Read Zotung Chin BYAPIATU 20 Bible Online

BYAPIATU 20 - Zotung Chin bible

BYAPIATU 20

¹Tetuh Israel hae balyn tuh Dan khua kyate Beersheba khua kyacia, Gilead ram e hae ryte oun pou hae zah, ccungccaw zapi hae tuh ccungccaw lu kheitpaw hawte Mizpah khua kya BAWIPAW malang khe a pumkuh hae.

²Ccungccaw hae balyn kya-e lupi hae, Israel phin hae balyn kya-e lupi hae tuh Pachia ccungccaw hae a pumkunaw hae kyakhe oun pou hae; zunghe kyngpaw ccu rhawkaw hae cciing pali acih hae.

³(Israel ccungccaw hae tuh Mizpah khua lang a cceih hae cipaw kha Benjamin phin hae nynh a thae hae.) Te Israel hae nynh, “E hoyleinaw hynh pawtemou yn langku? Oun hopya tua oh,” a ci hae.

⁴A chia hae paw nopinung a vawpaw Levi phinpaw nynh, “Kae te ka lovaenung tuh Benjamin phin hae kya-e Gibeah khua kya kae thua zah kae rya.

⁵Gibeah khuaccaaw hae nynh oun ccianua hae zah, khuazi khe inn kha a koihlu hae. Kae hynh chia lan yn paccynnuaku hae, te ka lovaenung kha phe chih lan cia a ikhaede hae.

⁶Tetuh ka lovaenung kha ka lah zah pong ka tya koute Israel ram pynpi phe lekuh lan ka pyasah hae; pawccecize minmin nynh Israel ram kya anungsikuhpaw thinlungccinaw kha a rae hae.

⁷Tukeiccuze atu nanning Israel hae nynh nae balynte, e kyahin nae tuanaw te nae roihnaw kha oun hotua kalang oh,” a cipya hae.

⁸Ccungccaw hae balyn nynh ccungccaw lu kheitpaw hawte thokuh hae zah, “Aening lu kheit sanmah ah bu kalan ccia lei lan, lu kheit sanmah ah inn lang ki lei lan.

⁹Gibeah khua kha hynhte cyi lan: ccungthydungte ccianua lan.

¹⁰Israel phin hae balyn kya-e ccungccaw za kheit kyaze lu haw, thong kheit kyaze za kheit, thong haw kyaze thong kheit kha ko lan hae zah, minmin tuh rhawkaw hae hanlan vaelooh phutu athua cih hae; tuh-e rhawkaw hae tuh Israel ram kya Benjamin phin kya-e Gibeah khua nynh a raepaw thethyanaw balyn hanlan phulaw khylan a cceih cih hae paw nynh thua,” a ci hae.

¹¹Tukeiccuze Israel hae balyn tuh pynkheit lante hobungkute tuh-e khua kha a pumnuaku hae.

¹²Israel phin hae nynh Benjamin phin balyn kya phe lekuh lan ccungccaw saw hae zah, “Nanning laku kya acyihkuhpaw hynh-e hoyleinaw hynh pawtemou athua?

¹³Atu Gibeah khua kya-e a ccouseikuh hae paw kha chiate Israel kyate hoyleinaw kha kae zosah nawlan, kae kalan oun pya oh,” a cipya hae. Thuasalama Benjamin phin hae nynh mih uno Israel hae bya kha ngae khyh hae.

¹⁴Israel hae ryte rhawtukkunaw kalan ccia khylan Benjamin phin hae tuh khua hae kyate Gibeah khua lang a sueluakuh hae.

¹⁵Tuin nin khe, Gibeah khuaccaaw hae nynh a po hae paw milu za sari riabia leite, Benjamin phin hae nynh mih khua hae kyate zunghe kyngpaw ccungccaw thong kuin lae taruh kha a suelua hae.

¹⁶E rhawkaw hae balyn kyahin, voilang kuih a mangthya hae paw, popaw za sari a um hae; mih balyn mawte sangrua ccangkheit kha lung te asoo lei lan, phe tung lan a deihthya hae.

¹⁷Benjamin phin hobia leite, Israel hae nynh zunghe kyngpaw cciing pali kha a pum hae, mih balyn mawte rhawtuk a thya hae.

¹⁸Israel hae tuh Bethel lang thokute cceihthung hae zah Pachia kha, “Kaening kya hynh Benjamin phin tuk khylan hummou a cceih ty cih?” cite a khia hae. BAWIPAW nynh, “Judah nynh a cceih ty cih,” a ci.

¹⁹Tetuh Israel hae tuh awkhua takaw khe thokuh hae zah Gibeah khua pe khe a ryanua hae.

²⁰Israel hae tuh Benjamin phin kha dou khylan a pou hae; Israel hae nynh rhawkaw hae kha Gibeah khua malang khe a nung hae.

²¹Benjamin phin hae tuh Gibeah khua kyate oun pou hae zah, tuin nin kya Israel hae thong kuin lae ning kha a chia hae.

²²Israel hae tuh cceih hae zah BAWIPAW malang khe zete cia a rah hae; te minmin nynh BAWIPAW kha, “Kae uno Benjamin phin hae kha dou khylan bua kae naenuakuh ung cih hae tou?” cite a khia hae. Te BAWIPAW nynh, “Ou, ccianua oh,” a cipya hae.

²³Israel hae nynh mih rawthungsakuh hae zah, rhawkaw hae kha masaty nin lya a nungnaw hae hmin kyakhe bua a nung hae.

²⁴Nin ningnaw nin khe Israel hae nynh Benjamin phin hae kha a ccianua hae.

