Read Zotung Chin BYAPIATU 21 Bible Online

BYAPIATU 21 - Zotung Chin bible

BYAPIATU 21

¹Israel hae nynh Mizpah kyakhe, “Humhung nynh mah ah ccanung hae hynh Benjamin phin hae kalan tungtuhsah lei lan hae,” cite thyalawkute bya a kinku hae.

²Te ccungccaw hae tuh Bethel lang oun cceih hae zah Pachia malang khe zete cia haungte mih roisaw hae zah thawte a rah hae.

³Minmin nynh, “Pou BAWIPAW , Israel Pachia, pawccemou atunin hynh-e uccaw hynh yn um zah, Israel minphuin kya phin kheit tuh azo cih?” a ci hae.

⁴Awkhualan khe ccungccaw hae tuh awkhua te tho hae zah, tuin kyakhe silawhang ccangkheit rae hae zah maee-ute silawnaw te ccawkunaw silawnaw kha a rae hae.

⁵Te Israel hae nynh, “Israel minphuin hae balyn kya-e ahummou BAWIPAW malang pumkunaw kya thuabua khyh?” a ci hae. Pawccecize Mizpah khua lang, BAWIPAW kalan athuabua leipaw ccungccaw te asekuh lante atynpaw byakinkunaw kha rae hae zah, “Tuh-e ccungccaw tuh chia athua cih,” a ci hae.

⁶Thuasalama Israel hae nynh mih uno Benjamin phin kha ngaethyaumsah hae zah, “Israel hae kyate phin kheit tuh atunin vua athua vae.

⁷Aening nynh ah ccanung hae kha minmin kalan zu lang pya lei lan hae cite BAWIPAW min phyate thyalawkute bya ah kinku vae oh keiccuze, a hiinhy hae paw minmin hanlan zu hynh pawtemou cyipya lan hae?” a ci hae.

⁸Minmin nynh, “Israel phin hae kya Mizpah khua lang BAWIPAW kalan a cceih leipaw hummou a um?” a ci hae. Jabesh-gilead khua kya-e lu kheit sanmah pumkunaw kalan ryahmin lang thuabua khyh hae.

⁹Pawccecize ccungccaw hae kha he a ria hae tuh, tuin kya Jabesh-gilead khuaccaaw hae lu kheit sanmah umbua khyh.

¹⁰Tukeiccuze apumkuhpaw zapi hae nynh rhawkaw thong haw lae ning kha tuh-e khua lang saw hae zah, “La cceih oh lah, Jabesh-gilead khuaccaaw hae kha nopi hae te imua hae ryte thaloi te la bae oh.

¹¹E hynh na cyi lan oh paw athua cih; pise miakaw te pise ryte a ihkheih vae hae paw nopi miakaw kha khaleih na theih cih oh,” cite kaw a pya hae.

¹²Jabesh-gilead khuaccaaw hae kyakhe pise te a ihkheih boi lei hae paw liaccady za pali kha muih hae zah, Kanaan ram, Shiloh khua e ryahmin kalan khe a cciakhae hae.

¹³Te apumkuhpaw zapi hae nynh Rimmon lungpi kya um hae paw Benjamin phin hae kalan khe ccawkunaw bya kha a hosah pya hae.

¹⁴Tuin ccyh khe Benjamin phin hae tuh oun ki hae zah, Israel hae nynh Jabesh-gilead khua e ahiinte a nung hae paw nopi hae kha zu lang a pya hae; thuasalama minmin hanlan zaw khyh.

¹⁵BAWIPAW nynh Israel phin hae mih lungngingnaw kha a ro keiccuze Israel hae nynh Benjamin phin kha ngaethya a umsah hae.

¹⁶Tukeiccuze apumkuhpaw zapi hae kya-e piccan hae nynh, “Benjamin phin hae kya nopi hae a um vae khyh keiccuze a hiinhy hae paw hanlan zu tuh pawtemou cyipya lan hae?” a ci hae.

¹⁷Te minmin nynh, “Israel phin hae kyate phin kheit kha azo khyh nawlan, Benjamin phin kya-e a hiinhy hae paw hanlan rho tuh a um aho.

¹⁸Tuhzemah ah ccanung hae kha zu lang minmin kha ah pya kho khyh oh,” a ci hae. Pawccecize Israel hae nynh thyalawkute byakinkuh hae zah, “Benjamin phin kha zu a pyapaw miakaw tuh thyalaw thua sah,” a ci hae.

¹⁹Tukeiccuze minmin nynh, “Dotua, Bethel thahlang, Bethel kyate Shekhem khua lang cceihpaw laanpi nithua lang, Lebonah khua alia lang umpaw Shiloh khua kyakhe BAWIPAW hanlan kum takyh tuapaw poi tuh leih a um,” a ci hae.

²⁰Benjamin phin hae kha kawpya hae zah, “Cceih oh lah, misu khokhu hae kyakhe la buh oh lah, la dophi oh;

²¹Shiloh khua e liaccaw hae nynh lawnaw kya law khylan he oun pou hae te, misu khokhu kyate pounua oh lah, Shiloh khua e liaccaw hae kha mawmaw zu raveih lang kyngkuh oh, te Benjamin ram lang cceih oh.

²²Mih paaw hae te mih raee hae nynh kae kya bya a lung hae ze, kaening nynh minmin kyakhe, ‘Thawccinawte beih hysah oh lah, beih oun pya oh; pawccecize rhawtuknaw kya minmin lu kheit cci hanlan zu kha kae kyngpah khyh hae. Nae ccanung hae kha minmin kalan na pya oh paw tuh seinaw na rae oh paw thua khyh,’ cite kae hopah cih hae,” a cipya hae.

²³Te Benjamin hae nynh tuhcite a cyi hae; poi kya a law hae paw kya-e a kyng hae paw kha mih zu lang ccarou a lawku hae. Te cceih hae zah mih ram lang a ki hae, khua hae kha sakthui hae zah, tuin kya a um hae.

²⁴Tetuh Israel hae tuh tuin nin khe mih phin te mih innbyn raveihte tuin kyate pou hae zah, mimaw ram lang a ki hae.

²⁵Tuh ccyh lya tuh Israel hae kya siapharan um khyh; ccungccaw hae balyn nynh mih muihnaw kya akyh a ci hae paw kha a rae hae.