²⁰Paawpipaw nynh, “Na kya daenaw um vae sah. Na hobounaw balyn kha kae do-oihpah cih; khua ngaelung laanpi kya tuh rya nan oh,” a cipya hae.

²¹Tukeiccuze a inn lang teekhae zah, lann hae kha looh a dang hae; mih ccu singkuh hae zah a ae a neih hae.

²²Mih lungpaw cciamang lyakhe, accouseikuh hae paw khuaccaaw hae abang nynh inn kha koihlute thuakaw kha bua hae zah, innzuaapaw paawpipaw kha, “Na inn thuapaw pisepaw kha kaening nynh kae ikhae ccaw, yn toisakuh,” a cipya hae.

²³Innzuaapaw, ccungccapaw nynh pounua hae zah, “Uteno hae, myaryamaw ahoy leipaw kha rae nan oh. E paw tuh ka mikhiapaw athua keiccuze, e anungsikuhpaw uccaw hynh rae nan oh.

²⁴Hein kya ka ccanung liaccady te mikhiapaw a lovaenung a um hae; minmin hynh kae poukhae hae sah. Minmin kha ikhaede oh lah, nae rythyte seikhae oh; thuasalama hynh-e pisepaw tungvaw kya hynhcihaw anungsikuhpaw uccaw hynh tuh rae nan oh,” a cipya hae.

²⁵Thuasalama tuh-e hae nynh ngaepah khyh hae. Tukeiccuze mikhiapaw nynh a lovaenung kha kyng zah mih kalan a pousah. Minmin nynh nopinung kha azi zidae awkhua cia, ikhaede hae zah a vawsawsah hae. Awkhua a aw takaw khe a cciasah hae.

²⁶Khuadaetakaw khe, nopinung tuh yn cceih zah a bawipaw a umnaw thuakaw kyakhe raerae aw lan cia a um.

²⁷A bawipaw tuh awkhua khe tho zah, thuakaw kha hung zah ccia lan vae cite he a pou tuh, a lovaenung tuh thuakawccaw vawlan a kuih khangte thuakaw kya phang a huekuh vae.

²⁸Aning nynh a lovaenung kha, “Thokuh, ccia lan vae,” a cipya. Thuasalama byakhung vae khyh. Te pisepaw nynh lann tungvaw khang zah, a inn lang a cceih vae.

²⁹A inn lungkhu lang a tee koute, tangpaw lawkuh zah a lovaenung kha kyng zah a kuih a ccu ryte ccanghaw lae ning lang a tya, te Israel ram pynpi phe lekuh lan a pyasah hae.

³⁰Aning nynh a pyasah hae paw ccungccaw hae kha kawpyate byataw hae zah, “Nanning nynh Israel hae balyn kha hynhte na hopah cih oh, ‘Israel hae nynh Izip ram kyate a pou nin hae kyate atunin cia, hynhcihawpaw uccaw hynh acyihkuh boi tou? E uccaw hynh tuatua kalang oh, hotua kalang oh lah, ho oh,’ cite na cipah cih oh,” a cipya hae.