²⁵Nin ningnaw nin khe Benjamin phin hae nynh minmin kha Gibeah khua kyate pounua hae zah, zunghe kyngpaw Israel hae thong haw lae tarya kha a chia hae.

²⁶Israel hae balyn, rhawkaw hae mih balynte Bethel lang ki hae zah BAWIPAW malang haungte a rah hae; tuin nin tuh zete cia looh-ae a sung hae. Te minmin nynh maee-ute silawnaw te ccawkunaw silawnaw kha BAWIPAW malang a rae hae.

²⁷Israel hae nynh BAWIPAW kha khia hae zah (tuh ccyh lya tuh Pachia byakin thingkua tuh tuin kya um zah,

²⁸Aaron ccapaw Eleazar a ccapaw Fineshas nynh tuh-e ccyh lya tuh a malang khe rya a law), “Kae uno Benjamin phin hae kha dou khylan vae kheit bua kae pou ung cih tou, tuhkhyhze kae umtaw vae cih tou?” a cipya hae. BAWIPAW nynh, “Cceih oh, awkhualan minmin kha nae kuih kya kae pya cih oh,” a cipya hae.

²⁹Tukeiccuze Israel hae nynh Gibeah khua po voilu lan buhkhawtu hae kha aruh lante a nung hae.

³⁰Tetuh nin thumnaw nin khe Israel hae nynh Benjamin phin hae kha a ccianua hae, ninhyn hawte Gibeah khua pe khe rhawkaw hae kha a nungnua hae.

³¹Benjamin phin hae nynh tuh-e rhawkaw hae kha pounua hae zah, khua kyate asawnaw lang cia a cceih hae. Ninhyn hawte rhawkaw hae kha a chia takaw hae; Bethel khua lang cceihpaw te Gibeah khua lang cceihpaw laanluepi hae kya thuasah, ramkaw kya thuasah Israel hae sung thum loukaw kha a chia hae.

³²Benjamin phin hae nynh, “Ninhyn hawte kae malang khe a shung hae,” cite a tua hae. Thuasalama Israel hae nynh, “Nulang sihkuh oh sih lah, minmin hynh khua te asawkunaw laanpi lang soih oh sih,” a ci hae.

³³Israel hae alunghua tuh nulang sihkuh hae zah Baal-tamar khua kyakhe a um hae, tuh ccyh lyakhe buhkhawtu Israel hae nynh Geba niccaw lang e mih umnaw kyakhate a pounua kangmaw hae.

³⁴Israel hae balyn kya-e popaw rhawkaw thong haw nynh Gebeah khua kha ccianua hae zah, thawte a tukkuh hae. Thuasalama Benjamin phin hae tuh ronaw nynh a naenuaku hae paw kha nykuh khyh hae.

³⁵BAWIPAW nynh Benjamin kha Israel malang khe a tae; tuin nin khe Israel hae nynh zunghe kyngpaw Benjamin phin hae thong kuin lae pangaw za kheit kha a chia hae.

³⁶Tetuh Benjamin phin hae nynh kae shung vae cipaw a ny hae. Israel hae tuh Benjamin phin hae malang te nulang a sihkuh hae, pawccecize Gibeah khua pe a nungnua hae paw buhkhawtu rhawkaw hae kha a doliaku hae.

³⁷Buhkhawtu rhawkaw hae nynh Gibeah khua kha vaekheihmawte thiing hae zah, khuapi kha thaloi te khaleih a chia hae.

³⁸Israel hae te buhkhawtu rhawkaw hae nynh syntawnaw hoi hae zah, khualae kya maeekhuh pipi he yn pou te,

³⁹Israel hae tuh rhawtuknaw kalan bua ki lan, cite a hoku hae. Benjamin phin hae nynh Israel hae sung thum loukaw kha a chia takaw vae hae; minmin nynh, “Masaty rhawtuknaw kya hawte, minmin tuh kae malang a shung ccaccing cih hae,” cite a tua hae.

⁴⁰Maeekhuh pipi tuh khua kyate he yn khuhthung te, Benjamin phin hae nynh mih nulang he a do hae tuh, khua tuh abalynte maeekhuh lang vaawlang akhuhthung vae!

⁴¹Te Israel hae tuh nulang a ki hae, Benjamin phin hae tuh mih bungzou vae, pawccecize ronaw nynh oun naenuaku vae cipaw a ny hae.

⁴²Tukeiccuze Israel hae kyate maeleihkuh hae zah ramkaw langkhe a ccue hae; thuasalama rhawtuknaw nynh phah hae zah, khua kyate oun pou hae paw kha mih laku khe a chia mamin hae.

⁴³Benjamin phin hae kha koihlu biate Nohah khua kyate Gibeah khua nithua lang e hmin kyacia deehui hae zah a chia hae.

⁴⁴Benjamin phin hae athungpaw rhawkaw hae thong haw lae tarya a chih hae.

⁴⁵Maeleihkuh hae zah ramkaw lang Rimmon lungpi kalan a ccue lya hae khe, laanluepi hae kya milu thong pangaw a chia hae, te Gidom khua cia deehui hae zah milu thong ning kha mah a chia hae.

⁴⁶Tukeiccuze tuin nin kya zunghe kyngpaw Benjamin phin athungpaw rhawkaw hae a chih hae paw tuh thong kuin lae pangaw acih hae.

⁴⁷Thuasalama milu za taruh tuh maekuh hae zah ramkaw lang Rimmon lungpi kalan a ccue hae, Rimmon lungpi kya sawpaw sah pali a um hae.

⁴⁸Israel hae nynh Benjamin phin hae kha kinua hae zah, khua lungkhu e ccungccaw hae, sahiin hae te a muih hae paw miakaw kha thaloi te a bae hae. A thuanua hae paw khua hae kha maee te a soi hae.