Read Zotung Chin BYAPIATU 7 Bible Online

BYAPIATU 7 - Zotung Chin bible

BYAPIATU 7

¹Jerubbaal (tuh-e tuh Gideon) te amaw kya um hae paw rhawkaw hae balyn tuh awkhua takaw te thokuh hae zah Harod tuisung pe khe a rya hae; Midian ryahmin tuh minmin te thahlang, Moreh mua aleihpaw accya khe a um.

²BAWIPAW nynh Gideon kha, “Kae nynh Midian hae kha Israel hae kuih kya pya khylan na kya umpaw rhawkaw hae tuh ka hanlan eih lung kaesy hae. Israel nynh, ‘Kamaw kuih nynh kae hynh yn khum,’ cite tuakute kae kha thehoysah leite a umsei cih.

³Tukeiccuze ccungccaw hae kyakhe, ‘A rihpaw te a thinphangpaw miakaw tuh inn lang ki hae sah,’ cite thaesah hae,” a cipya. Tukeiccuze Gideon nynh minmin kha a syntawtua hae; thong kuin lae ning tuh ki hae zah thong haw alae hae.

⁴Te BAWIPAW nynh Gideon kha, “Rhawkaw hae tuh eih alung ung hae; tui kalan cciakhae bung hae lah, tuin kyakhe na hanlan ka syntawtua cih hae. ‘E paw tuh na kya a cceihbua cih,’ ka ci ze, tuh-e paw tuh na kya a cceihbua cih; ‘E paw tuh na kya cceihbua lan khyh,’ ka ci ze, tuh-e paw tuh na kya cceihbua lan khyh,” a cipya.

⁵Tukeiccuze Gideon nynh minmin kha tui kalan a cciakhae hae; BAWIPAW nynh Gideon kha, “Ui nynh tui a lya hawte a lae te tui a lyapaw balyn tuh san kheit kya na nung cih hae; tui nia lan ccukharutung zah a kuih te a neihpaw balyn kha ccangpaw san kheit kya na nung cih hae,” a cipya.

⁶Kuih kya-e tui kha lae te a lyapaw milu tuh za thum acih hae; thuasalama tuhlaepaw hae balyn tuh tui nia lan mih ccukharu a tung hae.

⁷Te BAWIPAW nynh Gideon kha, “Tui a lyapaw milu za thum khate nanning kha kae khum cih oh zah, Midian hae kha nae kuih kya kae pya cih oh. Tuhlaepaw hae balyn tuh mih inn lang ki hae sah,” a cipya.

⁸Tukeiccuze mih banang hae te mih mungkae hae kha a law; te tuhlaepaw Israel hae balyn kha mih umnaw bu kalan Gideon nynh a kisah hae, thuasalama tuh-e za thum kha tuh a umsah hae. Midian ryahmin tuh Gideon a umnaw zakaw accya khe a um.

⁹Tuh-e khuazi khe BAWIPAW nynh Gideon kha, “Thoku tua, mih ryahmin kha tuk ccavae; pawccecize na kuih kya kae pya vae.

¹⁰Thuasalama tuk lan na ri ze na ryalahtu Purah ryte mih ryahmin langkhe cceihbung oh;

¹¹minmin nynh bya a ho hae paw kha na thae cih oh; tukoute mih ryahmin kha tuk khylan na kuih tuh thawsaesah athua cih,” a cipya. Te Gideon tuh a ryalahtu Purah ryte rhaw hae ryahmin atolang umpaw rhawviabu kalan a cceihbung hae.

¹²Midian hae, Amalek hae te nithua lang e ccungccaw hae balyn tuh tungkhipaw aphu zeih alung lante accya kya a um hae; mih kalauh hae tuh rili kin e laesia hawte riatae um khyh hae.

