Read Zotung Chin BYAPIATU 2 Bible Online

BYAPIATU 2 - Zotung Chin bible

BYAPIATU 2

¹BAWIPAW vaawpaw tuh Gilgal kyate Bokhim lang cceihthung zah, “Izip ram kyate kae cciakhae thung oh zah, nae minpaaw hae kya bya ka kinpyaku hae paw ram lungkhu lang kae teekhae oh. ‘Nanning ryte ka raepaw byakinnaw kha papin ka roh lan khyh.

²Nanning nynh hynh-e ram kya um hae paw ryte byakinnaw kha rae nan oh; mih silawhang hae kha roh oh,’ ka ci. Thuasalama ka kaw na ngae khyh oh. Na cyi oh paw hynh dotua oh!

³Tukeiccuze kae hopya oh, e ccungccaw hae hynh nae malang kyate ka dee lan khyh hae; minmin tuh nae rhaw hae athua cih hae zah, mih pachia hae tuh nae hanlan kaang athua cih,” a ci.

⁴BAWIPAW vaawpaw nynh Israel hae balyn kya hynh-e bya he a ho tuh, ccungccaw hae tuh thawte a rah hae.

⁵Tukeiccuze tuh-e hmin tuh Bokhim cite min a phu hae, tuin kyakhe BAWIPAW kalan si a law hae.

⁶Joshua nynh ccungccaw hae kha he a kisah hae te, Israel hae balyn tuh ram kha ccou khylan mih rho laephi raveih langkhe a cceih hae.

⁷Joshua she lungkhu te BAWIPAW nynh Israel hanlan ryalaw lepaw a lawpaw balyn kha a muih hae paw Joshua nukhu e piccan hae she lungkhu balyn tuh Israel hae nynh BAWIPAW kha a beik hae.

⁸Nun ccapaw Joshua, BAWIPAW seepaw tuh za kheit kum haw acih te a chih.

⁹Gaash Mua thahlang, Efraim mua vawlan, Timnath-heres kya umpaw a rho laephi kyakhe a uu hae.

¹⁰Te tuin she e ccungccaw hae balyn tuh mih minpaaw hae kyakhe sueluabua athua hae; BAWIPAW kha thuasah, Israel hanlan a cyipyapaw rya kha thuasah a nyh leipaw she thawpaw tuh minmin koute yn langkuh.

¹¹Te Israel hae nynh BAWIPAW muihnaw kya ahoy leipaw kha cyih hae zah Baal kha a beik hae;

¹²Mih minpaaw hae Pachia, Izip ram kyate a poukhae hae paw BAWIPAW kha a vua hae; mih pepan e ccungccaw hae kya-e ccangpaw pachia hae kha zuite bakhungnua hae zah BAWIPAW kha a thinriasah hae.

¹³BAWIPAW kha vua hae zah Baal te Astartes pachia hae kha a beik hae.

¹⁴Tukeiccuze Israel tungvaw kya BAWIPAW thinrianaw tuh maee lang rua zah, luadetu hae kuih kalan a pya hae, mih pepan umpaw mih rhaw hae kuih kalan a zua hae, tetuh mih rhaw hae kha thadynnua kho vae khyh hae.

¹⁵BAWIPAW nynh raeringnaw pya hae zah bya a kinpyaku hae hawte, a ccianaw takyh hae kya BAWIPAW kuih nynh phang zokhaw hae zah myaryamaw mih vawsaw.

¹⁶Tetuh minmin a luadetu hae kuih kyate a luesahtu hae paw byapiatu hae kha BAWIPAW nynh a langsaku hae.

¹⁷Tuhzemah minmin nynh mih byapiatu hae bya kha ngaelae khyh hae; ccangpaw pachia hae kyakhe ohhuakuh hae zah a beik hae. BAWIPAW kawbya a ngae hae paw mih minpaaw hae nynh a zui hae paw laanpi kyate aro mawze ccanglang a cceihsei hae.

¹⁸BAWIPAW nynh minmin hanlan byapiatu hae kha a langsaku takyh vae ze, BAWIPAW tuh byapiatu kya um zah, tuh-e byapiatu she balyn kya mih rhaw hae kuih kyate a luesah hae; pawccecize minmin tuh tuaasahtu hae te vawsaw pyatu hae keiccuze a raw a khuinaw hae liate BAWIPAW nynh minmin kha thawcci hae.

¹⁹Thuasalama byapiatu he a chi vae ze, mimaw mamin lang bua tang hae zah mih minpaaw hae laeze athahhua lante a hiin hae, ccangpaw pachia hae kha beik hae zah a bakhungnua hae. Mih cyisahnaw te mih lungkhungnaw kha ccapyh san vua khyh hae.

²⁰Tukeiccuze Israel tungvaw Pachia thinrianaw tuh maee lang rua zah, “E ccungccaw hae nynh mih minpaaw hae kya kaw ka pya hae paw ka byakinnaw kha roh hae zah ka bya a ngae khyh hae keiccuze,

²¹Joshua he a chih te, a laehy hae paw minphuin hae kya-e phuin kheit sanmah mih malang kyate ka dee lan khyh hae,” a ci.

²²Mih minpaaw hae nynh a zui hae hawte BAWIPAW laanpi kha a zui hae tou zui khyh hae tou cipaw syntawtua nawlan,

²³BAWIPAW nynh khah-e minphuin hae kha palou dee leite umsah hae zah Joshua kuih kalan pya khyh hae.