Read Zotung Chin BYAPIATU 3 Bible Online

BYAPIATU 3 - Zotung Chin bible

BYAPIATU 3

¹Kanaan ram kya rhaw a tuk boi lei hae paw Israel hae balyn kha syntawtua khylan

²(She takyh kya-e Israel hae nynh rhawtuknaw zia kha a ny nawlan hae kyalya te, langmaw lyaze rhawtuk boi lei hae paw kha rhawtuk ccangpya khylan) BAWIPAW nynh a laehysah hae paw minphuin hae tuh hynh-e hae hynh nynh athua hae:

³Filistin siapharan lu pangaw hae, Kanaan hae mih balyn, Sidon hae te Baal-hermon Mua kyate Lebo-hamath mua kyacia Lebanon Mua kya um hae paw Hiv hae nynh athua hae.

⁴BAWIPAW nynh Moses kyate mih minpaaw hae kya kaw a la pya hae paw a kawbya hae kha a zui hae tou zui khyh hae tou cipaw ny nawlan, tuh-e hae tuh Israel hae kha syntawtua nawlan nynh thua hae.

⁵Tukeiccuze Israel hae tuh Kanaan hae, Hit hae, Amor hae, Periz hae, Hiv hae te Jebus hae laku kya um hae zah,

⁶mih ccanung hae kha zu lang a dyku hae, mimaw mih ccanung hae kha mah tuh-e hae mih ccapaw hae zu lang a pya hae; mih pachia hae kha a beikbua hae.

⁷Israel hae nynh BAWIPAW muihnaw kya hoyleinaw kha rae hae zah, BAWIPAW mih Pachia kha ningte Baal hae te Asherah hae kha a beik hae.

⁸Tukeiccuze Israel tungvaw BAWIPAW thinrianaw tuh maee lang rua zah, Mesopotamia siapharan Kushan-rishathaim kalan a zua hae, Israel hae nynh Kushan-rishathaim kha kum tarya rya a lawpya hae.

⁹Thuasalama Israel hae nynh BAWIPAW kalan he a sia hae te, BAWIPAW nynh Israel hae hanlan luesahtu lu kheit kha langsakuh zah, aning nynh a luesah hae, tuh-e paw tuh Kaleb neitaw Kenaz a ccapaw Othniel nynh thua.

¹⁰BAWIPAW muisaw tuh Othniel tungvaw yn thua zah, aning nynh Israel hae kha bya a pia hae; rhawtuk lan thokuh zah, Mesopotamia siapharan Kushan-rishathaim kha BAWIPAW nynh a kuih kya a pya, te Kushan-rishathaim kha a tae.

¹¹Tukeiccuze ram tuh kum sung pali lungkhu daenaw a um. Te Kenaz ccapaw Othniel tuh a chih.

¹²Israel hae nynh BAWIPAW muihnaw kya hoyleinaw kha bua a rae hae; BAWIPAW nynh Israel kha rawsete Moab siapharan Eglon kha thawzung a hoisah, pawccecize BAWIPAW muihnaw kya hoyleinaw kha a rae hae.

¹³Eglon nynh Ammon hae te Amalek hae ryte nawccawkheihnaw raete Israel kha ccianua zah a tae; te ungcci ku khua kha a law.

¹⁴Tukeiccuze Israel hae nynh Moab siapharan Eglon kha kum haw lae tarya rya a lawpya hae.

¹⁵Israel hae nynh BAWIPAW kalan he a sia hae te, BAWIPAW nynh minmin hanlan luesahtu lu kheit a sawpya hae, aning tuh Benjamin phin, Gera ccapaw, a voikepaw Ehud nynh thua. Israel hae nynh aning kha Moab siapharan Eglon kalan ngunto kha a thahsah hae.

¹⁶Ehud nynh dong kheit sae zah kyn ning ahepaw thaloi kha raekuh zah, a ranglang phae kya a boeining kaw khe a heedeku.

¹⁷Te ngunto tuh Moab siapharan Eglon kha a pya. Eglon tuh myarya a tho.

¹⁸Ehud nynh ngunto he a pya koute, ngunto a phu hae paw kha a saw hae.

¹⁹Thuasalama amaw tuh Gilgal khua pe umpaw lungbing kalan ki zah, “Pou siapharan, na hanlan byaphi ka hoi,” a cipya. Tetuh siapharan nynh, “Daebabi lan um oh!” cipah hae zah a ryalahtu hae balyn tuh a muihnaw kyate a pou hae.

²⁰Te kyaakakinpaw akhaan lungkhu a makhaete a um lyakhe, Ehud nynh naenuakuh zah, “Na hanlan Pachia kyate yn thuapaw bya ka hoi,” cipah zah, siapharan tuh a dahungnaw kyate yn thokuh.

²¹Tetuh Ehud nynh a voilang kuih kha dyngte a ranglang phae kya-e thaloi kha thuaakuh zah, Eglon vue kha a thuing;

²²thaloi tuh alua ryte po ccong lan tee zah, atho nynh thaloi kha pong a bong, a vue kyate thaloi kha phoh khyh, a-ia phe toikuh.

²³Te Ehud tuh tee takawnaw akhaan kalan pou zah kyaakakinpaw khaan thuakaw hae kha khaw zah toh te a tousung.

²⁴Ehud he a pou koute ryalahtu hae nynh oun thua hae zah, kyaakakinpaw khaan thuakaw phang toukuhpaw kha a muih hae tuh, “Siapharan hynh kyaakakinpaw akhaan kya a zuin ung hynhsa,” cite a tua hae.

²⁵Mih ngaemyng cia ngaw hae zah, kyaakakinpaw khaan thuakaw kha a hung khyh keiccuze tohccung lawkuh hae zah a hung hae. Mih bawipaw rhua tuh laekhu kya phang a la huekuh vae.

²⁶Tuhcite a ngaw lya hae khe, Ehud tuh lungbing khunglang zya cceih zah Seirah khua lang po a ccue.

²⁷Aning nynh he a thua te, Efraim mua vaw khe mungkae a tu; Israel hae nynh a nulang te zui hae zah mua vaw te a rungbung hae.

²⁸Ehud nynh minmin kha, “Ka nulang yn zui oh; pawccecize BAWIPAW nynh nae rhaw hae Moab hae kha nae kuih kya ae pya vae oh,” a cipya hae. Tetuh a nulang zuikute rungbung hae zah, Moab hae nynh Jordan vaw a zuanaw hae hmin kha lah hae zah, lu kheit sanmah vaw zuasah khyh hae.

²⁹Tuh ccyh lyakhe Moab hae athungpaw te arawhoypaw balyn kha lu kheit san zuasah leite thong haw loukaw a chia hae.

³⁰Tuhcite tuin nin khe Israel kuih kya Moab tuh a shung. Te ram tuh kum sung tarya lungkhu adae.

³¹Ehud koute Anath ccapaw Shamgar tuh yn langkuh, aning nynh Filistin hae za taruh kha ccong ahepaw te a chia hae. Aning nynh mah Israel hae kha a luesah hae.