¹³Gideon he yn thua tuh, ccungccapaw lu kheit nynh a maan kha a banpaw kya hopah zah, “Maan ccangkheit ka sah, barli sanlou phe kheit tuh Midian hae ryahmin kalan toubung zah, bu kya thua zah bu kha phe pu lan a deih; bu tuh dawleihkuh zah aroh,” a cipya.

¹⁴Te a banpaw nynh, “Tuh-e tuh ccangpaw thua leite Israel paw, Joash ccapaw Gideon thaloi nynh thua; Midian te a rhawkaw hae balyn kha Pachia nynh a kuih kya a pya vae,” a cipya.

¹⁵Tuh-e maan te asuilan kong a hoku hae paw kha Gideon nynh he a thae tuh, BAWIPAW kha a beik; te Israel ryahmin lang ki zah, “Thokuh oh, BAWIPAW nynh Midian rhawkaw hae kha nae kuih kya ae pya vae oh,” a ci.

¹⁶Gideon nynh ccungccaw za thum kha phu thum lang a phia koute, mungkae hae te a lungkhu kya maeekhua umpaw accawnghanpaw banang lepaw hae kha mih kuih raveih kya a pya hae,

¹⁷te minmin kha, “Kae hynh yn dokuh oh lah, ka cyi hawte cyihbua oh; Midian ryahmin kin ka thua te, ka cyi hawte cyihbua oh.

¹⁸Kae te ka kya umbua hae paw balyn nynh mungkae he kae tu te, ryahmin po voilu lan um hae paw balyn nynh mah na tubua cih oh zah, ‘BAWIPAW hanlan te Gideon hanlan!’ cite na sia cih oh,” a cipya hae.

¹⁹Tukeiccuze Gideon te a kya um hae paw za kheit nynh ziraccyng he a thua takaw, rhawviatu rulaeku ccyh khe ryahmin kin kya a thua hae; te mungkae tu hae zah mih kuih kya a ccyng hae paw banang lepaw hae kha a koi hae.

²⁰Tuhcite phu thum hae nynh mungkae tu hae zah banang lepaw hae kha a koi hae, mih voilang kuih te maeekhua kha kyng hae zah mih ranglang kuih te tu lanpaw mungkae kha a kyng hae; te, “BAWIPAW hanlan te Gideon hanlan thaloi!” cite a sia hae.

²¹Ccungccaw miakaw nynh ryahmin po voilu lan mimaw hmin kyakhe thadyn hae zah ryahmin kya-e ccungccaw hae balyn tuh a ccue hae; sia hae zah a ccue vae hae.

²²Minmin nynh mungkae za thum kha he a tu hae tuh, BAWIPAW nynh rhawkaw miakaw tuh mimaw mih ban hae kha thaloi te baesah hae zah, rhawkaw hae tuh Zererah langsang Beth-shittah kyacia, Tabbath khua pe Abelmeholah ramri kyacia a ccue hae.

²³Te Naftali phin, Asher phin te Manasseh phin mih balyn kya-e Israel ccungccaw hae kha ko hae zah Midian hae tuh a deehui hae.

²⁴Te Gideon nynh locceihtu hae kha Efraim muaram hae balyn kya po lekuh lan saw hae zah, “Midian hae kha dou khylan oun cceihbung oh, Beth-barah khua kyacia vaw taraw hae kyakhe thuasah, Jordan vaw kyakhe thuasah la cciakhaw oh,” a cipya hae. Tukeiccuze Efraim pise balyn kha ko hae zah, minmin nynh Beth-barah khua kyacia vaw taraw hae kyakhe thuasah, Jordan vaw kyakhe thuasah a cciakhaw hae.

²⁵Midian rhawbawi lu ning Oreb te Zeeb kha a kyng hae; Midian hae kha a dee lalia lan hae te Oreb kha Oreb lungpi kya theih hae zah Zeeb kha Zeeb misu mianaw khu kya a chia hae. Oreb lu te Zeeb lu kha Gideon kalan Jordan vaw khuraw lang a phu hae.